創世記 32
32
雅各準備㧯以掃見面
1 雅各繼續佢个行程；上帝个使者在路上來見佢。 2雅各看到佢等就講：「這係上帝个軍隊！」佢就將該地方安到瑪哈念#32:2 「瑪哈念」意思係「兩個軍隊」。。
3 雅各派幾個人先去以東地區見厥哥以掃， 4吩咐佢等講：「你等愛對𠊎主以掃講：『你个僕人雅各講：𠊎㧯拉班住一站時間，一直到這下正轉來。 5𠊎有牛、驢、羊群、奴僕㧯奴婢。這下𠊎先派人來報告吾主人，希望得到你个歡喜。』」
6派去該兜人轉來對雅各報告：「𠊎等堵到若哥以掃；佢已經帶等四百儕出來，愛來㧯你見面。」 7雅各當驚又當愁，將㧯佢共下个人分做兩隊，將羊群、牛仔、㧯駱駝也分做兩隊。 8佢想：「若係以掃攻擊第一隊，另外一隊還有機會逃走。」
9 雅各祈禱講：「吾公亞伯拉罕个上帝啊！吾爸以撒个上帝啊！求你來聽！上主啊，你識吩咐𠊎轉來故鄉，到𠊎家族該位去，又講愛俾𠊎事事順利。 10𠊎堪毋得領受你向僕人所做个一切慈愛㧯誠實。頭擺，𠊎个手只有擎等一支柺棍仔過約旦河；這下𠊎變做兩隊。 11求你救𠊎脫離吾哥以掃个手。𠊎驚佢來攻擊𠊎；連𡜵娘子女全部會被佢㓾掉。 12其實你識講：『𠊎一定愛俾你事事順利，也愛賜給你多子多孫，像海滣个沙粒，多到無人算得出。』」
13 雅各在該位過夜。佢特別擇一部份頭牲做送給厥哥以掃个禮物： 14山羊乸兩百隻，山羊牯二十隻；綿羊乸兩百隻，綿羊牯二十隻； 15帶等細駱駝、餵乳个駱駝乸三十隻；牛乸四十隻，牛牯十隻；驢乸二十隻，驢牯十隻。 16佢將這兜頭牲一群一群分開，逐群派一個僕人管理。佢吩咐佢等講：「你等先行，一群㧯一群中間愛離較遠兜仔。」 17佢指示帶頭个僕人講：「吾哥以掃堵到你个時，若係問你：『你个主人係麼人？你愛去㖠位？你頭前這兜頭牲係麼人个？』 18你就應講：『這兜全部係若僕人雅各个；佢愛送給厥主人以掃做禮物。佢本人就在𠊎等後背。』」 19佢也指示第二群、第三群，㧯所有逐頭牲个人講：「你等堵到以掃个時也愛㧯佢講共樣个話； 20也一定愛講：『若僕人雅各就在𠊎等後背。』」雅各心肚想：「𠊎愛用這兜禮物來消佢个氣，見面个時，佢就可能會饒赦𠊎。」 21恁樣，佢喊送禮物个先行，自家留在帳篷肚過夜。
雅各㧯上帝揇腰跤仔
22該暗晡雅各䟘起來，帶等兩個𡜵娘、兩個細姐仔，㧯十一個孻仔渡過雅博河。 23佢等過河以後，佢又將所有个一切送過河， 24自家一儕留在後背。
有一個人來㧯雅各揇腰跤仔，一直到臨天光。 25該儕人看自家毋會贏佢，就打佢个大腳髀个骨輪，雅各个腳髀就𢫫腕。 26該人講：「會天光了！放𠊎走啊！」
雅各講：「你若係毋祝福𠊎，𠊎就毋放你走！」
27該人問：「你安到麼介名？」
佢應講：「雅各。」
28該人又講：「從今以後，你毋係安到雅各。你㧯上帝並㧯人鬥力，全部贏，恁樣你个名愛改做以色列#32:28 「以色列」有「佢㧯上帝鬥力」抑係「上帝鬥力」个意思。。」
29 雅各問：「請你㧯𠊎講，你安到麼介名？」
該人應講：「樣使問𠊎个名呢？」講煞，就㧯雅各祝福。
30 雅各講：「𠊎面對面看到上帝，總係還生生！」恁樣，佢就將該地方安到比努伊勒#32:30 「比努伊勒」有「上帝个面」个意思。。 31雅各離開比努伊勒个時，日頭堵堵出來。因為大腳髀个骨輪𢫫腕，佢就跛腳。 32一直到今晡日，以色列个後代全部毋食大腳髀个筋，因為雅各大腳髀个筋識扭傷。
Currently Selected:
創世記 32: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
