Luka 12

Shimbi ja Mafaliseyo.

1-9.

1Wantu wangi muno, makulija na makulija, wakiunganana wazabuza kujatilana; azaandiila kulonga na wahina wakwe angwe: Kiγojeshei kwa mbuli ya shimbi ja Mafaliseyo, ni kuhemba kwawe! 2Hambu nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishetailwe. 3Kwa ivyoho mulongilevyo he lwiza, nezeviivike he langaila; kangi viya, muvyonoṅonezanya nyumbai mwe mashikilo, nezevibilikilwe lwazoi.

Mweagiza kuogohiγwa.

4Inywi wambuyangu namiti: Msheogohe waja wekoma ṅwili du! Hambu wakibinda nkawana, ndivyo wadahe kuγoshola vingi. 5Miya nitamionyesha, ndiye mumwogohe. Mwogohei yuja mwekoma, kangi akibinda ana ufuṅwa wa kushindika na kuzimu! 6Kweli namiti: Uyu mwogohei! Vikwele vishano nkaviγulwa na centinne? Kangi ṅwiyae ywawe muṅwe du nkajazilwe ni Mulungu. 7Hata swili za mitwi yenyu zoshe ziitazilwe. Msheogohe! Inywi mwazinka vikwele vingi. 8Namiti: Ndiye nezealonge cha sale kwa wantu, kuti ni ywangu, ṅwanangwa ywa muntu yohena nezealonge cha sale kwa walau wa Mulungu kuti: Uyu ni ywangu. 9Miya ndiye nezeanitowe hulu kwa wantu, atazatowiγwa hulu kwa walau wa Mulungu.

Uhuza ushiwoushiγwa.

10Kila ndiye nezeamubishize ṅwanangwa ywa muntu nkani, atadaha kuviushiliziγwa; miya ndiye aeze Mpeho mṅazi, nkezeaushiliziγwe. 11Aho ndiho wamiingize mwe mavikilo na mwe vitala na bomani, msheone sungu kwa mbuli ya mikanile na ya milandwile! 12Hambu Mpeho mṅazi atamihinya ija minga milongele yeagiza.

Lushimo lwa mzuli mdashi.

13Waja wantu we haja muṅwe azamγamba: Mfuzi, mulonge mkulu, apange ufa na imi! 14Miya azamuti: Ṅwiyangu, anigimbikeye mlaha masa na mupanga ufa ni ndai? 15Azawati: Kiolelei na kuγojesha kwa mbuli ya mumelo woshe! Hambu ugima wa muntu nkauanduka mwe kuγenyeza kitende. 16Azawazisa lushimo angwe: Kuna muntu mzuli, mbuwa zakwe zizalozoka. 17Azafanyanya mwe moyo wakwe kuγamba: Nitende zeze? Hambu sina, ndimo niumbikile nkande zangu. Azaγamba: Niγoshole ivyoho: 18Nichakule maikilo yangu ya nkande, nizenge makulu kuzinka aya! Ne ndimo niumbikile ngano zangu na vitana vyangu vyoshe; 19niuγambe moyo wangu: Moyo wangu, una vitana vingi, viikilwe vya mavuii mangi; unahema, uje, unywe, utamilwe! 20Miya Mulungu azamut: U mdashi iwe! Kilo cha lelo neuhokwe moyowako! Lushe, viya uliγanyevyo, nevihite na ndai? 21Ne mbuli ya muntu mwekiumbikila ṅwenye ivyoγenda, ashiye mzuli kwa Mulungu.

Sungu za bule.

22-31.

22Azalonga wahina wakwe angwe: Ne vyeleka nikimiti: Msheje sungu kwa mbuli ya ugima wenyu kuγamba: Tijei? ao kwa mbuli ya mili yenyu kuγamba: Tizwikei? 23Hambu ugima ni ukulu kuzinka nkande, ṅwili ni mkulu kuzinka shuke. Olelai makungulu! 24Nkayahanda, nkayaluka, nkayaika mako ao ntiγili, kangi Mulungu ayashuγa yoshe. 25Inywi nkamzinka madeγe hakulu? Kwenyu kuna muntu mwedaha kuongeza mishi yakwe kahindi kaṅwe du na kupikapika kwakwe? 26Ati ivi vidashi ṅwenye nkamvidaha, viya vituhu muvipikilai? 27Olelai vititi vivyokula! Nkavihanda makonge, nkaviluka shuke nayo; miya namiti: Hata Salomo aγenyezeye utana weinga haja nkavutile sa ivi ṅwiyae ywawe muṅwe. 28Ati Mulungu avutila ivyoho mani ya tunduwi yeikala lelo, kangi keloi yaashiγwa mwe moto, asheisiize kumivutila inywi? Nini mkishetozesha vyedi? 29Inywi mshelonde, ndivyo muje, kangi ndivyo munywe! 30Kangi mshetendwe ni wasiwasi! Hambu ivi vyoshe wamzimu wa inu shi ne wevilonda, miya ishe ywenyu ataila, kuti mwaagiziγwa ndivyo. 31Miya londai uzumbe wakwe! Ne ndivyo mwinkwe viya vyoshe. 32Usheogohe, iwe kafyo kadodo! Hambu ishe ywenyu atamilwa ni kuminka uja uzumbe.

