Luka 1

Mbuli ya Luka.

1Wangi wazaγeza kugonda utamulizi wa ziya mbuli zibontokezo kwetu; 2wazatongelatongela viya tivyoinkwa ni waja wavienewo wenye, viya viandiilevyo, hambu ne wai waluγojo wa mbulingwa. 3Lushe nami nizavidosa na utanda, sa viyaho viγendilevyo, nikibinda nizakunda kuvikugondela, iwe mbuyangu Teyofilo, 4kangwe utaile, kuti ziya mbuli ufuziγwezo ni za kweli.

Zakaliya na Elisabeti.

5Mishi ija, Helode akitoza uzumbe wa Yudeya, kuna mvikizi, zina jakwe ndiye Zakaliya, ni ywa bumba ja kivikizi ja Abiya; muke ni ywa chengo cha Aloni, zina jakwe ndiye Elisabeti. 6Woshe waili, Mulungu akiwaolela, ni watanda, hambu wazaanga na milaγilizo yoshe na utanda woshe wa Zumbe; ne waishina kilango kibada. 7Awa mishi yoshe nkawana ṅwana, hambu Elisabeti ni mγumba, kangi woshe waili mishi yawe izaγenela. 8Bumba jakwe jikibulilwa ni lupondo, ne ahobasha iyo ndima ya kubinda mviko he mesho ya Mulungu. 9Kwa msimo wawe wa kivikizi azatalwa ni kuvunkiza, azaingila mwe vikilongwa ja Zumbe; 10miya bumba joshe jawantu ji uko se, wazavika ija saa ya kuvunkiza. 11Mlau ywa Zumbe azamlawila, azaγoloka kulume he okelo ja uvumba. 12Zakaliya akimwona azawewa, azaingiiwa ni woγa. 13Miya yuja mlau azamuti: Usheogohe, Zakaliya! Hambu mihembelezeze yako izaiviγwa, mkaziyo Elisabeti neakuvyaile ṅwana, zina jakwe umwitange Yohana! 14Iwe utaona nyemi, utatowa mazumo, kangi wantu wangi watatamilwa ni kuvyalwa kwakwe. 15Hambu atamkulila Zumbe, ashenywe mpombe na vyoshe vyetengeza, agise mpeho ṅazi, ndiho nezeavyailwe ni nine, 16ahitule wana Isilayeli wangi na kwa Zumbe, Mulungu ywawe. 17Ṅwenye atamlongwela na mpeho na nguvu ya Eliya, adahehitwila wana myoyo ya waishe zawe, ahitule wapapala, waγuwe viyuγo vya watanda, amliγanyize Zumbe mbali ya wantu wekiteγa. 18Zakaliya azamγamba yuja mlau: Inu mbuli niitaile zeze? Hambu imi ni mγundu, hata mkazangu mishi yakwe izaγenela. 19Yuja mlau azamhitula angwe: Imi ni miyo Gabuliyeli, niangila he mesho ya Zumbe, nizatuṅwa kwa kuγambila iwe, nikubilikile inu mbuli ya nyemi. 20Olela, neuγaluke bubu, nkoudahe kulonga mpaka uja mushi, viya vikizabontoka, kwa kuti nkutozeshe mbuli zangu zeunga kuhontoka mishi yawe. 21Miya wantu wazaikala na kumwafiza Zakaliya, wazamaka, kuti azunganya muja mwe vikilongwa. 22Akilawa nkadahile kulonga nawo, ne wahotaila, kuti kuna aenevyo muja vikiloi. Ṅwenye azawakonyeza, kangi azaikaia ai bubu vivyoho. 23Mishi ya uvikizi wakwe ikimambuka, azahita na kwakwe kaya. 24Mishi ija ikizinka muke Elisabeti azatenda nda, azakifisha myezi mishano, angwe: 25Zumbe azaniγoshwela ivyoho mishi inu akiniolela, aniushe shoni kwa wantu.

Mlau Gabuliyeli amlawila Maliya.

26Myezi mtandatu ikizinka, mlau Gabuliyeli azatuṅwa ni Mulungu kwe muzi wa Galileya weitangwa Nazaleti 27kwa mndele alombiγweye ni mγoshi mweitangwa Yosefu, ni ywa chengo cha Dawidi; yuja mndele zina jakwe ndiye Maliya. 28Akiingila mwakwe azamluγusha angwe: Mpeho na iwe ufilwewo mbazi! Zumbe a haṅwe na iwe uṅaziγwewo mesho kuzinka wavyele watuhu. 29Yuja azashentuka inu mbuli akifanyanya kuγamba: Ni tulo ani iji? 30Yuja mlau azamuti: Usheogohe, Maliya! Hambu uzaonelwa mbazi kwa Mulungu. 31Olela, neutende nda, uvyale ṅwana ywa kiγoshi! Zina jakwe umwitange Yesu! 32Uyu neaγaluke mkulu, neaitangwe Awanangwa ywa yuja mwe uko ulanga; kangi Zumbe Mulungu nezeamunke kiti cha ishe Dawidi, 33atoze uzumbe wa kolwa ja Yakobo kale na kale, 34uzumbe wakwe nkeutende mhelo. Maliya azamhitwila yuja mlau kuγamba: Vitabontoka zeze? 35Hambu sitaila mγoshi? Yuja mlau azamlandula angwe: Mpeho mṅazi atakuizila, nguvu ya yuja mwe uko ulanga itakuγubika, viya ni zunde; kwa ivyoho yuja, ndiye avyalwe ni weyo, ataitangwa mṅazi, kangi ṅwana Mulungu. 36Olela, mnduγu ywako Elisabeti yohe ana nda ya ṅwana ywa kiγoshi na uγundu wakwe; 37unu ṅwezi ni wakwe wa mtandatu, kangi ne akiitangwa mγumba. Hambu nkakuna mbuli ishiyodahikana kwa Mulungu. 38Maliya azaitikila angwe: Shimi mndelengwa ywa Zumbe! Viya ulongilevyo vinibontokele! Ne yuja mlau ahouka kwakwe.

