Luka 9

Ku Yesu siakawlu ki ta 12 ka situ

(Matai 10.1, 5-15; Maruku 6.7-13)

1Ku Yesu wasarubu ki ta 12 ka lasituini, si baai liniane ku puku ku adulrwane pakatwase ki aidridringane si apawdringadhane ki lacaemane, 2si sikawlu liniane pakatwase pelaelaela ku vaga ki kuni ki Twaumase, si pawdringai ki macaeme ka laumawmase. 3Ku Yesu amia kai ki lasituini, “Lu mubabadhane numi, sanaka manemane madha ililuku; la madha ililuku ku ukudru, madha ililuku ku samubababadhanane ka kadrai, madha ililuku ku akaneane si paisu, la madha ngudrusadrusa ku sapakadriadringane ka laimai. 4Adravane mwa kidruanga, ku mwabangalre tarumara numiane pasudalru, kunumi wamwa madu ikai, pakeela ku takatwasane numi kwini. 5Lu kipadradresenge numi ku kai paswadalru numiane ku umawmase, lu lri katwase numi kwini ki cekele yai, visivisanga ku yakai ki drapale numi ku thuvugu, sapelaelane pakipapawlringau liniane.”

6Kwini lasitu la katwase, salraelre dadavace ki cacekele, pelaelaela ku hukuingi, mwa kidruanga pawdringai ki macaeme.

Kavangavange ki Hirudi

(Matai 14.1-12; Maruku 6.14-29)

7Ku Hirudi ka talialalai ki swa Galrilri sakilalra kikai tangimiane patuelre, ku kidremedremeini la kavangavange turamuru, asi lwiyane yakai ku umawmase ku amia kai, “Siaela panianiake ku tarapabanau ka Yuhani.” 8La ikai ku umawmase ku Ilria ka mwataluvaivai amiya; la ikaiyana ku umawmase ku sidrumane ka tangea ka yuginsia ka siaelane amia. 9Ku Hirudi la iya kai, “Wavathalenga naku ku awlru ki Yuhani, kikai lasu laka aneeanenga? Anau kilalrana kikai makaalra ku patharwakai iniane.” Lakamani ku apidreleini ki Yesu.

Pakabucuku ki ta 5,000 ka umawmase ku Yesu

(Matai 14.13-21; Maruku 6.30-44; Yuhani 6.1-14)

10Ku lanisikawlane siaulri kainganai, si pelaela patuelre ku takaungane lini ki Yesu. Ku Yesu la iluku liniane, pangwa kibubuuli mwa kudra ki vaeva ka cekele ka sia Bithesaida. 11Ku laumawmase sathingale, la tupapalra iniane katwase. Ku Yesu la kiraragai liniane, si swaceacenge pelaela ku patharukai ki puku ki Twaumase, si pawdringai kudra ki mwarikai ku akipawdringadhane ku umawmase.

12Salrilriwgu ku vai, kwini ta 12 ka lasitu la kela kikawriva ki Yesu, si iya kai iniane, “Ala pasawvagavagadha ki laumawmase, lani mwa kai ki ngwadadethe ki lacekele silape ku akaneane lini si lrika tasuladhane lini, asi lwiyane adaili ki lacekele kikai.”

13Ai ku Yesu amia kai liniane, “Kunumi baadha ku akaneane liniane!”

La iya kai kikai lalasu, “Lrialrima kai pange si drwadrusa kai kange kai pikai nai. Ani katwase langai ku akaneane si baai pakane kikai ki tapangale ka umawmase amiasu?” 14(Sakamani kwidra, ku sawvalai lri ikai ku ta 5,000.)

