創世記 31

雅各逃走離開拉班

1 雅各聽到拉班該兜孻仔講：「雅各已經搶走𫣆等阿爸个一切；佢所有个財產本來係屬𫣆等阿爸个。」 2雅各也發覺拉班對佢無像頭擺恁親切。 3這時，上主對雅各講：「你愛轉去故鄉，到若祖先㧯親人該位去；𠊎愛㧯你共下。」

4 雅各就派人傳話給蕾潔㧯麗亞，吩咐姖等到佢掌羊个地方見面。 5佢㧯姖等講：「𠊎發現若爸對𠊎無像頭擺恁親切；總係吾爸个上帝一直㧯𠊎共下。 6你兩儕知，𠊎有盡全力㧯若爸工作， 7總係佢騙𠊎，十擺改𠊎个工錢；好得上帝毋准佢害𠊎。 8若係拉班講：『有花點个羊仔給你做工錢』，𫱔个羊仔歸群就有花點；若係佢講：『有花浪个羊仔給你做工錢』，𫱔个羊仔歸群就有花浪。 9恁樣，上帝將若爸个羊群拿來賜給𠊎。

10「有一擺，在羊群配種个時節，𠊎發夢看到打羊乸个羊豭全部係有花點、有花浪个。 11上帝个使者在夢中講：『雅各啊！』𠊎應講：『𠊎在這位。』 12佢講：『你看，所有打羊乸个羊豭全部係有花點、有花浪个。𠊎使這事發生，因為拉班向你所做个，𠊎攏總有看到。 13𠊎係在伯特利向你顯現个上帝。你識在該位頓一隻石頭做紀念碑，在頂高淋橄欖油，又在該位對𠊎發誓。這下你愛準備轉你出世个地方去。』」

14 蕾潔㧯麗亞應雅各講：「𠊎等敢還有可能對吾爸分到財產嗎？ 15佢敢毋係將𠊎等準做外人嗎？佢出賣𠊎等，又吞掉賣𠊎等个價錢。 16上帝對吾爸該位拿走个財富本來係屬𠊎等㧯𠊎等子女个。恁樣，你愛照上帝對你講个話去做。」

17-18 雅各就準備好勢，愛轉迦南厥爸以撒該位去。佢喊𡜵娘、子女全部騎上駱駝，又帶等佢所有个頭牲㧯在美索不達米亞積存个財產離開。 19當拉班去外背剪羊毛个時，蕾潔偷拿厥爸該兜家族个神像。 20雅各騙拉班，無俾佢知，就偷偷仔走。 21佢帶等佢所有个一切逃走，渡過幼發拉底河，向基列山區去。

拉班追雅各

22到第三日，有人㧯拉班講，雅各逃走了。 23拉班帶領佢个族人共下去追雅各。佢等追七日，正在基列山區追到佢。 24該暗晡，上帝在亞蘭人拉班夢中向佢顯現，對佢講：「你愛小心，毋好糮糝對雅各講恐嚇个話。」 25該時雅各在山頂搭帳篷；拉班㧯佢个族人也在基列山區搭帳篷。

26 拉班對雅各講：「你做麼介無㧯𠊎講就走？像人擎刀仔將𠊎个妹仔搶走。 27做麼介騙𠊎，偷偷仔走，無㧯𠊎講一聲？若係你有㧯𠊎講，𠊎一定會歡歡喜喜唱歌、打鼓、彈琴送你走。 28你恁樣做實在忒戇；連俾𠊎唚一下𠊎个外孫㧯妹仔，㧯佢等送別个機會也無。 29本來𠊎有辦法傷害你，總係昨暗晡，若爸个上帝警告𠊎，毋準𠊎糮糝欺負你。 30𠊎也了解你想若爸屋下个心情，一心想愛轉去；總係做麼介偷𠊎該兜家族个神像呢？」

31 雅各應拉班講：「因為𠊎驚你會對𠊎這位強強將你个妹仔搶轉去。 32總係，你在麼人該位搜出你該兜神像，麼人就該死。在𠊎等親人面前，若係你認出有麼介東西係你个，就拿轉去。」原來雅各毋知蕾潔偷厥爸个神像。

