Luka 8

Twapapapalra ki Yesu ka lalabaibai

1La kai tarathainu, ku Yesu la dadavacenga salraelre ki sanaka ceekele, pelaelaela ku hukuingi ki kuni ki Twaumase; ku ta 12 ka lasitu la karedele iniane. 2Kaika kathane kwini, yakaiyana ku lalabaibai, yadrepele ka nakiaikai ki aidridringane ka namacaeme, si ka kiapawdringainga ki Yesu; kikwini yakai ku swa Magedaleni ka Malria, twalai ki kinawmasaneini nayakai ku tapitu ka aidridringane ku kiapakatwase; 3yakaiyana ku Yuana ka taelrelre ki Kuza ka yakaikai ki daane ki Hirudi, si Susana, si kudra drumane ka lamaliali. Kwini lalisu ngiarakai ku lamanemane lini baai ki Yesu si lasituini.

Wasabulu ku sapaivai ka pathalrilriku

(Matai 13.1-9; Maruku 4.1-9)

4Ku laumawmase twalai ki lacacekele kainganai drele ki Yesu. Kudra la takaalra ka laumawmase sa irubu yai, ku Yesu la pelaela liniane kikai pathalrilriku:

5“Yakai kudra tarasabwabulu ku matwase sabulu ku sapaivai. Sa sabulu kwini lasu, la ikai ku sapaivai ku makakai babiabila ki kadalranane, la kidredredre ki umawmase, la kela ku laadhadhame si kane. 6La ikai ku la makakai ki lralrenelrenege, ku sapaivai sa udratanga la karudame, asi lwiyane kai maka kiapakaalreke ki acilai. 7La ikai ku lasapaivai ku mwaruru makakai ki cecenekane ka angatungatu, kwini cecenekane ka angatu la tupapalra kadrau, si amenge ki mwadratadrata. 8La ikai ku drumane ku sapaivai ku mwaruru makakai ki takatharirane ka dae, la udrata, la kaadrau, si tu idai pumadru.”

Ku Yesu la iyana kai, “Ku yakai ku calringa, makitu kilalra!”

Pacugane kai ki pathalrilriku

(Matai 13.10-17; Maruku 4.10-12)

9Ku lasitu ki Yesu la kela kivaga ki Yesu ku pacugane kai ki pathalrilriku. 10Kwi lasu amia kai, “Kudra patharukai kikai ka athingalane ka matiasamaimali ka kuni ki Twaumase wabaainga numiane; pangukai ki drumane ka umawmase, la arakai ku pathalrilriku pelaela, la padrele liniane ai kailri maka cege, kialalra ai kailri maka pulringalringau.”

Swacenge kai ki wasabulu ku sapaivai ka pathalrilriku

(Matai 13.18-23; Maruku 4.13-20)

11“Ku pacugane kai ki pathalrilriku miyaiya kai: Kudra sapaivai amani ku vaga ki Twaumase. 12Ku makakai ki babiabila ki kadadalranane ka sapaivai, amani ki umawmase lu kilalranga ku vaga ki Twaumase, ku Akema la kela, si patwalai ki kidremedreme lini malra ku vaga ki Twaumase, ku kaika adulrwane lini kasalru si kipalribulu. 13Ku makakai ki lralrenegane ka sapaivai, amani ki umawmase sa kilalra ku vaga ki Twaumase la kiraragai tarumara, ai kwini vaga ki Twaumase ikai ki kidremedreme lini kai mwadringi ku tabalacane; kwini lalasu yasasaane kasalru, ai sa kipadradresenge ku akikituthiathingalane la kai maka kapapedrenge acegecege. 14Ku makakai ki cecenekane ka angatu ka sapaivai, amani ki umawmase sa kilalranga ku vaga ki Twaumase, ai kudra thekelrane ki tacekecekelane, si salrilrigilane ki acekecekelane si akiperavanane, pakasemete kai ki vaga ki Twaumase ku apanianiakane, la kai maka pumadru ku mabea ku madru. 15Ku makakai ki mathariri ka dae ka sapaivai, amani ki laumawmase sa kilalranga ku vaga ki Twaumase, arakai ku tharirane si patengatengane ka kidremedreme pangimia, kiadili ukalavalava, pakela ku tapumadrwane.”

Kiakabungu ki balrungubungu ka tinaki

(Maruku 4.21-25)

16“Kadrwa ku umawmase ku padalai ku tinaki, la arakai ku balrungubungu caebe, ku wamalra pitailebe ki vincengane. Kwini lasu lri tara maalra pubelenge kwini tinaki pikai ki tatinakiane, ku lrika akuledrane ki mwadaane ku umawmase. 17Sanaka nisekeseketane patuelre lri tara kimapelaela, ku niseketane sanaka maneemane lri tara mutaluvaivai, si kimathingathingale.

