Avakolosayi 3

1Sweno, wone yemusilibwike pamwi na Kilisito, musugunalage ukusaka isa kuchanya, kula kwekwali Kilisito, akong'ome ulubali lwa kundyo lwa Nguluvi. 2Mudobokelage isa uko kuchanya, na si ifinu fya mung'i. 3Pakuva nyenye mufwe, na uwumi wenyu wufihe pamwi na Kilisito mwa Nguluvi. 4Uwumi wenyu wa nachene ye Kilisito, neke nape aasile, pepene pe nayi nyenye samusa pamwi na umwene neke muhange mundolo!

Imigendele imilovela na imipya

5Sweno muwulagilage ng'ani mbesili isili mwanyenye isikwiga isa mung'i; uwuyamba, uwugoni, uwaafu, uwuhatufu, na uwudobokesi, ulo lwe lusunyalilo ku fihwananguluvi. 6Na ukwimila siso, nambi ililakali lya Nguluvi lyakuvasila vala mbevali avagaya ichoga kulumwene. 7Nyenye nanye pamwandi mwagendelige mwa siso, pemwe pasi ya uwutema wa siso. 8Neke lino musilekelage ng'ani mbesili iso, lilakali, ikivikileme, uwanangifu, uwudesi uwubi, uwihuma mumilomo jenyu nambi ing'ani isa malanga. 9Mulidetela, pakuva nyenye yemukawuhesise uwunu uwulovela pamwinga na ifipigo fya wuwo, 10na mufwite uwunu uwupya. Uwo wigina ukuwuyapwa na Nguluvi, Umugafi wa wuwo, wutegane mulwihwano lwakwe, sambi muhwane ukumukagula Nguluvi mu wukwilanifu. 11Napelufiche ulu, sipewipwali kangi uwuliwungi kwa Umugiliki na Umuyudaya, umuwoole na yesimuwoole, yeimbite na yesiimbiti, umunyawingi na umunu umutemapakwe. Kilisito ye mwene mbefili, na alimwambefili,

12Pakuva mwivanu vahagule, avelu na avende va Nguluvi vanyalusungu, vanyawudeke avilevesi, avalele, vanyalwikangaliso. 13Mwikangalilage na ukwidegepela wone umunu ave na ulukani lwe asutine na umuyagwe. Luvavaje mwidegepelage ndawe umutwa lweavadegepye nyenye. 14Ukulutila kwa iso mbesili mwinatilage uwende, pakuva uwende wawikong'asa mbesili mu wulilumwi uwukwilaniche. 15Nawo uwikalakunoga wa Kilisito wusagilage munumbula senyu, pakuva ukwimila lulo nyenye mwakemelitwe mumuvili gugo gumwi. Kangi muvelage na ikilumbo! 16Ulukani lwa Kilisito lwikalage mugati umwenyu pamwinga na uwunono wakwe mbewuli mwiyigisage na ukwiyisa mu luhala mbeluli. Mwimbage isabuli, na inzimbo, na uwimbe wa kinyamuhe; mumwimbilage Nguluvi munumbula senyu mwina ikilumbo. 17Na kila chemuvelaga mwipiga, mukulonga nambi mukupiga, mupigage mbefili mwitawa lya Umutwa Yesu na ukumulumba Nguluvi Dada ukukola kulumwene.

Isivavaje avanu mumigendele imipya

18Nyela nye vang'inetu, muvapulikage avanu venyu, pakuva ulo lweayiwenda Umutwa. 19Na yinyenye mwevagosi, muvendage avanu venyu, na mulava mwivakali ku vanu venyu. 20Nyela mwe vana, muvapulikage avegasi venyu mbepali, pakuva ulo lwakumunogela Umutwa. 21Nanye mwe vegasi, mulavatala avanenyu, pesi ndahihyo vadedela imitima. 22Nyela vanyawingi, muvapulikage avavina venyu va mung'i mwa mbefili, na si pala hela pevakuvimilila ukuta mwisaka ukwiyendelesa kwa vene; pesi ukuta mupigage ndahihyo chesa mutima, ukwimila ukumogopa umutwa. 23Na chemuvelaga mwipiga, mupigage chesa mutima, ukwimila Nguluvi si ukwimila avanu nda. 24Mwiwukage ukuta umutwa saavapela ikipelwa kila cheavaviiche avanu vakwe. Mumupigilage Kilisito umutwa! 25Yeipigaga isa uwananzi saahombwa isitegine na uwananzi wakwe; Nguluvi mugaya luhagu.

Currently Selected:

Avakolosayi 3: HeNT2004

Highlight

Copy