Maliko 1

Yohana mubatizi.

1-8.

1Chandilo cha ulau wa Yesu Kilisito, ṅwana Mulungu, shichi: 2Chiγendile sa viyaho vigondiγwevyo ni mteγanyi Yesaya kuti: Olela, natuma mlau ywangu, akulongwele, akuliγanyize sila yako. 3Kanwa cha mubilikizi chaivika mwe nyika angwe: Liγanyai sila ya Zumbe na kuγolosheza aho, ndiho agwile! 4Yohana ne akibatiza mwe nyika na kubilikila ubatizi wa kuhitula ntongonyezi, kangwe uhuza uushiγwe. 5Shi ngima ya Yudeya haṅwe na Wayelusalemu woshe wazamlawila, wazabatizwa ndiye mwe muto wa Yolodani wakivoteka kwa mbuli ya uhuza wawe. 6Yuja Yohana aizwikile mayoya ya ngameya, aiyakantile na kikowe, nkande zakwe ni siγe na woki wa vambi. 7Azabilikila angwe: Mwenizinka nguvu anitongela nyuma; kwa udodo wangu nkaviniagiza, nikiinama, nimzaγawile mikowa ya vilatu vyakwe. 8Imi nizamibatiza na mazi, yuja atazamibatiza na mpeho ṅazi.

Yesu abatizwa, aγezwa, abilikila.

9-11.

9Mishi ija Yesu azalawa Nazaleti ya Galileya, azahita, azabatizwa ni Yohana kuja Yolodani. 10Aho akilawa mwe mazi azaona, lwingu lukitana, kangi mpehongwa ikimshelela, ifanana na suwa. 11Hata kanwa chizalawa mwe lwingu angwe: Iwe u ṅwanangu, niyekukundisha, natamilwa ni weyo.

12Haho mpehongwa izamwusha na mwe nyika. 13Azaikala mwe iyo nyika mishi milongo mine akiγezwa ni Satani, weyae ni mazama, miya walau wazamtumikila.

14Yohana akibinda kuinkilwa, Yesu azahita Galileya, azabilikila ulau wedi wa uzumbe wa Mulungu angwe: 15Mishi izatimiza, uzumbe wa Mulungu u hehi; hitulai ntongonyezi zenyu, mtozeshe ulau wedi!

Yesu aitanga wahina.

16-20.

16Akianga nkandankanda ya bahali ya Galileya azamwona Simoni na nduγuye Andeleya, wagela lwavu mwe bahali, hambu ni walowi. 17Yesu azawati: Nitongelai, nimiγalushe walowa wantu! 18Waja wahoasha nyavu zawe, wazamtongela. 19Akihita na mazu hadodo azamwona Yakobo, ṅwana Zebedeyo, na nduγuye Yohana, wohe wa mwe chombo, wachunta nyavu zawe. 20Ne ahowaitanga; wazamwasha ishe ywawe Zebedeyo mwe chombo haṅwe na wandima, wazahita, wazamtongela.

Yesu ahonya muntu mwena mpepo Kapelinaumu.

21-28.

21Wazaingila Kapelinaumu. Mushi wa sabato ukibula, azaingila vikiloi, azafuza. 22Wantu wazashentuka mifuzize yakwe, hambu azawafuza sa muntu mwena ufuṅwa, nkafanane na watabaluwangwa.

23Muja vikiloi muna muntu mwena mpepo ye usaba, 24azainula kanwa angwe: Tina mbwai, ishwi na iwe, Yesu ywa Nazaleti? Uzaiza kwa tibinda! Takutaila kuti: U ngatiyani, kuti: U mṅazi ywa Mulungu. 25Yesu azaivaila angwe: Leka lwashu! Kangi lawa mwe uyu muntu! 26Ija mpepo ye usaba izamnyaγalisha yuja muntu, izakema na kanwa kikulu, vikibinda izalawa mwe ṅwili wakwe. 27Wosheni wazashentuka, wazauzanya angwe: Ni mbuli ani inu? Ni mifuzize mihya yena nguvu! Mpepo ze usaba aziingata, kangi ziyamwitika! 28Nguma yakwe izafikahita koshe koshe mwe shi zoshe za Galileya.

Amhonya mkwee ja Simoni na watamu wangi.

29-34.

29Aho wakilawa vikiloi, wazahita mwe nyumba ya Simoni na Andeleya, haṅwe na Yakobo na Yohana. 30Nine ja mkaza Simoni ailele, ana mbu; wazafikamγambila mbuli yakwe. 31Azamtimila yuja mvyele, azamwinula na kumtoza mkono, ne mbu zihomleka, azawaγoshwela ndima. 32Kukishwa zuwa jikibinda kuingila, wazamletela watamu woshe, hata wehuma mpepo. 33Wantu woshe wa uja muzi wazaunganana he kifiγwe. 34Azahonya watamu wangi wahumilewo mahisho mangi, hata mpepo nyingi azaziingata, kangi nkakundize ziya mpepo, zikilonga, kuti ziimtaile.

Yesu avika.

35-39.

35Makelo kushizati kuche, azainuka, azahalawa, azahita hantu he ike, azavika haho. 36Simoni azamdosa na waja weyae. 37Wakimwona waza mγamba: Wantu woshe wakulonda. 38Angwe ndiye: Netihite na kutuhu kwe mizi tanga, nikabilikile kohe, hambu ne niizilevyo. 39Azaanga mwe shi ngima ya Galileya akibilikila mwe mavikilo yawe, kangi akiingata mpepo.

Yesu amhonya mkoma.

40-45.

40Hata mkoma azamwizila, azamhembeleza haṅwe na kumgintila mazwi angwe: Ati wakunda, wadaha kunihonya. 41Azabulwa ni utungu naye, azakusula mkono, azamdowa, azamuti: Nakunda, uhone. 42Viya du lushe uja ukoma uzauka mwe ṅwili wakwe, azahona. 43Azamshunda na kumγulusha nguzu nguzu, 44angwe: Olela, ushezavimγambila muntu hata! Miya hita, umlawile mvikizi, uiγaie jiya tulo Mose alaγilizejo, kwa mbuli ya mpoza yako, jiwaγalukile uwona! 45Miya yuja akihalawa, azaandiila kubilikila koshe koshe na kuukula inu mbuli, azaleka, Yesu ashedahe kuingila mwe muzi cha sale, miya azaikala tanga hantu he ike ike. Wantu wazalawa kosheni, wazamtimila.

Currently Selected:

Maliko 1: KISHNT05

Highlight

Copy