18“Lakamani, kunumi kipapawlringava kilalra; asi lwiyane kudra pakayakai, lri baaiyana iniane pakakaakalra; kudra pakakadrwa, adravane ku pikaini ku sakathathaanane lai lri kimalrana ribici.”

Tina ki Yesu si labetakaneini

(Matai 12.46-50; Maruku 3.31-35)

19Ku tina ki Yesu si labetakaneini wakela drele iniane, ai tapangale ku umawmase, la kai maka dulru ngudadethe iniane. 20La ikai ku umawmase ku peaelaela ki Yesu, “Ka tinasu si labetakanesu yalatadre acegecege kisanu drele muswane!”

21Ku Yesu la iya kai liniane, “Kudra kialalra ku vaga ki Twaumase si pangiamiamia, ala amani ku ina ku labetakaneli!”

Paidrengere ku Yesu ki valrigi si bikabiki

(Matai 8.23-27; Maruku 4.35-41)

22Yakai saka minakavalane, ku Yesu la karedeedele ki lasituini mubelenge ki varukuru, si iya kai liniane, “Ila ta mubalrealreanane kai ki baiyu.” Kwi lalasu la katwase. 23Sa katwatwase ku varukuru, ku Yesu waapece ereke. Ala kiriimu pangitutuluku pangicaeme valrigi ikai kwini ki baiyu, si suetetenga ku acilai ki varukuru, si matiukuludrunga turamuru. 24Ku lasitu la kainganai mucucubungu iniane, si aceace iniane, si iya kai, “Sinsi, Sinsi, lri pacaita!”

Ku Yesu la pacunu, kaelaelathe ki valrigi si bikabiki, ku valrigi si bikabiki la isadra, la idrengerenga kwini baiyu. 25Ku Yesu la kivaga liniane, “Yakai inu ku salrwane numi?”

Kwi lalasu masamali ngituluku, si maiyaiya kai, “Aneane kai umawmase kai? Kai lasu wacubungu ki valrigi si bikabiki drekase, kai valrigi si bikabiki kialalra iniane!”

Ku Yesu pawadringai ki kiaikai ki aidridringane ka umawmase

(Matai 8.28-34; Maruku 5.1-20)

26Kai lalasu la ngukai ki varukuru talubalre ki baiyu Galrilri mubalrealreanane talikai Gerasene. 27Ku Yesu sa mukameamealane, la ikai ku swa talikai kwini ku tangea ka umawmase ku kiaikai ki aidridringane wakelakela kainganai kidresenge iniane. Kikai lasu maulainga kai silaimai, kai yatavanavanane, yakaikai tadralredralrekane ki barurungulu. 28Kwini lasu sadrele ki Yesu, la kirimu karaleale tawtau, si guruthungane icucubungu ki Yesu, akwadrau iya kai, “Lalake ki Abebeelengenga ka Twaumase ka Yesu, asu keela upungu nakwane? Lri kitubiaku muswane madha pakwalrialri nakwane!” 29Ku iyaini kai ki lasu amani sa ikai sa drekase kai Yesu kwini ki aidridringane katwasa twalai kwini ki umawmase. Kingikalralenga kwini aidridringane pwalra kai ki lasu, kai lasu adravane sa kiruthuku kiemenge, ku alrima si drapale kiasawsi ara kaludralri yai, wadulru ngikudukudu si betake kwini kaludralri, si kipakatwase ki aidridringane pamwa ubulane.

30Ku Yesu la kiavaga iniane, “Sia aneane ku naganesu?”

Kwini lasu la tubalre, “Ku naganeli sia ‘Makalrakalraku’ ”. Asi lwiyane nakiaikai ki makaalra ka aidridringane kwini lasu. 31Kwi laaidridringane la kitubi ki Yesu, ku kaika amalrane liniane pakatwase pwadringi ki valrulrange.

32Ikai kwini adeethe ki lregelrege sisiane la icengecenge ikai ku makaalra ku labeke ku wakanekane. Kwini aidridringane la kitubi ki Yesu, ku akipalraingane lini mwadringi ki labeke; ku Yesu la palraingi liniane.

33Kwini aidridringane la twalai kwini ki kinawmasane ki umawmase katwase, si mwadringi mwa ki labeke; kwini labeke patuelre la kalrungulrungu mulrevese ki tukadrane, si mwadringi ki baiyu, la murenere pacai patuelre.

34Kudra taralapulapu ki beke sadrele kikai, matwase lailai mwa ki cekele si ki tatitiki ka lacekele pelaela ku tangimiane. 35Ku swakai kwini ku laumawmase la kainganai, lri drele lukamanemane ku ngiatumane. Kwini lalasu la mwa ki Yesu, la drele kudra ki kiakatwase ki aidridringane ka umawmase la nenenga icucubungu ki Yesu, si silaimainga, la pulringalringawnga, la makitu kakiwcu ukuludru. 36Ku wadrele kikai tangilribatane kikai ku laumawmase makitu pelaela ki mapapangale ku takipawdringadhane kwini ki lasu ku tangimiamiane. 37Kai swa Gerasene ka mapapangale la kitubi ki Yesu katwasa kikai iya, asi lwiyane mwakuludru turamuru. Ku Yesu la muvarukuru si katwase. 38Kudra kiatwalai ki kinawmasane katwase ku aidridringane ka umawmase la kitubi ki Yesu iya kai, “Pukaunaili nau tupapalra muswane!”

