Ntuṅwa 4

Petelo na Yohana washungwa.

1Waja wakilonga na wantu, wavikizi na mγolokezi ywa vikilongwa na Masadukeyo wazalawila. 2Hambu wazaihilwa, kuti waja wafuza wantu na kuwabilikila ufufuki wa wafilewo kwa viya, Yesu afufukevyo. 3Wazawagwila na mikono yawe, wazawagela mwe chumba mpaka mhitu wa uja mushi, hambu ne kwishwele. 4Miya wangi waivilewo ija mbuli wazatozesha, waγoshi du wazaγelemuka makulija mashano.

Wa Petelo wakikanila chasale.

5Kukicha wazumbe wawe na watawa na watabaluwangwa wazaunganana Yelusalemu. 6Hata wavikizi wakulu wa haho, wakina Ana na Kayafa na Yohana na Alekisando na waja woshe weanduka mwe mbali ya wavikizi wakulu. 7Wazawaγolosha gati, wazawauza: Viya muviγoshole kwa nguvu ya ndai ao mwe zina ja ndai? 8Ne Petelo ahogisa mpeho ṅazi, azawati: Inywi wazumbe wa mbalingwa na inywi waγolokezi! 9Ati ishwi lelo talahiγwa, kwa kuti muntu mnyonge azazifiγwa, mkitiuza: Uyu ahonyiγwe ni nguvu ya ndai?, 10tailai inywi nyosheni haṅwe na mbali ngima ya Isilayeli kuti: Viγosholwe mwe zina ja Yesu Kilisito ywa Nazaleti, mumkonteleye mwe muti, Mulungu amwinuleye kwa wafilewo! Kwa nguvu yakwe uyu aγoloka aha, muliho, ai mgima. 11Yuja ni jiya iwe jibezilwejo ni inywi wazengo, miya vikibinda jizaγaluka iwe ja heta. 12Kuluhu akakuoneka uvunizi, kangi ishwi wantu kunu shi nkatiinkiγwe zina tuhu, ndijo tihonywiγwe najo.

13Wakiteγeleza ija milongele ya Petelo na ya Yohana, ivyona nyemi, kangi wakifanyanya kuti: Waja so mafundi ya ugondengwa, kangi so wavikizi, wazamaka, wazataila, kuti wana Yesu. 14Kangi wakimwolela yuja muntu ahonyiγweye, akiγoloka haṅwe nawo, nkawaene vya landula. 15Wazawalaγiliza, wamlawe muja mwe lahilo ja masa, 16wazatambikilana inu mbuli angwe: Awa wantu tiwatende zeze? Hambu kilozo chetailikana chizaγosholwa ndiwo, chizalawila woshe weikala Yelusalemu, hata ishwi nkatidaha kukela nkani. 17Miya kangwe inu mbuli isheisiize kugisa wantu woshe, tiwavaile, washezamubilikila muntu iji zina vituhu. 18Wazawaitanga, wazawashunda, kangwe washezalonga hata na kubilikila mwe zina ja Yesu.

19Miya Petelo na Yohana wazawalandulaangwe: Fanyanyai wenye, ati kwa Mulungu ni utanda kumiitika kumzinka Mulungu! 20Nkatidaha kuleka kulonga viya, tienevyo, kangi tiivilevyo. 21Miya waja wazawavaila, wakibinda wazawashungula, hambu nkawaene mbuli ya kuwalaha kwa mbuli ya wantu, hambu woshe wazamtogola Mulungu kwa viya viγosholwevyo. 22Hambu yuja muntu aγoshwelweye chiya kilozo cha kuhonyiγwa aibindile mavuli milongo mine.

Bumbangwa javika.

23Wakibinda kushungulwa wazahita kwa weyae wawe, wazawatamwila vyoshe, wavikizi wakulu na waγolokezi wawaγambilevyo. 24Waja wakiviiva, woshe wazainula vyanwa kiṅwe, wazamvika Mulungu angwe: Zumbe, iwe uzaγoshola lwingu na shi na bahali na vyoshe vye mumo. 25Uzaleka, mpeho ṅazi ilonge na kanwa cha baba ywetu, ṅwanao Dawidi, kuγamba: Nini wamzimu wakitula vuzo? Nini mbali za wantu zikipikapika bule? 26Wazumbe wa kunu shi waikazanya njama, wafuṅwa wakatozanya myoyo kwa mbuli ya Zumbe na ya Kilisito ywakwe. 27Hambu wazaunganana kweli mwe unu muzi kwa mbuli ya ṅwanawo mṅazi Yesu, ugimbikeye; Helode na Pontiyo Pilato, wamzimu na wa mbali ya Isilayeli wazaivana, 28waγoshole viya vyoshe, mkono wako na ntongonyezi zako ziteγanyevyo aho kale kuti: Nezevibontoke. 29Lushe Zumbe, olela ija mivailile yawe, uwafe wapuna wako mbazi, walonge mbuli zako na nyemi zoshe na kushetendwa ni shoni hata! 30Kusula mkono wako vivyoho, wantu wakahonyiγwe, kuγosholwe ntangilo na vimaka kwa nguvu ya zina ja ṅwanawo mṅazi Yesu! 31Wakivika ivyoho, haja hantu waungananeho hazavuwanika, wosheni wazagisa Mpeho mṅazi, wazalonga mbuli ya Mulungu na nyemi.

Bumba jivyoivana.

32Jiya bumba joshe ja waja wetozesha jizatenda moyo muṅwe na mpeho ṅwenga; nkakuna hata muṅwe mweγamba viya, avyona navyo, kuti ni vyakwe ṅwenye, miya vyashe ne vii vya bumbangwa. 33Ntuṅwa zizalonga na nguvu nyingi uwona wa ufufuki wa Zumbe Yesu, kangi waja woshe wazagisa mbazi nkulu. 34Kangi nkakuna wakiwa kwawe, hambu woshe, ndiwo waina maγisa na nyumba, wazavitaγa, wazaleta ija mali, waeneyo na viya vitaγiγwevyo, wazaiika shi he milundi ya ntuṅwa; 35kila azapangilwa, sa avyokosa. 36Kuna Mulewi, mbali yakwe ianduka mwe shi ya Kipulo, ndiye Yosefu, aitangwa ni ntuṅwa Balinaba, ni kuγamba: Ṅwamhembulizo. 37Uyu ne aina γisa, azajitaγa azaleta ziya shilingi, aonelezo, azaziika shi he milundi ya ntuṅwa.

Currently Selected:

Ntuṅwa 4: KISHNT05

Highlight

Copy