Emĩbĩrĩ 15

Erĩhĩndana lyʼekanĩsa eYerũsalema

1Neryo abandi bandu mobandagalira eAntĩokĩa bakalũa eYũdea, Ĩbakakangĩrĩraya abalĩkyetu bati, Mwamatendĩbanĩbwa ngʼemitsye ya Musa, isimwangatoka erĩlamĩbwa. 2Nĩkwa Paũlo na Barnaba mobagabana nabo nʼerikuba obuhaka nabo busana nʼomwatsi oyũ. Neryo abalĩkyetu mobatwa omwatsi bati, Paũlo na Barnaba nʼabandi ba kubo baye eYerũsalema oko bakwenda nʼabakulu busana nʼomwatsi oyũ.

3Neryo ekanĩsa moyatumabo, kandi mobalaba eFoĩnĩkĩ nʼeSamarĩa, ĩbanemũkanĩryabo ndeke erilama lyʼEbihanda. Neryo omwatsi oyũ mwatsemesya abalĩkyetu bosĩ bo kutsibu. 4Neryo babere bahĩka eYerũsalema mobakokĩbwa nʼekanĩsa nʼabakwenda nʼabakulu, kandi mobakanĩryabo ebyosĩ ebyo Nyamuhanga abirikola haguma nabo. 5Nĩkwa abandi bʼekihanda kyʼAbafarĩsayo abakĩkĩrĩraya, mobahangana bati, Litolere ĩbabanĩbwa, kandi litolere ibahanabo bati bakwame Emigambo ya Musa.

6Neryo abakwenda nʼabakulu mobahĩndana erĩkanĩa omwatsi oyũ. 7Neryo enyũma wʼerĩkanĩa lĩnene, Petero mwahangana, mwabwirabo ati, Balĩkyetu mũnasĩ ngoko Nyamuhanga mwayisoga ngye omo katĩkatĩ kenyũ oko biro byʼerĩmbere, ati nyĩkangĩrĩraye ekĩnywa kyʼEngulu Yowene oko Bihanda, batoke erĩowa nʼerĩkĩrĩrya. 8Neryo Nyamuhanga, oyo wasĩ emitima yʼabandu, mwalĩga Ebihanda iniakahabo Omũlĩmũ Abũyĩrĩre ngoko atuhago. 9Kandi Nyamuhanga mwatalebyandi nandi omo katĩkatĩ ketu nabo, ĩnĩakeraya emitima yabo kwʼebibi, kusangwa bĩkĩrĩraya. 10Neryo lino busana nakĩ mukalenga uku Nyamuhanga muti mũkahĩra emiheke oko migongo yʼabiga, eyo aboso-kulu kutse ĩtwe batatoka eriheka kwehĩ? 11Nĩkwa ĩtwe tũkĩkĩrĩraya tuti tũkalamĩbawa omo lukogo lwʼOmukama Yesu, ngoko nabo bakalamĩbawa.

12Neryo endeko yosĩ moyabya bũkũtũ omugulu bowa Barnaba na Paũlo bakakanĩa busana nʼebitiko-tiko nʼebyʼeriswekera ebyo Nyamuhanga ahabo erikola omo katĩkatĩ kʼEbihanda. 13Neryo babe re babuga erĩbũga, Yakobo mwasũbĩrya ati, Balĩkyetu, munyihulikirire! 14Sĩmeonĩ abĩrĩbakanĩrya ngoko Nyamuhanga atsũka erĩkangya olwanzo luwe busana nʼEbihanda, eriyisoga omo katĩkatĩ kabo abandu busana nʼerĩna liwe. 15Kandi ebĩnywa byʼabamĩnyererĩ byamalĩga omwatsi oyũ. Amasako akabũga ati,

16Enyũma wʼemyatsi eyĩ nasyasubula,

Omukama atya,

Kandi nasyaswahĩmba enyũmba ya Dawĩdĩ eyatera,

Nasyaswahĩmba ahasambukala,

Kandi nasyaswahanganĩayo.

17Litya abandi bandu bosĩ basondaso-ndaye Omukama,

NʼEbihanda byosĩ ebikahulawa omo lĩna lyage.

18Omukama atya, oyũkamĩnyĩsaya emyatsi eyĩ erĩtsũka kera.