Ai ku Yesu pasiawlri iniane, si iya kai, 39“Lu mutavanana, si pelaela ku tapasikaiyane muswane ki Twaumase.”

Kwini lasu la katwase, dadavace salraelre ki lacekele, si pelaelaela ku tapiane ki Yesu pasikai iniane.

Lalake ki Yairu si kiapucaemane ku siaeraeraerai ka ababai

(Matai 9.18-26; Maruku 5.21-43)

40Ku Yesu sa siwlriwlri mubalrealreanane ki baiyu, ku mapapangale la kiraragai kidredresenge iniane, asi lwiyane mwakalavalava makanaelre iniane ku akelaneini. 41Yakai ku tangea ku mabelenge ki tarakadrekadrenge ki rarubwane ki swa Yuda, ka sia Yairu, ka maiyalri kainganai. Kai lasu la pidruru icucubungu ki drapale ki Yesu, kitubi ki Yesu ku amwane ki daaneini, 42asi lwiyane kudra tara 12 ku caili ka vaeva ka lalakeini ka ababai lri padalrunga si pacai.

Kai Yesu sakatwatwase yai, kudra laumawmase ku yacucubungu ku yalrilrikudru la madrikidrikisi papia iniane. 43Yakai ku tangea ku ababai ku tara 12 ka caili kipucaemane ki siaerai; kwini alisu akaelrenga ku paisuini kisulrau ki latarasulrasulrau#8.43 Yakai ku lasidrumane ku hungu ku kai wapacase kikai “kwini alisu akaelrenga ku paisuini kisulrau ki latarasulrasulrau” (drela ki Maruku 5.26)., laka kadrwana ku umawmase ku wadulru pawdringai iniane. 44Kwi alisu la katwase mulrilrikudru ki Yesu, si sulrape pababiabila ki sapakabelebelengane ki laimai ki Yesu, kudra caemaneini la makakaai idrengere. 45Ku Yesu la kivaga iya kai, “Aneane kwini kiarecenge nakwane?”

Ku laumawmase la makitu kithungu makanaelre. Ku Pitiru la iya kai, “Sinsi, kai cucubungusu si lrilrikudrusu, tali virisu tali vanalesu kai laumawmase, makitu drikidrikisi muswane!”

46Ai amia kai ku Yesu, “Yakai kai umawmase ku kiarecenge nakwane, asi lwiyane wathingalaku yakai ku puku twalai ki kinawmasaneli katwase!” 47Kwini alisu la thingale ka kiapatarathingalenga, la manugiligili ki mukuludrane kainganai pidruru icucubungu ki Yesu, icucubungu ki laumawmase pelaela ki Yesu, ku takirecenganeini iniane, si tangimianeini kipawdringai. 48Ku Yesu la iya kai iniane, “Lalake, kwini salrwanesu palribulunga muswane! Lu kasulivalivatanga katwase.”

49Ku Yesu saicengecenge kawrivariva kikai vaga yai, yakai ku umawmase ku twalai ki daane ki mabelenge ki tarakadrekadrenge ki rarubwane ki swa Yuda kiasaswarau kainganai, si pelaela ki Yairu, “Wapacainga ka lalakesu, asi vangaavangana ki Sinsi.”

50Ku Yesu sakilalra la iya kai ki Yairu, “Madha mukulukuludru, kasalrwa sikakathane! Kwini alisu lri tara mudringai.”

51Ku Yesu sakelanga ki daane ki Yairu ki kwidra, kathane ku Pitiru, Yuhani, Yakubu, si marudrawdrange kwini ki lalake ka ababai, kai palraingi ki drumane patupalra iniane mudaane. 52Ku yakai kwini ku laumawmase makitwa tubitubi makanaelre kai ki lalake ka ababai. Ku Yesu la iya kai, “Madha tubi! Kikai lalake ka ababai kai wapacai, masipelrenge.”

53Ku laumawmase la makitu ulralrakai iniane, asi lwiyane kwini laumawmase wathingale ala ka wapacainga kikai lalake ka ababai. 54Ku Yesu la arake kwini ki alrimaini, si akwadrau iya kai, “Lalake, ngidrakala!” 55Ku abakeini la siwlri, si makakaai ngidrakale. Ku Yesu la pelaela liniane baadha ku akaneane si pakane iniane. 56Kwini marudrawdrange ki lalake la kasamali turamuru, ku Yesu la pakipapawlringau cunu liniane, madha pelaelaela kikai tangimiane ki sanaka aneanenga ka umawmase.

Currently Selected:

Luka 8: NDV

Highlight

Copy