Ku Yesu amia kai ki lasituini, “Patukwakudha kai ki laumawmase si panene, ku vaeva ku kemi lri ikai ku tamalrimale.” 15Ku lasitu la pangimia ku taiyaneini, si panene ki mapapangale. 16Ku Yesu la malra kwini lrima ka pange si drusa ku kange, la paswabelenge, si kiaseasene ki Twaumase, ala malra apapipithingi, si patarumara ki lasitu, ku lasitu la apavalavala ki laumawmase. 17La makitu kane makanaelre, si makitu kabucuku. Ku lasitu la sarubu ku tedrane ku sangukaneane, si pasuete ki 12 ka karadrare.

Ku Pitiru wathingale ki Yesu ala ka Kirisitu

(Matai 16.13-19; Maruku 8.27-29)

18Yakai saka kiningivalane, ku Yesu la tangeangea inulrinulri, ku lasitu la kela drele iniane. Ku Yesu la kivaga liniane iya kai, “Kai lamapapangale aneane amiamia nakwane?”

19Kwi lalasu la tubalre, “Yakai ku tarapabanau ka Yuhani amia; yakai ku Ilria amia; la ikai ku sidrwadrumane ka tangea ka yuginsia ka siaelane panianiake amia.”

20Ku Yesu la kivaga liniane, “Kunumi? Aneane amiamia numi nakwane?”

Ku Pitiru la tubalre, “Kusu cegecege ki Twaumase ka Kirisitusu.”

Pakanaswala kawriva ku akipakwalrianeini si apacadhaneini ku Yesu

(Matai 16.20-28; Maruku 8.30–9.1)

21Lakamani, ku Yesu la pakipapawlringau cunu liniane madha pelaelaela ki sanaka aneaneaneanenga kikai iya. 22La pacungulwana iya kai, “Kai Lalake ki Umawmase lri tara kipadradresenge ku makalra ku akipakwalriane, lri kikalrase ki laciwru, ki lamarudrange ki labarakalai, si latarabulrubulru ki Sisiu, lai lri kipapacai, si luka samakatulrulu lai sielane panianiake.”

23Ku Yesu la iyana kai ki laumawmase, “Alaiyasi ikai ku nau tupapalra amia nakwane, lri ngiacacilri, si lukakaiyaiyaiya angeale ku ziwzikaini kainganai tupapalra nakwane. 24Asi lwiyane kudra kiadremedreme ku nau palribulu ki niakeli ku amia, lri sakacilri kamani kwini niakeini; kudra pasiakai nakwane cilri ku niakeini, lri kamanilringa kudra kiapalribulu ku niake. 25Kudra tangea ku umawmase adravane malra kai kawmasane patueelre, lalri ngicacilri si tusabalrithane kwini niake, manemane ku amuesadhane? 26Lwiyasi ikai ku umawmase ku ngwalai nakwane si vagali la tainu, ku Lalake ki Umawmase lu ikai ki lriguini, si ikai ki Tamaini si lasasiakawlu subelebelenge kudra ki lrigu lu mutakelane, lri mialri tainu iniane. 27Nau pudriadriingai pelaela numiane, ku acegecege ikai kai ku umawmase, yakai kai lu kaiyana pacai lri dreleana lu mutaluvayvai ku puku ki Twaumase.”

Akabalrithi ku tangimiamiane

(Matai 17.1-8; Maruku 9.2-8)

28Sa kawrivanga kikai lavaga ki saka makavalrulu ka vai, ku Yesu wailuku ki Pitiru, Yuhani, si Yakubu mulregelrege inulri. 29Ku Yesu sa inulrinulri la akabalrithi ku tangimiamianeini; ku laimaini mialri akabalrithi kapuli si ledra. 30Ala kiriimu ikai ku tadrusa ku umawmase ku mwataluvaivai adrelane si kikawriva iniane, kikai tadrusa ka umawmase amani kwidra Musi si Ilria. 31Kai tadrusa yakai ki lrigu adrelane, si kikawriva ki Yesu ku lrika aikaiyaneini Yerusalrime arakai ku apacadhane si patulrepenge ku kisikawluini ku awngane. 32Ku Pitiru si papalraini la makitu kasipelrenge; kwini lalasu sapacunu, la drele ku lrigu ki Yesu si kudra taelre iniane acegecege ka tadrusa ka umawmase. 33Kwini tadrusa salri katwase kwidra, ku Pitiru la iya kai ki Yesu, “Sinsi, kai taikaiyaneta kikai mathariri turamuru! Ala nai tudaane tutulru ku balrawbau, ku vaeva anika muswane, ku vaeva anika Musiane, ku vaeva anika Ilriane.” (Kai lasu kai ngiathingale lukamanemane ku kawrivarivaini.)

