Maliko 2

Yesu avyomhonya mtamu ywa pengene.

1-12.

1Mishi ikizinka, azaingila vituhu Kapelinaumu; vizaivika, kuti a mwe nyumba siku. 2Muzaunganana wantu wangi muno, nkawaliγanilwe nyumbai, hata kwe nkomela, azawabilikila mbulingwa. 3Kuzaiza wantu weleta mtamu ywa pengene, aiinulwe ni wantu wane. 4Wakishedaha kumubuza kwakwe kwa mbuli ya wantu wangi, wazapuchula ija nyumba, alimo, wakibinda kubovola wazasheleza lusazi, yuja mtamu alelemo. 5Yesu akiona mitozesheze yawe azamγamba yuja mtamu: Ṅwanangu, uhuza wako uzaushiγwa. 6Kuna watabaluwangwa, waiikale mumo, wazafanyanya mwe myoyo yawe kuγamba: 7Uyu muntu alonga zeze ivyoho? Atemweza Mulungu. Kuna mwedaha kuusha uhuza? So Mulungu ike du? 8Yesu azafikataila mwe moyo wakwe, kuti wazafanyanya ivyoho mwe myoyo yawe, ne ahowati: Nini mkifanyanya ivyoho mwe myoyo yenyu? 9Vihufu ni vihi: Kumγambila uyu mtamu ywa pengene kuti: Uhuza wako uzaushiγwa, haidu kuγamba: Inuka, uinule lusazi lwako, uhite? 10Miya mtaile kuti: Ṅwanangwa vwa muntu ana ufuṅwa kunu shi wa kuushiliza uhuza! 11Ne ahomlonga yuja mtamu ywa pengene: Nakuti iwe: Inuka, uinule lusazi lwako, uhite na kaya kwako! 12Viya du lushe azainuka, azainula lusazi lwakwe, azamlawa, woshe waiolele; ne wahoshentuka wosheni, wazamtogola Mulungu angwe: Kale hoshe nkataene ivyoho.

Mwa Lewi.

13-17.

13Vituhu azalawa, azabula kwe bahali, wantu woshe wazamtimila, azawafuza. Akianga kuja azamwona Lewi, ṅwana Alifeyo, aiikale he ngelu, azamuti: Nitongela! 14Ne ahoinuka akimtongela. 15Akija nkande mwe nyumba ya yuja Lewi, kuzaiza wangelu na wahuza wangi, wazaja haṅwe na Yesu na wahina wakwe; hambu wamtongelewo wazaγenela. 16Watabaluwangwa wa Kifaliseyo wakiona, kuti aja na wangelu na wahuza, wazawalonga wahina wakwe angwe: Kumbe aja, anywa na wangelu na wahuza? 17Yesu akiviiva azawati: Weikala ugima nkawaagiziγwa ni mγanga, ni waja wehuma; siizile niitange watanda, wahitule ntongonyezi zawe, niizile niitange wahuza.

Mbuli ya kufunga.

18-22.

18Wahina wa Yohana na Mafaliseyo ne wakifunga. Wazamwizila, wazamuti: Nini wahina wa Yohana na wa Mafaliseyo wakifunga, wahina wako wakishefunga? 19Yesu azawahitula angwe: Welalikilwa nteγuzi wadaha zeze kufunga, yuja ṅwenye nteγuzi wakeanga naye? Mishi waina ṅwenye nteγuzi nkawadaha kufunga. 20Miya mishi yaiza, ndiho ṅwenye nteγuzi nezeaushiγwe kwawe, mushi uja ne ndiho nezewafungile.

Shimo za ndame na mvinyo.

21Nkakuna mwegela ndame ya shuke ndala mwe nkazu shakazu; ati aγoshola ivyoho, ija ndame mpya yoshe itafikauka mwe ija nkazu shakazu, lushe langa jakwe ni kulu kuzinka jiya ja bosi. 22Kangi nkakuna mwegela mvinyo mwishi mwe mabene mashakazu; ati agela, uwo mvinyo mwishi utavusa yaja mabene, mvinyo utaitika, kangi mabene yohe yatabindilizika. Mvinyo mwishi ugelwa mwe mabene mahya.

Mbuli ya sabato.

23-28.

23Mushi azaanga kwe mbuwa za ngano mushi wa sabato, wahina wakwe wazaγenda wakidahula maiswa ya ngano. 24Ne Mafaliseyo wahomγamba: Olela! Nini wakiγoshola mushi wa sabato vishivyoγosholwa? 25Azawati: Nkamfyomile, Dawidi aγosholevyo, akikosa vya ja, akiluṅwa ni sala na weyae, awona nawo? 26Kuti azaingila mwe nyumba ya Mulungu kwa mvikizi mkulu Abiyatali, kuti azaja haho migate ya ntogolo yena ṅwiko kujiγwa ni wantu washiwo wavikizi, hata weyae, awona nawo, azawapangila? 27Azawati: Mushi wa sabato uikiγwe kwa mbuli ya muntu, miya muntu nkaikiγwe kwa mbuli ya mushi wa sabato. 28Kwa ivyoho ṅwanangwa ywa muntu ni zumbe ywa mushi wa sabato wohena.

Currently Selected:

Maliko 2: KISHNT05

Highlight

Copy