創世記 33
33
雅各㧯以掃見面
1 雅各昂頭看，就看到以掃帶等四百人前來；所以佢將子女分開，交給麗亞、蕾潔，㧯兩個細姐。 2佢喊兩個細姐㧯姖等个子女行在頭前，麗亞㧯姖个子女跈等，蕾潔㧯約瑟在盡後背。 3雅各親身行到佢等最頭前；佢連連七擺伏在地上，行到厥哥面前。 4以掃走過來迎接佢，將佢揇等來唚佢；兩儕就噭出來。 5以掃昂頭看到婦女㧯細人仔，就問佢：「你這兜人係麼人？」
雅各應講：「這兜細人仔攏總係上帝施恩賜給若僕人个。」 6雅各兩個細姐帶等姖等个子女行前來跪以掃， 7接等係麗亞㧯姖个子女，最後約瑟㧯蕾潔也行前來跪佢。
8 以掃又問：「𠊎最先堵到該群頭牲係愛做麼介？」
雅各講：「係愛送給吾主个等路。」
9 以掃講：「老弟！𠊎麼介都有；你自家留等就好了！」
10 雅各講：「莫恁樣啊！你若係歡喜看到𠊎，請收下𠊎个禮物。你恁親切接納𠊎，𠊎看到你个面，就像看到上帝个面一樣。 11請你接受𠊎帶來个禮物；因為上帝一直用慈愛款待𠊎，賜給𠊎一切所需要个。」雅各再三請以掃接受禮物，佢正收下來。
12 以掃講：「𫣆等共下來去！𠊎在你頭前帶路。」
13 雅各應講：「吾主知𠊎這兜細人仔還細，𠊎又愛照顧該兜還食乳个細牛仔、細羊仔。若係再逐佢等行一日路，驚怕牛羊全部會死掉。 14請吾主先行！若僕人會在後背跈等，照牛羊㧯細人仔个力量慢慢行，直到以東你該位去。」
15 以掃講：「若係恁樣，𠊎就留幾儕來保護你。」
總係雅各講：「毋使恁樣；吾主恁親切對待𠊎，𠊎就心滿意足。」 16恁樣，以掃該日就先行轉以東去。 17總係雅各去到疏割，在該位為自家起屋仔，又為頭牲搭寮仔；所以該地方安到疏割#33:17 「疏割」意思係「寮仔」。。
18 雅各對美索不達米亞一路平安轉到迦南地个示劍城，在城外搭帳篷。 19佢搭帳篷該垤地，係用一百隻銀幣向示劍个阿爸、哈抹个後代買个。 20佢在該位起一座祭壇，名安到伊利‧伊羅伊‧以色列#33:20 「伊利‧伊羅伊‧以色列」意思係「上帝、以色列个上帝」。。
Currently Selected:
創世記 33: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