Maliya amluγusha Elisabeti.

39Mishi ija Maliya azainuka, azakanyahita kwe milima, kwe muzi wa Yudeya, 40azaingila mwe nyumba ya Zakaiiya, azamluγusha Elisabeti. 41Elisabeti akiiva tulo ja Maliya, ṅwana azakuntula mwe ifu jakwe, 42ne Elisabeti ahomemeziγwa mpeho ṅazi, azalonga na kanwa kikulu angwe: lwe neutogolwe kuzinka weyao, 43vivyoho hata ṅwana, ndiye umvyale, atazatogoleshiγwa. Ivi vi zeze, nine ja Zumbe ywangu akiiza na kwangu? 44Hambu olela: Tulo jako jikiiviγwa ni mashikilo yangu, ṅwana azakuntula mwe ifu jangu kwa nyemi. 45Neuone nyemi, kuti uzatozesha! Hambu viya ulongiγwevyo ni Zumbe nevibontoke!

Maliya atogolesha.

46Angwe ni Maliya: Moyo wangu wamtogola Zumbe, 47kuti ni mkulu, mpeho zangu zamtowela Mulungu, mhonya ywangu, zumo. 48Hambu azaolela udodo wa mndele ywakwe, hambu niyaona: 49Kuandiila ivi lushe makolwa yoshe yatakiombola na imi. 50Yuja mnguvu azaniγoshwela vikulu; zina jakwe ni ṅazi. 51Mbazi yakwe ni ya kale na kale kwa waja wemwogoha. Aγoshola vye nguvu na mkono wakwe, 52aasakanya waja wehikuka na ntongonyezi za myoyo yawe. 53Wanguvu awabusha na kuwashindika mwe viti vyawe vya kizumbe, agimbika wakiwa; wena sala awaγenyezeza vitana, wazuli awaheleza bule. 54Ṅwanae Isilayeli amupikila akifukila mbazi zakwe, 55sa alongilevyo watate zeshu wa Abulahamu na mbeleko yakwe kuti: Neitende ya kale na kale. 56Maliya azaikala naye myezi mitatu, akibinda azaγotoka na kwakwe kaya.

Yohana avyalwa.

57Elisabeti, mishi yakwe ikitimiza, azavyala ṅwana ywa kiγoshi. 58Wahundo weyae, na wanduγu wakwe wakiiva, kuti Zumbe azamfila mbazi nkulu, wazatamilwa haṅwe naye. 59Mushi wa mnane wazaiza kwa shenga kaja kazana, wazakaitanga na zina ja ishe Zakaliya. 60Miya nine azawalandula angwe: Sivyo, shuti aitangwe Yohana! 61Wazamuti: Kangi mwe nduγu yako nkakuna mweitangwa ijo zina. 62Wazamkonyeza ishe, atiakunda, ailangwe zinaani. 63Azalombeza kabala, azagonda angwe: Zina jakwe ndiye Yohana. Woshe wazavimaka. 64Viya du lushe azashungwilwa kanwa na lulimi, azalonga na kumtogola Mulungu. 65Woshe weikala hehi hehi nawo wazaingilwa ni woγa, mwe milima yoshe ya Yudeya izi mbuli zoshe zizashimwelwa; 66woshe waziivilewo wazaziika mwe myoyo yawe angwe: mbuli ya aka kazana nezeihite kwa bontokela hi? Hambu mkono wa Zumbe uzakaγolokela.

Zakaliya atogola.

67Ishe Zakaliya azamemeziγwa mpeho ṅazi, azalonga na kuteγanya angwe: 68Atogolwe Zumbe. Mulungu ywa Isilayeli, kuti azalawila mbali yakwe na kuionela ukombozi. 69Azatishimikila guṅunda ja uvunizi mwe chengo cha ṅwanae Dawidi, 70sa alongavyo kale na vyanwa vya wateγanyi waṅazi. 71Ativunila kwa wankulu wetu na mwe mikono ya waja woshe wetishukiza, atifila mbazi haṅwe na watate zeshu, 72afukila kilaγa chakwe kiṅazi na ija mikilishize, 73akihshizeyo nayo kwa tate yweshu Abulahamu kuγamba: 74Tivunilwe mwe mikono ya wankulu wetu, tiikale kishiwoγa na kumtumikila mishi yetu yoshe, 75tiγaluke waṅazi wetenda utanda wemtamila! 76Miya iwe kazana, utaitangwa mteγanyi ywa yuja mwe uko ulanga, 77ulamlongwela Zumbe na kumlulila sila yakwe; nezeuleke, wantu wa mbali yakwe wataile kuti: Uvunizi wawe uanduka mwe kuushiliziγwa uhuza wawe. 78Tikiviona iviho, ni kwa ungi wa utungu wa Mulungu ywetu; unu ne weleka, 79tikilawilwa ni langaila jeanduka uko ulanga, jimulikile waja weikala mwe lwiza na mwe kizuli cha kifa, jigwize milundi yetu sila ya utondolo. 80Kaja kazana kazakula, kazatenda nguvu ya kimpeho, kazaikala mwe nyika mpaka uja mushi, kakizalawila Waisilayeli.

Currently Selected:

Luka 1: KISHNT05

Highlight

Copy