Mali ya kweli.

33-34.

33Taγai viya, muvyona navyo, muviinkile kwa mbazi du! Kiγoshwelei misipi ishiyoshakala, mtende mali mwe lwingu ishiyobaiγwa, hambu ne kushikobulwa ni mubavi, ne kushikojiγwa ni visaga. 34Hambu mali yenyu iliho, ne myoyo yenyu iliho.

Gonai mesho.

35-46.

35Ikalai mwikikantile! Kangi lekai, taa zenyu ziake! 36Hambu mwafanana na wantu wemwafiza zumbe ywawe, ndiho auye kwe nteγuzi, kangwe, ahoizila akigoṅonda, wafikemzuγwila. 37Waja wapuna wataona nyemi, zumbe awozabwila, wakigona mesho. Kweli namiti: Atakikanta, miya waja atawaikaza ha jiila nkande, aize, awatumikile. 38Ati aiza na luγojo lwa mbili ao lwa ntatu lwa kilo, ati awabwila ivyoho, waja wataona nyemi. Miya ivi vitailei! 39Ati ṅwenye nyumba ataila, mubavi ndiho aizile, anga nkaleka, nyumbai mwakwe mukibaiγwa. 40Hata inywi kiteγei! Hambu ṅwanangwa atazaizila, mshihomwafiza.

Mpuna mkweli na mlongo.

41Angwe ni Petelo: Ulu lushimo ululonga ishwi, hambu wantu woshe? 42Angwe ni Zumbe: Mγolokezi mkweli mwena viyuγo, baba yakwe akimgimbika mγolokezi ywa wandima wakwe, awainke nkande, zihokateγana naho ni yuhi? 43Mupuna mwena nyemi ni yuja, baba yakwe ayemubwila, akiγoshola ivyoho, ndiho alawile. 44Kweli namiti: Atamgimbika, aγolokele viya vyakwe vyoshe, avyona navyo. 45Miya ati yuja mupuna afanyanya mwe moyo wakwe kuγamba: Baba yangu nkeaize nguzu, kangi akiandiila kutowa waja wabwanga na wandele, akija, akinywa, mpaka atengele, 46baba ya yuja mupuna atazalawila mushi, ashiwomwafiza, atazaiza, ashihotaila, ne atamkoma na shime, amlavye nyazu mbili, amunke upokezi wakwe haṅwe na waja washitozeshawo. 47Yuja mupuna ataileye, baba yakwe avyokunda, kangi nkakihimile kuviγoshola, nkavibontole, yuja avyokunda, atatowiγwa vibonko vingi. 48Miya yuja ashitaileye akiγoshola vyeagiza kutowiγwa, atatowiγwa vibonko viγeke. Kila ainkiγweye vingi, atazatiγilwa vingi, kangi alaγiliziγweye vingi yuja ataisiiza kuuziγwa. 49Niizile, nitunge moto mwe inu shi, kangi sina nivyokundisha kuzinka ukifikabililika. 50Nina ubatizi, ndiwo nibatize nawo, kangi nalumila vyeinga aha, mpaka ukibontoka.

Yesu aleta mipangano.

51-53.

51Muγamba: Ṅiizile kwa gwisha utondolo kunu shi? Sivyo, namiti: Neniγenyeze mipangano. 52Hambu kuandiila ivi lushe wantu washano we mwe nyumba ṅwenga newapangane, watatu newapangane na weyae wawe waili, waili newapangane na weyae wawe watatu. 53Hata ishe na ṅwanae ywa kiγoshi, kangi ṅwana ywa kiγoshi na ishe, nine na ṅwanae ywa kivyele, kangi ṅwana ywa kivyele na nine, nine vyala na mkaza ṅwanae, kangi mkaza ṅwana na nine vyala watapangana. 54Waja wantu woshe azawati: Ndiho mwone, zunde jikikwela kuja, zuwa jikoingila, mwatikalonga kuti: Fula yaiza, kangi vyabontoka vivyoho. 55Ndiho hakunte mpeho yelawa na kuja, kwegwila zuwa mishi ya vuli, mwaγamba: Nekuake zuwa, kangi vyabontoka vivyoho. Mwahemba inywi! 56Vya inu shi na vya lwingu vivyobontoka, mwataila kuvibunkula, miya ni vivihi, mkishebunkula, vya mishi inu vivyobontoka? 57Wenye nkamlaha masa yeagiza? 58Hambu ukihita kwa zumbe haṅwe na ṅwiyao mwekuifya, uko silai upishe, ndivyo uivane naye, kangwe ashezakuhuna kwa mlaha masa, yuja mlaha masa akikuinkila kwa mshilikali, yuja mshilikali akikugela mwe chumba! 59Nakuti: Nkezeumulawe muja, shuti uneliha hata senti ya kubindiliza.

Currently Selected:

Luka 12: KISHNT05

Highlight

Copy