33 拉班就入去雅各个帳篷搜查，接等到麗亞㧯兩個使女个帳篷，無搜到麼介；出來後，佢又入去蕾潔个帳篷。 34蕾潔已經將該兜家族个神像囥在駱駝鞍个袋仔肚，自家坐在頂高。拉班在帳篷肚逐位搜，無尋到麼介。 35蕾潔對厥爸講：「請你毋好受氣；𠊎堵好在月經期間，無方便在你面前企起來。」拉班逐所在尋透透，無尋到該兜家族个神像。

36 雅各就受氣，責備拉班講：「𠊎到底犯麼介罪，犯麼介法，你卻來追𠊎？ 37你已經搜過𠊎所有个包袱，到底有尋到若屋下个東西麼？拿出來，放在你㧯𠊎親人个面前，俾大家決定𠊎兩儕愛樣般做啊！ 38𠊎在若屋下這二十年間，你个綿羊抑係山羊毋識落胎；你个羊牯𠊎一隻也毋識食過。 39俾野獸扯爛个羊，𠊎無帶去俾你看，全部係𠊎自家私下賠掉。無論日時頭、暗晡時，羊仔被人偷走，你全部愛𠊎賠。 40𠊎常常日時頭堵到風吹日炙，暗晡時又受到寒霜，歸暗晡無合眼。 41𠊎在若屋下做二十年長年：為到討你兩個妹仔，𠊎服事你十四年；為到愛得你个羊群，𠊎服事你六年；你還十擺改𠊎个工錢。 42若毋係𠊎个祖先亞伯拉罕个上帝、以撒所敬畏个上帝㧯𠊎共下，你一定會逐𠊎空手出來。總係上帝看到𠊎个苦情㧯勞碌；佢昨暗晡就責備你。」

雅各㧯拉班立約

43 拉班應雅各講：「妹仔係𠊎个，外孫也係𠊎个，連羊群也係𠊎个；其實你眼前个一切攏總係𠊎个。𠊎个妹仔㧯姖等所𫱔个子女，𠊎今晡日愛樣般款待佢等呢？ 44來啊！你㧯𠊎兩儕立約，𠊎等來堆石頭做𠊎等立約个證據。」

45 雅各就翻一隻石頭頓起來做紀念碑。 46佢喊親人拈兜石頭來堆做一堆，然後大家在石堆堘共下食、共下啉。 47拉班將該石堆安名伊迦爾‧撒哈杜他#31:47 「伊迦爾‧撒哈杜他」亞蘭文个意思係「做證个石堆」。，總係雅各將它安到迦累得#31:47 「迦累得」希伯來文个意思係「做證个石堆」。。 48拉班對雅各講：「今晡日，這石堆在你㧯𠊎中間做𠊎等立約个證據。」所以這地方安到迦累得。 49拉班又講：「𠊎等分開以後，願上主在你㧯𠊎中間鑒察。」所以這地方又安到米斯巴#31:49 「米斯巴」意思係「監察台」。。

50 拉班接等對雅各講：「你若係壞對待𠊎个妹仔，抑係在𠊎个妹仔以外再討，雖然無人知，你愛記得，上帝在鑒察𫣆等。 51你看𠊎在你㧯𠊎中間所立个這石堆㧯紀念碑。 52這石堆㧯這個紀念碑做證據來提醒𫣆等：𠊎絕對毋會超過石堆去攻擊你，你也做毋得超過石堆㧯紀念碑來侵犯𠊎。 53亞伯拉罕个上帝㧯拿鶴个上帝，就係佢等阿爸个上帝 #31:53 亞伯拉罕係雅各个阿公；拿鶴係拉班个阿爸。，愛在你㧯𠊎中間做判斷。」然後雅各就對厥爸以撒敬畏个上帝發誓，愛守這約。 54佢在山頂㓾頭牲獻祭，邀請親人共下食飯；食飽後，佢等在山頂過夜。 55第二日打早，拉班就㧯厥外孫㧯妹仔唚嘴祝福，離開該位，轉屋下去。

Currently Selected:

創世記 31: THV12Hdb

Highlight

Copy