Luka 14

Yesu amhonya mtamu ywa bumbwazi mushi wa sabato.

1Mishi ija akiingila mwe nyumba ya mkulu ywa Mafaliseyo mushi wa sabato, aje nkande, waja wazamγojaγoja. 2Muja alimo muna muntu mwehuma bumbwazi. 3Yesu azawalonga watamulomongwa na Mafaliseyo, azawati: Vina ṅwiko kuhonya mushi wa sabato, hambu nkavina? Waja wazaleka lwashu. 4Azamγuwa, azamhonya, azamshungula. 5Waja azawati: Kwenyu kuna mwena ṅwanae ao du ṅombe, ikikina mwe kishima, ndiye ashefikeilavya, hata ni mushi wa sabato? 6Aho nkawadahile kumlandula.

Muntu atende moyo mdodo.

7Waja walalikwewo azawazisa lushimo akiona, wavyokundisha kuikala hantu ha kushimilwa, azawati: 8Ukilalikwa nimuntu kwe nteγuzi usheikale hantu ha kushimilwa, kangwe kusheoneke alalikweye mweagiza kugimbikwa kukuzinka iwe, 9kangwe kusheize yuja akulalikeye iwe na yuja ṅwiyawo akikuti: Mhakanye uyu! Ne utaandiila kuikala na shoni hantu ha shilikiza. 10Miya ukilalikwa hita, uikale ha shilikiza, kangwe kukiiza akulalikeye akuγambe: Ṅwiyangu, shweza na kenya! Ne utagimbikwa, woshe waikalewo haja waiolele. 11Hambu kila mwekikuza ṅwenye atazapunguziγwa kangi mwekipunguza ṅwenye atazakuziγwa.

12Azamγamba yuja amlalikeye: Iwe ukikaliγanya nkande za waγeni, ati ni za makelo, ati ni za ṅwiyaγulo, ushelalike wambuyawo na wanduγu wako na wazuli weyawo, kangwe wohe washekulalike vingi, ukilihiγwa ndiwo! 13Miya ukikaliγanya nkande za waγeni lalika wakiwa na wavilema na washiγendawo na matuntu! 14Nezeuone nyemi, kwa kuti nkawana vya kukuliha; hambu utazalihiγwa mwe ufufuki wa watanda. 15Waja waikalewo haṅwe naye ṅwiyae ywawe muṅwe akiiva izi mbuli azamγamba: Mwe nyemi ni yuja, ndiye aje nkande mwe uzumbe wa Mulungu!

Lushimo lwa mlaliko mkulu wa nkande.

16-24.

16Azamuti: Muntu azaliγanya nkande nyingi za waγeni, azalalika wangi. 17Ha jiila nkande hakikinta, azatuma mubwanga ywakwe, alonge waja walalikwewo kuti: Izai! Hambu vyoshe viiliγanile. 18Woshe kiṅwe wazaandiila kulandula; ywa bosi azamuti: Nizaγula γisa, shuti nihite, nijiolele; nakuhembeleza, ushenikaalize! 19Ṅwiyae azalonga: Nizaγula ṅombe kumi za hunila magali, nahita, niziolele; nakuhembeleza: Ushenikaalize! 20Mtuhu azaγamba: Nizaγuwa mvyele; kwa ivyoho sidaha kuiza. 21Yuja mubwanga azauya, azavimwukwila baba yakwe. Ne yuja zumbe ahokwelwa ni maya, azamγamba mubwanga ywakwe: Lawa nguzu, uhite kwe nyazo na kwe ndumi za muzi, ulete wakiwa na wavilema na matuntu na washiγendawo na kunu! 22Vikibontoka, yuja mubwanga azamlonga: Zumbe, ulaγilizevyo vizabontoka, miya nyumba nkaimemile. 23Yuja zumbe azamγamba mubwanga ywakwe: Lawa, uhite kwe sila na nkoi, uwakungumize, waingile, kangwe nyumba yangu imeme! 24Hambu namiti: Waja waγoshi, ndiwo wakilalikwa, nkakuna ndiye aje nkande zangu.

Ndivyo muntu amtongele Yesu.

25-27.

25Wantu wangi muno wazahita naye, azawahitukila, azawati: 26Ati muntu aiza kwangu akishemshwika ishe na nine na muke na wanae na wakuluwe na wanduγuze na walumbuze, haṅwe na kukishwika ṅwenye, nkadaha kuγaluka mhina ywangu. 27Ashiyeinula muti wakwe wa kukomelwa akinitongela, nkadaha kuγaluka mhina ywangu. 28Hambu kwenyu kuna muntu mwekunda kuzenga geleza, ashineikala akitala mali yakwe, ati ana ya kujibindila? 29Kangwe akibinda kukontela shikamilo lushe akishedaha kubontola, woshe weviona washezaandiila kumluvya kuti: 30Uyu muntu azaandiila kuzenga, miya nkadaha kubindiliza. 31Hambu kuna zumbe mwekunda kumwiγaila zumbe mtuhu nkondo, ashineikala na kufanyanya, ati wantimizi wakwe makulija kumi adaha kumwomanya nawo yuja mwemtimila na wantimizi makulija milongo mili? 32Ati nkadaha, atamtumila yuja, ake hale, walau amhembeleze, waivane. 33Vivyoho hata inywi nyoshe, ndiye ashetowe hulu viya vyakwe vyoshe, nkadaha kuγaluka mhina ywangu. 34Munyu ni mtana; miya ati munyu wabanika, utazifiγwa na mbwai? 35Nkautama, ukigelwa mwe lubuwa ao du mwe masinku, utaashiγwa du. Mwena mashikilo yeiva neaive!

Currently Selected:

Luka 14: KISHNT05

Highlight

Copy