Luka 3

Yohana mubatizi abilikila mwe nyika.

1-18.

1Kaiza Tibeliyo akitoza uzumbe mavuli kumi na mashano, Pontiyo Pilato azatoza shi ya Yudeya, kangi Helode ni zumbe ywa Galileya, nduγuye Filipo ni zumbe ywa Ituleya na Tilakoniti, Lisaniya ni zumbe ywa Abilene, 2Ana na Kayafa ni wavikizi wakulu; mishi ija mulomo wa Mulungu uzamlawila Yohana, ṅwana Zakaliya, mwe nyika.

3Azaanga mwe shi zoshe ze nkanda nkanda ya muto wa Yolodani akibilikila ubatizi wa kuhitula ntongonyezi, kangwe uhuza uushiγwe, 4sa vigondiγwevyo mwe kitabu cha mbuli za mteγanyi Yesaya kuγamba: Kanwa cha mtakubilikila chaivika mwe nyika angwe: Liγanyai sila ya Zumbe na kuγolosheza aho, ndiho agwile! 5Vikolongo vyoshe vimemeziγwe, vilima na vituli vyoshe vipunguziγwe, hehotoka haγololwe, hashiholiγanana haliγanyanyiγwe! 6Vyoshe vye moyo vione uvunizi wa Mulungu! 7Waja wantu wangi walawilewo, wabatizwe ndiye, azawati: Wana nyoka inywi! Amionyesheye kuti: Mtazanyilika mayangwa, ndiyo yalawile, ni ndai? 8Tendai kuwo jeivana na kuhitula ntongonyezi! Msheandiile kulonga mwe myoyo yenyu kuti: Tina tate yweshu Abulahamu! Hambu namiti: Mulungu adaha kumwinulila Abulahamu wana mwe aya mawe. 9Miti iiteγanyiziγwe hoya nkoloi, kila muti ushiwovyaia matunda matana utakelwa, utatambikwa na mwe moto. 10Waja wantu wazamwuza angwe: Titende zeze? 11Azawahitula angwe: Mwena fulana mbili amupangile yuja ashinaye! 12Kangi mwena nkande aγoshole sa ivyoho! Hata wangelu wazaiza, wabatizwe ndiye, wazamγamba: Mfuzi, titende zeze ishwi? 13Azawati: Msheshanguze kuzinka haja muholaγiliziγwa! 14Hata washilikali wazamwuza angwe: He ishwi, titende zeze? Azawati: Msheshentushe mimtu na kumtunguluka! Musheṅune kwa mbuli ya upokezi wenyu.

Uwona wa Yohana.

15Wantu wakiafiza, ndivyo mbuli ya Yohana ibontoke, woshe wakifanyanya mwe myoyo yawe kuγamba: Minga ni Kilisito, 16Yohana azawalandula waja woshe angwe: Imi nimibatiza na mazi; miya kwaiza mwenizinka nguvu, kwa udodo wangu nkaviniagiza, nikiinama, nimzaγawile mikowa ya vilatu vyakwe. 17Yuja atazamibatiza na mpeho ṅazi na moto. Mwe mkono wakwe aitozize kihetelo, aṅaze twelo jakwe ja ngano; mshele atauingiza mwe ikilo jakwe, miya makanka atayaoka na moto ushizimawo. 18Ne abilikilevyo mbalingwa na kuishunda na mbuli nyingi ntuhu. 19Hata zumbe Helode azabunkulwa ndiye kwa mbuli ya Helodiya, mkaza nduγuye, na kwa mbuli mbada zoshe ntuhu, 20aγosholezo vivyoho, azaongeza mbuli kuti azamgela Yohana mwe chumba.

Yesu abatizwa.

21-22.

21Haja wantu woshe wakibatizwa, Yesu yohe azabatizwa; lushe akivika, lwingu luzazuγuka, 22mpeho mṅazi azasheela aiγwile ṅwili, viya ni wa suwa, izamwikaila, kangi kanwa chizalawa mwe lwingu angwe: Iwe u ṅwanangu, niyekukundisha; natamilwa ni weyo.

Wakale wa Yesu.

23-28.

23Yesu akiandiila ndima yakwe aibindile mavuli milongo mitatu, azafanyanyiγwa kuti: Ni ṅwana Yosefu, ṅwana Eli, 24ṅwana Matati, ṅwana Lewi, ṅwana Meleki, ṅwana Yanai, ṅwana Yosefu, 25ṅwana Matatiya, ṅwana Amosi, ṅwana Nahumu, ṅwana Esili, ṅwana Nagayi, 26ṅwana Mahati, ṅwana Matatiya, ṅwana Simeyi, ṅwana Yoseki, ṅwana Yoda, 27ṅwana Yohanani, ṅwana Lesa, ṅwana Zelubabeli, ṅwana Seyalitiyeli, ṅwana Neli, 28ṅwana Meleki, ṅwana Adi, ṅwana Kosamu, ṅwana Elimadamu, ṅwana Heli, 29ṅwana Yesu, ṅwana Eliyeza, ṅwana Yolimu, ṅwana Matati, ṅwana Lewi, 30ṅwana Simeyoni, ṅwana Yuda, ṅwana Yosefu, ṅwana Yonamu, ṅwana Eliyakimu, 31ṅwana Meleya, ṅwana Mena, ṅwana Matata, ṅwana Natani, ṅwana Dawidi, 32ṅwana Yese, ṅwana Obedi, ṅwana Bowazi, ṅwana Salimoni, ṅwana Nahasoni, 33ṅwana Aminadabu, ṅwana Alamu, ṅwana Hesiloni, ṅwana Pelesi, ṅwana Yuda, 34ṅwana Yakobo, ṅwana Isaka, ṅwana Abulahamu, ṅwana Tala, ṅwana Naholo, 35ṅwana Selugu, ṅwana Leγuwu, ṅwana Pelegi, ṅwana Ebeli, ṅwana Sala, 36ṅwana Kenani, ṅwana Alipakasadi, ṅwana Semu, ṅwana Nowa, ṅwana Lameki, 37ṅwana Metusela, ṅwana Henoki, ṅwana Yeledi, ṅwana Mahalaleyeli, ṅwana Kenani, 38ṅwana Enosi, ṅwana Seti, ṅwana Adamu, ṅwana Mulungu.

Currently Selected:

Luka 3: KISHNT05

Highlight

Copy