34Sa kawrivarivana kikai lasu icengecenge, yakai ku ememe ku mwataluvaivai, ku alalingu la kabungu liniane, sa ngudadethe ku ememe, la makitu mukuludru ku lasitu. 35Ala ikai ku lingau twalai ki ememe pelaela, iya kai, “Kikai Lalakeli, ka pilrili. Kunumi kilalra iniane!”

36Sa idrengere kwini lingau, kathane ku Yesu tangeangea ikai kwini. Ikai kwini ki minaka pialane ka vai, kwi lasitu pangukai kwini yaceelrebe, kai matiakaikai pelaela ki sanaka aneanenga kudra tadrele lini.

Pawadringai ki kiaikai ki aidridringane ka vavalake

(Matai 17.14-18; Maruku 9.14-27)

37Sakakaiyane, kikai lalasu sa twalai lregelrege mulrawdru, yakai ku takaalra ku umawmase ku wakela kidredresenge ki Yesu. 38Kwini ki laumawmase ala ikai ku tangea ku watawtau iya kai, “Sinsi, kiatubiaku muswane palribula ki lalakeli, amani ku beraberathane ka lalakeli! 39Ku aidridringane tatusinalrelrelremeane iniane, la kirimu tawtawtau iniane, si la pangikekele iniane, si tulrawlrawlrapucu ku ngudwi; ku aidridringane kai yadrengere ku akabebetethane iniane, si kai lri pagulra! 40Kiatubiaku ki lasitusu ku apakatwasane ki aidridringane, ai kwi lalasu kai maka watumane.”

41Ku Yesu la iya kai, “Kunumi ka zidai kikai ka laumawmase ala kadrwa ku salrwane numi turamuru, ka ngialisianenga turamuru! Lri tarathainwanaku ikai numiane? Lri kiadiliana naku tarathainu numiane?” La Pacungulu kawriva kwini ki lasu iya kai, “Malra iluku ki lalakesu ka sawvalai mwa kai.”

42Kwini lalake sa kela, ku aidridringane la alra patubakebake iniane picakena, la ngikekekele kai idrengedrengere. Ku Yesu la kaelaelathe kwini ki aidridringane, si pawdringai kwini ki lalake, la alra iniane baai ki tamaini. 43Kudra lamapapangale la kasamali turamuru ku puku ki Twaumase.

Ku Yesu peaeelanga pakanaswala pelaela ku apacadhaneini

(Matai 17.22-23; Maruku 9.30-32)

Kudra laumawmase saicengecenge kasamalimaliana ku pia ki Yesu patuelre, ku Yesu amia kai ki lasituini, 44“Madha karimurimuru kai apelaelaneli numiane kai vaga: Ku Lalake ki Umawmase lri kipatarumara pikai ki alrima ki umawmase.” 45Ai kwi lalasu kai pwalringalringau ku pacugane kikai vaga; asi lwiyane ki kwidra patharevane kai malalrwai, la kai maka thingale pulringalringau kwi lalasu. Kwi lalasu la mukuludru si kai maka kivaga ku pacugane kikai tangimiamiane.

