Ntuṅwa 3

Petelo amhonya muntu ashiγendaye.

1Petelo na Yohana wazakwela haṅwe mwe vikilongwa saa kenda, wantu wahokavikila. 2Kuna muntu ashidahaye kuγenda, vivyo avyelwevyo, aakaletiγwa akiikiγwa kila mushi he kifiγwe cha vikilongwa cheitangwa kitana, alombeze vya mbazi kwa waja weingila vikiloi. 3Uyu akimwona Petelo na Yohana, wakiunga kuingila mwe vikilongwa, azawahembeleza, wamunke cha mbazi. 4Miya Petelo haṅwe na Yohana 5wazamdulila angwe: Tiolele! Azawashungila, azaafiza, ndivyo wamunke. 6Miya Petelo azamuti: Feza na zahabu sina, miya nivyona navyo, navikunka: Mwe zina ja Yesu Kilisito ywa Nazaleti inuka, uhite! 7Azamtoza na mkono wakwe wa kulume, azamwinula. Viya du lushe milundi na nkungu zakwe zizatenda nguvu, azafikainuka, 8azaγoloka, azaγenda, azaingila haṅwe nawo mwe vikilongwa, azahita na kuvinavina na kumtogola Mulungu. 9Wantu woshe wazamwona, avyoγenda na kumtogola Mulungu, kangi wazamtaila, 10kuti ni yuja, ndiye akiikala he kifiγwe kitana cha vikilongwa, akilombeza vya mbazi, wazamakisha na kushentuka kwa viya, aγoshwelwevyo.

Petelo abilikila kuhitula ntongonyezi.

11Yuja mkilema ahonyiγweye azamtongela Petelo na Yohana, ne wantu woshe wahowaγulukila na kwe ija halaza yeitangwa ya Salomo, hambu wazamakisha. 12Petelo akiwaona azawalonga waja wantu angwe: Waγoshi wa Kiisilayeli, nini mkimaka inu mbuli? Kangi nini mkitidulila, viya titeleka kwa nguvu yetu wenye ao kwa mivikile yetu, uyu akiγenda? 13Mulungu ywa Abulahamu na ywa Isaka na ywa Yakobo, Mulungu ywa wababa zetu azamgimbika ṅwanae Yesu; kweli inywi mzamwinkila, muzamtowa hulu kwa Pilato, yuja akikunda kumshungula. 14Miya inywi muzamhetela leba yuja mṅazi na mtanda, mzahembeleza, mwinkwe mkoma wantu. 15Zumbe ywa nkalamo muzamkoma; Mulungu azamfufula uyu kwa wafilewo, waona ni shwiyo. 16Kwa viya atozeshevyo zina jakwe, jiya zina jakwe jizamgela nguvu uyu, muyemwona, kangi muyemtaila; mitozesheze yakwe ainkiγweyo ndiye ne imunkileyo uyu unu ugima, muwoona nyoshe. 17Lushe wanduγu, nataila, kuti muviγoshole kwa kushetaila kwenyu, sa viyaho vya wazumbe wenyu. 18Mulungu azabontola viya, abilikilavyo aho kale na vyanwa vya wateγanyi woshe, kuti Kilisito ywakwe nezealumiziγwe. 19Lushe hitulai ntongonyezi zenyu, kangi hitukai, uhuza wenyu uushiγwe, kangwe mishi idahekinta, wantu wahohemela he cheni cha Zumbe! 20Ne ndiho nezeamtumile Yesu Kilisito, muyemuliγanyiziγwa kale. 21Uyu vyamtala kunaγuwa uzumbe wa lwingu mpaka mishi ija, vintu vyoshe vihozauya kwe chandusho chawe, sa Mulungu alongilevyo kale hoshe na vyanwa vya wateγanyi wakwe waṅazi. 22Mose azalonga kuγamba: Zumbe Mulungu nezeamifufwile mwe wanduγu wenyu mubilikizi mweinga sa imi; ne ndiye nezemumwive mbulizoshe, ndizo amilonge. 23Miya kila muntu, ndiyc ashemwive yuja mubilikizi, atakoṅwa, auke mwe mbalingwa. 24Wateγanyi woshe, kuandiila kwa Samweli na waja woshe we nyuma walongilewo, wazabilikila mbuli za mishi imi. 25Inywi mu wauangwa wa waja wateγanyi na wa chiya kilaγa, Mulungu aikilecho na wababa zenyu akimγamba Abulahamu: Mwe mbeleko yako mbali zoshe za shi nezeziṅazwe mesho. 26Bosi ni nywiyo, Mulungu afufwilewo ṅwanae, azamtuma, amiṅaze mesho, kangwe kila muntu ahiluke, akileka mbuli zakwe mbada.

Currently Selected:

Ntuṅwa 3: KISHNT05

Highlight

Copy