Maliko 16

Yesu afufuka.

1-4.

1Mushi wa sabato ukibontoka, Maliya Magadalene na Maliya, nine ja Yose, na Salome wazaγula miti yehumpuntika vitana, kangwe wahite, wamshishe. 2Mhitu wa sabato makelo kabisa wazahita kwe mbila, zuwa jikilawa. 3Wazaγambilana: Ndiye atishindikile jiya iwe, jiuke he kifiγwe cha mbila, ni ndai? 4Wakiolela wazaona, kuti jiya iwe jizabinda kushindikwa, hambu ni kulu muno. Wakiingila mwe mbila wazaona mubwanga, aiikale kulume, 5aizwikile guni jeṅalisha, wazashentuka. 6Azawati: Msheshentuke! Mumlonda Yesu ywa Nazaleti akontelweye mwe muti; azafufuka, nkaho aha. Shaha wamwikileho! 7Miya hitai, mγambile wahina wakwe na Petelo, kuti neamilongwele na Galileya! Ne ndiko mumwone, sa amilongilevyo. 8Wazahalawa, wazahanyilika haja he mbila, hambu wazaukwa ni vizingizo kwa kushentuka kwawe. Nkawaγambile muntu mbuli hata, hambu wazaogoha.

Yesu amlawila Maliya na wahina watuhu.

9Yesu akibinda kufufuka na makelo mhitu wa sabato, bosi azamlawila Maliya Magadalene, amwingatilaye mpepo mfungate. 10Yuja azahita, azaviukwila waja waangilewo naye, waikalewo na ukiwa na kulila. 11Waja wakiiva, kuti a moyo, kuti azaoniγwa ndiye, nkawatozeshe.

12Vituhu azawalawila weyae wawe waili na ṅwili mtuhu, wakianga, wahite nkoi. 13Waja wohena wazahita, wazaviukwila weyae wawe watuhu, miya hata awa nkawawatozeshe mbuli zawe.

14Kushilikiza azawalawila waja kumi na muṅwe, wakija nkande; azawashunda kwa mbuli ya kushetozesha kwawe na ya ntoγo za myoyo yawe, kwa kuti nkawatozeshe mbuli za waja wamwenewo kuti: Azafufuka.

Yesu aluma wahina mwe shi zoshe.

15-18.

15Azawati: Hitai mwe shi zoshe za ngulu ngima, mubilikile ulaungwa wa nyemi kwa woshe we moyo! 16Mwetozesha akibatizwa atazavunilwa; ndiye ashetozeshe atazalahwa. 17Ntangilo ndizo zitongele waja wetozesha izi mbuli shizi: Mwe zina jangu wataingata mpepo, watalonga na milongele mihya. 18Watadaha kutoza nyoka, hata wakinywa vyekoma nkezeviwaifye, wanyonge watawabadikila mikono, watende lubaluba.

19Zumbe Yesu akibinda kuwalonga ivyoho azainulwa na mwe lwingu, azaikala kulume kwa Mulungu. Miya waja wazalawa, wazabilikila koshe koshe; 20kangi Zumbe azawaambiza akigela mbuli zawe nguvu na ziya ntangilo zitongelezo mbuli zawe.

Currently Selected:

Maliko 16: KISHNT05

Highlight

Copy