創世記 30

1 蕾潔看到自家無為雅各𫱔細人仔，就嫉妒厥姊，對雅各講：「你俾𠊎𫱔細人仔，若係無，𠊎愛死！」

2 雅各對蕾潔發譴，講：「俾你毋會𫱔个係上帝，𠊎樣能代理佢呢？」

3 蕾潔講：「𠊎个使女辟拉在這位，你同姖睡，俾姖代𠊎𫱔細人仔，恁樣𠊎就有子女了。」 4蕾潔就將姖个使女給老公做細姐，雅各就同辟拉共下睡。 5辟拉就有身項，為雅各𫱔一個孻仔。 6蕾潔講：「上帝代𠊎伸冤，也聽𠊎个祈求，賜給𠊎一個孻仔。」所以姖㧯佢安名但#30:6 「但」有「代𠊎伸冤」个意思。。 7辟拉又有身項，㧯雅各𫱔第二個孻仔。 8蕾潔講：「𠊎㧯吾姊相爭，又爭贏了。」姖就㧯佢安名拿弗他利#30:8 「拿弗他利」有「相爭」个意思。。

9 麗亞發現自家毋會𫱔了，也將姖个使女悉帕給雅各做細姐。 10悉帕就同雅各𫱔一個孻仔。 11麗亞講：「𠊎真好運噢！」姖就㧯佢安名迦得#30:11 「迦得」意思係「好運」。。 12悉帕㧯雅各又𫱔第二個孻仔。 13麗亞講：「𠊎真有福氣噢！所有个婦人家會講𠊎真係有福氣。」姖就㧯佢安名亞設#30:13 「亞設」意思係「有福氣」。。

14麥仔收成个時節，呂便在麥田尋到催情果，就拿去交給厥姆麗亞。蕾潔對麗亞講：「若孻仔个催情果，拜託給兜𠊎。」

15 麗亞應佢：「你搶𠊎个老公還毋罅？這下你又想愛搶吾孻仔个催情果！」

蕾潔講：「為到若孻仔个催情果，今暗晡讓你同雅各共下睡。」

16臨暗仔，雅各對麥田轉來；麗亞出去迎接，對佢講：「今暗晡你一定愛同𠊎睡，因為你係𠊎用吾孻仔个催情果換來个。」該暗晡，雅各就同麗亞共下睡。

17上帝聽麗亞个祈求，姖就有身項，為雅各𫱔第五個孻仔。 18麗亞講：「上帝報答𠊎，因為𠊎將自家个使女給吾老公。」姖就㧯佢安名以薩迦#30:18 「以薩迦」有「報答」个意思。。 19麗亞又有身項，為雅各𫱔第六個孻仔。 20麗亞講：「上帝給𠊎貴重个禮物；這下吾老公會好款待𠊎，因為𠊎為佢𫱔六個孻仔。」姖就㧯佢安名西布倫#30:20 「西布倫」有「禮物」抑係「好款待」个意思。。 21後來麗亞𫱔一個妹仔，㧯姖安到底拿。

22上帝顧念蕾潔，聽姖个祈求，使姖又會𫱔。 23蕾潔就有身項，𫱔一個孻仔，講：「上帝除掉𠊎个見笑了。」 24姖㧯佢安名約瑟#30:24 「約瑟」有「願上主再給」个意思。，講：「願上主再給𠊎一個孻仔。」

雅各㧯拉班談判

25 蕾潔𫱔約瑟以後，雅各對拉班講：「𠊎愛轉𠊎个故鄉；求你俾𠊎離開！ 26准𠊎帶𡜵娘、細姐㧯子女離開；𠊎識為到佢等服事你。你知𠊎樣般煞猛㧯你工作！」

27 拉班對佢講：「你聽𠊎講！上主俾𠊎知！上主係因為你个緣故正賜福給𠊎。若係做得，拜託你繼續住在𠊎這位。 28㧯𠊎講，你愛幾多工錢？𠊎一定給你。」

29 雅各應講：「你知𠊎樣般㧯你工作，在𠊎个手頭，你个牛群、羊群增加幾多。 30𠊎來以前，你个財產有限，這下增加恁多；係因為𠊎个緣故，上主正賜福給你 #30:30 「係因為𠊎个緣故，上主正賜福給你」抑係譯做「無論𠊎到㖠位，上主就賜福給你」。。這下𠊎愛為𠊎自家个家業來打拚了！」

31 拉班問：「𠊎應該樣般報答你呢？」

雅各講：「你麼介都毋使報答𠊎；只有一件事，若係你同意𠊎个辦法，𠊎就繼續看顧你个羊群。 32今晡日，讓𠊎到你个羊群中，將所有有花點、有花浪㧯烏色个綿羊，並有花點、有花浪个山羊全部分出來；將來這種个羊仔正算係𠊎个工錢。 33恁樣，下二擺你就會知𠊎係毋係誠實！你來查看𠊎所得个工錢个時，若係在𠊎个羊群中發現無花點、無花浪个山羊，抑係毋係烏色个綿羊，你就知係𠊎偷來。」

34 拉班應佢：「好啊，𠊎同意，照你所講个去行。」 35總係該日，拉班偷偷仔就將有花浪、有斑點个山羊牯，㧯有花浪、有花點、摻雜白色个山羊乸全部分出來，也將烏色个綿羊全部分出來，交給佢自家該兜孻仔來掌， 36吩咐佢等㧯雅各分開，愛相隔有三日个路程。雅各就另外牧養拉班其他个羊群。

37總係以後，雅各拿兜白楊樹、杏樹、㧯梧桐樹个樹桍，削掉一部份樹皮，俾樹桍露出白色个花浪。 38佢將這種樹桍插在羊群頭前、羊食水个水槽肚，因為它兜來食水个時會配種。 39羊在樹桍前配種，就會𫱔有花浪、有花點个細羊仔。 40雅各將拉班羊群中走醒个綿羊㧯山羊分開來，俾它兜同該兜有花浪㧯烏色个羊配種。雅各用這種方法來增加自家个羊仔，然後將這兜羊仔對拉班个羊群中分出來。 41勇健个羊配種个時節，雅各就將該兜樹桍插在它兜頭前个水槽肚，它兜就對等該兜樹桍配種。 42總係當瘦个羊配種个時，佢就無插該兜樹桍。恁樣瘦个羊全部歸拉班，勇健个羊全部歸雅各。 43雅各就越來越發，有當多羊群、奴婢、奴僕、駱駝㧯驢仔。

Currently Selected:

創世記 30: THV12Hdb

Highlight

Copy