Luka 13

Wahuza kuzinka ni wahi?

1Mishi ija kuna wamγambilewo mbuli ya waja Wagalileya, Pilato aγwilewo mpome yawe akiivanganya na ija ya ṅombe za mviko. 2Azawalandula angwe: Kumbe muγamba: Waja Wagalileya ni wahuza kuzinka Wagalileya woshe, kwa kuti wazaγoshwelwa ivyoho? 3Namiti: Sivyo! Miya mkishehitula ntongonyezi zenyu, nyoshe nezemubanike sa viyaho. 4Hambu waja kumi na mnane washuntiγwewo ni mnala kuja Silowa na kukoṅwa, muγamba kuti: Ni wamasa kuzinka wantu woshe weikala Yelusalemu? 5Namiti: Sivyo! Miya mkishehitula ntongonyezi zenyu, nyoshe nezemubanike sa viyaho.

Lushimo lwa mkuyu.

6Azawalonga ulu lushimo: Kuna muntu ahandileye mkuyu mwe mγunda wakwe, aakahita kwa londa nkuyu, miya nkaonela. 7Ne ahomlonga mulima mγunda: Olela! Mavuli matatu nizaiza nikilonda nkuyu mwe unu mkuyu, miya siziona; uukele! Ufinta wai mγunda? 8Yuja azamlandula angwe: Zumbe, uuleke iji vuli du, niutibwile, niugele masinku, ati inga uvyale mishi ye nyuma! 9Ati washevyala vivyoho, utadaha kuukela.

Yesu ahonya mvyele mushi wa sabato.

10Azaikala akifuza vikiloi mushi wa sabato. 11Ne mwina mvyele mwena mpepo imhumizeyo mavuli kumi na mnane, azakikunga, nkadahile kuγolokela hata. 12Yesu akimwona azamlonga angwe: Mlala, uzabinda kuukilwa ni utamu wako; 13azamubadikila mikono, viya du lushe mγongo uzaγolokela, azamtogola Mulungu. 14Mkulu ywa vikilo azalandula; hambu azaihilwa, kuti Yesu azamhonya mushi wa sabato, azawati waja wantu: Kuna mishi mtandatu yeagiza kuγoshola ndima; mishi ija izai, muhonyiγwe, muvileke mushi wa sabato! 15Zumbe azamlandula, azamuti: Mwahemba inywi! Nkamshungula inywi nyoshe mushi wa sabato ṅombe na mpunda zenyu he lubala lwa jiila, mkiziiγala kwa zinywesha? 16Uyu mvyelengwa ni ṅwana Abulahamu, Satani azamshunga mavuli kumi na mnane, lushe nkaviagiza, luja luγole akilushungwilwa mushi wa sabato? 17Akilonga ivyoho, woshe wamkezilewo nkani wazabulwa ni shoni, miya wantu woshe wazatamilwa ni viya vitana viγosholwevyo ndiye.

Lushimo lwa mvumo.

18-21.

18Ne aholonga: Uzumbe wa Mulungu ufanana na mbwai? 19Niufanyanye na mbwai? Ufanana na kahuluzi ka ntunda ya mvumo, muntu akikaγuwa, akikahanda mwe mγunda wakwe, kakula, kaγaluka muti, hata madeγe yeanga ulanga yaiza, yazenga mwe matambi yakwe.

Shimbi.

20Vituhu azalonga: Uzumbe wa Mulungu niu 21fanyanye na mbwai? Ufanana na shimbi, mvyele akijiγuwa, akijigela mwe ngahu ntatu za mushu wa ngano, kangi mushu woshe wajikolela.

Nkili shishili.

22Azaanga mwe mizi mikulu, hata mwe mizi tanga na kubilikila, ni aho akiiamba na Yelusalemu. 23Kuna amlongileye: Zumbe, kumbe wevunilwa ni waγeke du? Azawati: Gombai, mwingile mwe ija nkili finyu! 24Hambu namiti: Wangi newalonde ha ingiila, miya nkewahakombaγanye. 25Aho ndiho ṅwenye nyumba abindile kuinuka na kuzuγala luvi, ne ndiho nezemwandiile kuγoloka se na kugoṅonda kuti: Zumbe, tizuγwile! Miya atamilandula, atamiti: Simitaila, mkoanduka nako. 26Ne ndiho nezemwandiile kulonga kuti: Tizaja, tizanywa, uitiolele, kangi uzatifuza lwazoi kwetu. 27Atamilandula kuti: Sitaila, mkoanduka nako. Ukai kwangu nyoshe! Mu wandima wawiwi! 28Ne ndiho mulilile na kukemeza meno mkizamwona Abulahamu na Isaka na Yakobo na wateγanyingwa woshe, wai mwe uzumbe wa Mulungu, miya wenye nemshindikwe na se! 29Kangi kutaiza wantu weanduka kwelawa zuwa na kweingila zuwa na kwegwila zuwa mishi ya nyota na kwegwila zuwa mishi ya vuli, waikale, waje nkande mwe uzumbe wa Mulungu. 30Kangi kuna washilikizewo, ndiwo walongole; kangi kuna walongolewo, ndiwo washilikize.

Helode.

31Ija minga kuzaiza Mafaliseyo kuṅwe, wazamuti: Lawa kunu, uhite! Hambu Helode akunda kukukoma. 32Azawati: Hitai, mkaγambile jiya gogo: Olela! Nikeingata mpepo, nikebindiliza ndima ya kuhonya watamu lelo na keloi, miya mushi wa ntatu mbuli zangu zabontoka. 33Kangi lelo na keloi na kishindo shuti nitambe! Kangi nkavidahikana, mteγanyingwa akikoṅwa kutuhu, kushima Yelusalemu.

Yelusalemu.

34-35.

34Yelusalemu! Yelusalemu! Wakoma wateγanyingwa, watumiγwewo na kwako, wawahomela mawe! Ni kangahi, nikikunda kuunganyanya wanawo, sa viyaho nguku ivyounganyanya visiyo mwe mawawa yakwe, miya inywi mzalemela! 35Shivyo, nyumba zenyu neziashiγwe mahuzu! Namiti: Nkezemunione, mpaka ndiho nezemulonge: Atogolwe mweiza mwe zina ja Zumbe!

Currently Selected:

Luka 13: KISHNT05

Highlight

Copy