Ntuṅwa 5

Ananiya na Safila.

1Kuna mγoshi mweitangwa Ananiya, ana muke ndiye Safila. 2Yohena azataγa jakwe γisa; miya ziya shilingi, aonelezo, azafisha kuṅwe, hata muke aitaile, azaiγala kafungu du, azakaika shi he milundi ya ntuṅwa. 3Petelo azamuti: Ananiya, nini Satani akigisa moyo wako, umhenyeze Mpeho mṅazi na kufisha shilingi kuṅwe, uonelezo na γisa jako? 4Nkudahile kujitoza? Hambu ne jii jako; hata jiibindile kutaγwa, ṅwenye uzadaha kukifanyanyiza, ndivyo uγoshole najo. Nini ukifanyanya mbuli yeinga aho mwe moyo wako? Nkumhenyeze muntu, miya umhenyeze Mulungu. 5Ananiya akiiva izi mbuli, azakina na shi, azadwika moyo. Woγa ukulu uzaingila woshe waviivilewo. 6Wabwanga wazainuka wazamwinula, wazamlavya, wazamzika. 7Saa ntatu zikizinka, muke yohena azaingila, miya nkataile viya viγosholekevyo. 8Petelo azamγamba: Niγambila, ati γisa jenyu mujitaγile ivyoho? Angwe, Ehe, ne titaγilevyo. 9Petelo azamuti: Nini mkiivana kuγeza mpeho ya Zumbe? Olela, milundi ya waja wamzikilewo mulumewo izabula haja he kifiγwe, newakulavye nawe! 10Viya du lushe azakina he milundi yakwe, azadwika moyo; waja wabwanga wakiingila, wazamwona, kuti ni kimba, wazamlavya, wazamzika haja ha mulume. 11Woγa ukulu uzaingila bumba gima na woshe waivilewo izi mbuli.

Watamu wahonyiγwa.

12Ntangilo na vilozo vingi vizaγosholwa ni mikono ya ntuṅwa kwa wantu. Woshe wazaangilana haja he balaza ya Salomo na kutenda moyo muṅwe. 13Miya waja watuhu nkakuna agumbileye moyo na kuwatongela, hambu wantu woshe wazawatogola vikulu. 14Miya wemtozesha Zumbe wazaingila vivyoho, ni bumba kulu ja waγoshi na ja wavyele. 15Hata watamu wawe wazawalavya na se, wazawaika mwe sazi na mwe nkingo, kangwe Petelo akizinka, kizuli chakwe du chiwabwile kuṅwe. 16Hata wantu wangi wa mizi tanga ya Yelusalemu wazaunganana na kuleta watamu na waja welumiziγwa ni mpepo ze usaba, awa wosheni wazahonyiγwa.

Ntuṅwa mwe chumba.

17Miya mvikizi mkulu azalawila na woshe, awona nawo, ne bumba ja Masadukeyo, woshe wana wizu ungi muno. 18Wazagwila ntuṅwa na mikono yawe, wazawagela mwe chumba cha wantu woshe. 19Miya mlau ywa Zumbe azazuγula nyuvi za chiya chumba na kilo, azawalavya, azawati: 20Hitai, mγoloke mwe vikilongwa, mubilikile mbalingwa mbuli zoshe za inu nkalamo! 21Wazaiva, wazahita mwe vikilongwa na maziyeziye, wazabilikila. Mvikizi mkulu akiiza na bumba jakwe, azaitanga wafuṅwa wakulu nawanduγu woshe wa wana Isilayeli, azatuma na kwe chumba, waja waletiγwe. 22Wafunguwo wawe wakibula nkawawaene mwe chumba; wazauya, 23wazalonga angwe: Tizaona, chumba chiizuγalwe na utanda woshe, kangi waluγojo waiγoloke kwe vifiγwe, miya tikizuγula muja ndai, nkatiene muntu. 24Mγolokezi ywa vikilongwa na wavikizi wakulu wakiiva izi mbuli, wazaaγilwa; nkawataile inu mbuli, ndivyo ibontoke. 25Miya kuzaiza muntu, azawaγambila kuti: Waja waγoshi, mugezilewo mwe chumba, wa muja mwe vikilongwa waiγoloke, wafuza mbalingwa. 26Lushe mγolokezi azahita na wafunguwo wakwe, azawaleta, miya so kwa nguvu, hambu wazaogoha wantu, washekoṅwe ndiwo na kuhomelwa mawe. Wakiwaleta wazawaika mwe kitala. 27Mvikizi mkulu azawauza angwe: 28Tizamilaγiliza uwo mulomo wa kuγamba: Mshezabilikila mbuli za iji zina! Kangi shivyo, muzi wa Yelusalemu uzagisa ubilikizi wenyu, mwakunda kutigela masa ya uyu muntu! 29Petelo na ntuṅwa weyae wazalandula, angwe: Shuti timwitibe Mulungu kuzinka wantu! 30Mulungu ywa watate zeshu azamfufula Yesu, inywi mumkomileye na kumholeza mwe muti. 31Uyu Mulungu azamgimbika, aγaluke zumbe na mhonya, ainke Waisilayeli luvotekele, waushiliziγwe mahuza. 32Kangi ishwi ti waona wa izi mbuli, hala Mpeho mṅazi, Mulungu ayoinka waja wemwitika. 33Wakiviiva wazaihilishiγwa, wazakunda kuwakoma. 34Miya kuja kitala kuzainuka Faliseyo mweitangwa Gamaliyeli, ni mfuzi ywa mulomongwa mwegimbikwa ni wantu woshe, azalaγiliza waja wantu, wanelaviγwa hadodo. 35Vikibinda azalonga weyae angwe: Waγoshi wa Kiisilayeli inywi, kiγojei kwa mbuli ya awa wantu, ndivyo mγoshole! 36Hambu mishi izinkileyo Toida azalawila, azakifanyanyiza ṅwenye, kuti ndiye, azatongelwa ni wantu weγelemuka hata magana mane; uyu azakoṅwa, ne waja woshe, ndiwo wakimwitika, wahoasakana, wazahakibanikila. 37Vikibinda kuzalawila Yuda ywa Galileya mishi ija, wantu wakigondwa kodi, uyu azabahula wantu wangi, wamtongele; yohena azabanika, kangi woshe, ndiwo wakimwitika, wazaasakana. 38Lushe namiti: Mbuli ya awa wantu ilekei, muwashungule! Ati ntongonyezi zawe na ndima zawe zianduka kwa wantu, nezichakuke. 39Miya ati zianduka kwa Mulungu, nkemdahe kuzichakula, kangwe mshezabunkuka kuti: Mwamwomanya Mulungu. Wazamwitikila.

Ntuṅwa washungulwa na kutowiγwa.

40Wazaitanga ziva ntuṅwa, wazawatowa na kuwalaγiliza, washezabilikila zina ja Yesu, vikibinda wazawashungula. 41Waja wakilawa mwe kitala wazahita na nyemi, kwa kuti wazakundiziγwa kuγoshwelwa vibada kwa mbuli ya zinangwa. 42Uja mushi mgima nkawadizile kufuza na kubilikila ulau wa nyemi wa Kilisito Yesu kuja vikiloi na kuja kaya.

Currently Selected:

Ntuṅwa 5: KISHNT05

Highlight

Copy