19Neryo Yakabo ati, Ĩngye nangatwago nyiti, Sĩtwendereraye abʼEbihanda abakabindukira Nyamuhanga. 20Nĩkwa tusakirebo tuti, baleke ebyalya ebĩtsandĩre kusangwa bikaherawa oko syosanamu, kandi baleke erĩsĩngĩra, kandi baleke erirya esyonyama esyabĩrĩnĩgwa, kandi baleke, erirya omusasi. 21Kusangwa Emigambo ya Musa yabirisomwa biro bingi erĩtsũka kera omo manyũmba wʼerĩhĩndanamo oko buli Sabato, nʼebĩnywa biwe bĩkatũlawa omo buli mũyĩ.

Ebarua eyatumawa oko bĩkĩrĩrye bʼEbihanda

22Neryo abakwenda nʼabakulu, haguma nʼekanĩsa yosĩ mobanza eriyisoga abandu omo katĩkatĩ kabo eritumabo eAntĩokĩa haguma na Paũlo na Barnaba. Mobayisoga Yũda oyukahulawa mo Barĩsaba, na Sila, abasondolĩ omo katĩkatĩ kʼabalĩkyetu. 23Neryo mobatuma ebarua eyĩ nabo, bati,

Ĩtwe bakwenda, nʼabalĩkyetu abakulu, tukabasakira ĩnywe balĩkyetu bʼEbihanda abali eAntĩokĩa, nʼeSũrĩa, nʼeKĩlĩkĩa, Obuholo ũkwʼĩnywe. 24Twamowa ambu abandi bʼoko wetu babiribahahũkya omo bĩnywa byabo, nʼeriganga-gangya emitima yenyũ. Ĩtwe sitwetabwirabo tutya. 25Neryo twamabĩhĩndana haguma nʼomutima muguma, motwanza eriyisoga bandu nʼeritumabo ũkwʼĩnywe. Tukatumabo haguma nʼabanze betu Barnaba na Paũlo, 26ababiriyisiga busana nʼerĩna lyʼomukama wetu Yesu Kristo. 27Kandi twabirituma Yũda na Sila, nabo ĩbobene basyabatũlĩra emyatsi eyĩ omo bĩnywa byabo. 28Kusangwa Omũlĩmũ Abũyĩrĩre, netu, twamalĩga tuti sĩtwangabahĩra kwʼemiheke eyĩlabĩre emyatsi eyitolere eyĩ: 29tuti, muleke ebyalya ebĩtsandĩre kusangwa bikaherawa oko syosanamu; kandi muleke erirya omusasi; erirya enyama eyabĩrĩnĩgwa; kandi muleke erĩsĩngĩra. Mwamayĩteya oko myatsi eyĩ, mwasyakola ndeke. Mubye nʼobuholo.

30Neryo abatumawa mobandagalira eAntĩokĩa. Neryo mobahĩndanĩa endeko yʼekanĩsa, mobahabo ebarua eyo. 31Neryo abandu babere babisoma ebarua eyo, mobatsema busana nʼebĩnywa byʼerĩsĩkyabo. 32Neryo Yũda na Sila, ababya bamĩnyererĩ nibya, mobahamĩrya abalĩkyetu, nʼerĩsĩkyabo omo bĩnywa bingi. 33Neryo babere babisibayo ebindi biro, abalĩkyetu mobakwamanĩsyabo nʼobuholo, neryo mobasuba oko batumabo. [ 34Nĩkwa Sila mwanza erĩsĩgala eAntĩokĩa.]

35Nĩkwa Paũlo na Barnaba mobasĩgala eAntĩokĩa. Neryo haguma nʼabandi bangi mobakangĩrĩrya, nʼerĩtũla ekĩnywa kyʼomukama.

Paũlo na Barnaba bakagabana

36Neryo enyũma wʼebindi biro, Paũlo mwabwira Barnaba ati, Tusubule tuyabane abalĩkyetu abali omo mĩyĩ eyo twakangĩrĩraya ekĩnywa kyʼomukama, tũlebaye ngoko babere. 37Neryo Barnaba mwanza erigenda haguma na Yoane Marĩko. 38Nĩkwa Paũlo mwagana, ati sibagende nʼoyo watswa kubo ePamfĩlĩa, oyutagenda haguma nabo oko mũbĩrĩ. 39Neryo mobakũbĩsananĩa obuhaka omo katĩkatĩ kabo, kyaleka ibagabana. Neryo Barnaba mwagenda haguma na Marĩko mobasokera eKĩpũro omo bwato. 40Nĩkwa Paũlo mwayisoga Sila, neryo mobahongoka, abalĩkyetu ĩbamabĩhĩrabo oko lukogo lwʼOmukama. 41Neryo Paũlo mwalaba eSũrĩa nʼeKĩlĩkĩa, ĩnĩakahamĩraya esyokanĩsa.

Currently Selected:

Emĩbĩrĩ 15: KB80

Highlight

Copy