Mateyo 28

Yesu afufuka.

1-10.

1Mushi wa sabato ukizinka, mhitu wakwe wa bosi kuke mazenganyizi Maliya Magadalene na yuja Maliya mtuhu wazahita kwa kaula ija mbila. 2Wakiolela, kuzazinka mdidimo mkulu, mlau ywa Zumbe azalawa mwe lwingu, azasheela, azabuia, azashindika jiya iwe, akibinda azajiikaila. 3Muntu akimwolela, afanana, viya ni lumuli, shuke zakwe zizaṅalisha sa kau. 4Waja waluγojo wazaingilwa ni woγa naye, wazaukwa ni vizingizo, wazahituka viya watefa. 5Yuja mlau azalonga waja wavyele angwe: Msheogohe inywi! Hambu nataila kuti: Mumlonda Yesu akontelweye mwe muti. 6Nkaho aha, hambu azafufuka, sa alongilevyo; izai, mwolele aha hantu, ndiho ailele! 7Hitai nguzu mγambile wahina wakwe kuti: azafufuka kwa wafilewo! Neamilongwele na Galileya, ne ndiko mumwone! 8Shivyo, nizavimiγambila. Wazafikauka haja he mbila na woγa ungi, kangi na nyemi nkulu; wazaγuluka, waviukwile wahina wakwe. 9Haja silai wazakintana na Yesu, azawaluγusha angwe: Mpeho na inywi! Waja wazaniubasha, wazadowa milundi yakwe, wazamkinila. 10Ne Yesu ahowati: Msheogohe! Hitai, muvibilikile wanduγu wangu, kangwe wahite Galileya! Ne ndiko wamone.

Waluγojo wa mbila watongomaziγwa.

11Wakihita, waluγojo kuṅwe wazahita na kaya, wazashimwela wavikizi wakulu vyoshe vionekevyo. 12Waja wazaunganana haṅwe na watawa, wazalonga njama, wazaivana kuγuwa feza nyingi, wazaziwainka waja washilikali, 13wazawaγamba: Longai kuti: Wahina wakwe wazaiza na kilo, wazabawa kimba chakwe, ishwi tiisisile. 14Ati ulongo wa inu mbuli wahita kwa bula kwa mtoza shi, ishwi netimdahe, inywi nkezemwone mbuli. 15Waja wazaγuwa ziya feza, wazaγoshola, sa watunyiγwevyo. Miya inu mbuli yashimwelwa kwa Wayuda mpaka lelo.

Yesu alaγiliza wahina, wabilikile kosheni.

16Waja wahina kumi na muṅwe wazahita Galileya kwe uja mulima, Yesu awalaγilizewo; 17wakimwona, wazamkinila, miya kuṅwe wazakalakasha. 18Yesu azawaizila, azawalonga angwe: Nizainkwa ufuṅwa woshe uko mwe lwingu na kunu shi. 19Hitai, mkaγalushe mbali zoshe wahina wangu mkiwabatiza mwe zina ja Tate na ja Ṅwana na ja Mpeho mṅazi, 20mkiwafuza kutozesha vyoshe, nimilaγilizevyo! Kaungi imi ni haṅwe na inywi mishi yoshe, mpaka inu shi ndiho ibindilizike.

Currently Selected:

Mateyo 28: KISHNT05

Highlight

Copy