Aneane ku sanianiangenga

(Matai 18.1-5; Maruku 9.33-37)

46Kwi lasitu madrikidrikidrikisi lukaaneane ku sanianiangenga ikai liniane. 47Ku Yesu wathingale lukamanemane ku kidremedremedreme lini, la dawlu pakainganai ku tangea ku vavalake, si paacegecege iniane ngipapithili, 48ala iya kai liniane, “Kudra ngwalai ki naganeli si tarumara pasudalru kikai ki vavalake, maru tarwamara pasudalru nakwane; kudra tarwamara pasudalru nakwane, maru tarwamara pasudalru kwidra ki siakawlu nakwane pakainganai. Ku kiatutitikithanenga ikai numiane, amani ku kiatusanianiangenga.”

Wabaebalre si palraingi

(Maruku 9.38-40)

49Ku Yuhani la iya kai ki Yesu, “Sinsi, wadrele nai kudra umawmase ku pangwakai ki naganesu si pakatwase ki aidridringane, la paisadra nai iniane, asi lwiyane kwini lasu kaika rededelaneta.”

50Ku Yesu la iya kai liniane si kwini drumane ka lasitu, “Madha pakaicicilri iniane, asi lwiyane kudra kai wabaebalre numiane, amaani ku palrainginga numiane.”

Kai tarwamara ki Yesu ka cekele

51Sa padalrudalrunga ku vai ku akimalrane pusubelebelenge ki Yesu, malrithetheana ku akatwasane papia Yerusalrime, 52la sikawlu ki umawmase paswalala. Kai lalasu la daruru Samaria kudra ki vaeva ka cekele, lri pasikai ki Yesu padulru sanaka manemane. 53Ai kudra swakai kwini ka laumawmase kai kiararagai kidresenge iniane, asi lwiyane kai lasu athingalane ka lri papia ka Yerusalrime. 54Kudra situini ka Yakubu si Yuhani sadrele kikai tangimiamiane, la iya kai, “Tamatama, ani dawlu amiasu naiane#9.54 “ani dawlu amiasu naiane” yakai ku sidrumane ku hungu ku amia kai “ani ngialrau ki Ilria dawlu amiasu naiane”. kudra ki apwi subelebelenge si la lama pakamudu liniane?”

55Ku Yesu la ngibangulu si kaelaelathe liniane#9.55 Yakai ku sidrumane ku hungu ku padrima ku vaga ikai lrilrikudru ki “kaelaelathe liniane” kikai vaga amia kai “kai numi wathingale ka ngitwatumane numi ka ri; asi lwiyane kudra patharevane ku takelane ki Lalake ki umawmase, kaika lri amudu ki niake ki umawmase, lri palribulu liniane” amia.. 56Kwini lalasu la katwase mwa talidrumane ki cekele.

Ku lri tupapalra ki Yesu ku umawmase

(Matai 8.19-22)

57Ku sa ikadadalranane kai lalasu, yakai ku tangea ku umawmase ku amia kai ki Yesu, “Adravane muinininusu, lri tara tupapaalraku muswane.”

58Ku Yesu la pelaela iniane, “Ku kalailalri yakai ku barungulu, ku adhadhame la ikai ku lisisuku, ai ku Lalake ki Umawmase adravane ka asitawlrwanane kadrwa ku taikaiyane.”

59Kwini lasu la iya kai ki tangea ka umawmase, “Bwala tupapalraili!”

Ai kwini lasu amia kai, “Tamatama, nau katwaseana siwlri si dralrekeana ki ama.”

60Ku Yesu la iya kai, “Kudra wapacai ka umawmase ani katwasenga dralreke ki wapacai! Ala kusu, lri katwasesu pelaelaela ku hukuingi ki kuni ki Twaumase.”

61La ikaainga ku tangea ka umawmase ku amia kai, “Tamatama lri tupapalraku muswane, ai ala pakipusawanaili ki wacekecekeleli.”

62Ku Yesu la iya kai iniane, “Kudra waecenge ku pavilringi si pavilrivilringi luiyasi la kai telrai paswalrikudru drele, papia ki kuni ki Twaumase kadrwa ku paluludane!”

Currently Selected:

Luka 9: NDV

Highlight

Copy