Luka 10

Ku Yesu siakawlu ki ta 72 ka umawmase

1La kai tarathainu, ku Tamatama la pilri ku drumane ku ta 72#10.1 Kikai aswalalanga si mwasaka 17 ka vaga, kudra “72”, yakai ku lasidrumane ka hungu ku “mapitulu” amia. ku umawmase, la sikawlu liniane pakatwase, patarudradrusadrusa, si paswala mwa kudra ki lrika amwaneini lrikape ka cacekeceekele. 2Ku Yesu la kawriva liniane, “Makalra kai akitalekane, la tabekele ku tarakaungu ku umawmase. Lakamani, kunumi kitubia ki Tamatama ki umawma lani pakainganai ku takaalra ku tarakaungu ku umawmase kela kitaleke kai talekeini. 3Lu katwasanga! Lri sikawlaku numiane pakatwase, mia kudra ki lri kisatedre pwa ki taikaikaiyane ki tawpungu ubulane ka lrulai ka kiu. 4Madha ililuku ku tapaiswane; madha iluiluku ku samubababadhanane ku kadrai; madha iluiluku ku kece; la madha isadrasadra ikadadalranane si kikawriva ki umawmase. 5Adravane mwa numi ki daane ki aneaneanenga, tara paswala madu iya kai, ‘Anu kasulivaliivate ku tacekecekelane numi!’ 6Alaiyasi ikai kwini, la ikai ku madalame ki rathudane, kudra kitubitubi numi ku sulivatane lri papia iniane; lu kaika ngimiyaiya kwini, lri papia numiane kudra sasubulrubulrwane. 7Kunumi wamwa madu ikai kwini ki daane, la kanekane si ungungulu ku baai lini, asi lwiyane kudra tarakawaungu lu kipawlrawlrau tangimiamiane. Madha twalalai kai ki daane taluela mwa ki drumane ka daane. 8Adravane muinu numi ki cekele, alaiyasi ikai ku kiararagai kidresenge numiane, la pasikai numiane padulru ku laakaneane, tarumara si kane, 9si la pawdringai ki lamacaeme ki swakai kwini, pelaela liniane iya kai, ‘Lri padalrunga si mutaluvaivai ku puku ki Twaumase ikai numiane.’ 10Ai, alaiyasi mwa numi kudra ki vaeva ka cekele, kwini swakai kwini ku umawmase lakai kiraragai kidresenge numiane, kunumi mwa kwini ki kadalranane ki cekele si pelaela iya kai, 11‘Adravane kikai ceekele numi kudra wadakipi ikai ki drapale nai ku thuvugu, lri visivisi nai, tusapelaelane pakipapawlringau numiane. Ai kunumi tara pulringava, lri padalrunga si mutaluvaivai ku puku ki Twaumase!’ 12Nau pelaela numiane, ikai kwidra ki asaibangane ka vai, ku takipathavungane ki swa Sudume lrika maliapapaiyana ku takipathavungane kwini ki cekele!”

Kai masalru ka cekele

(Matai 11.20-24)

13“Swa Kerazine, lri kipadradresengesu ku amatikurwane! Swa Bithesaida, lri kipadradresengesu ku amatikurwane! Ku taikaiyaneli numiane si pia ku pinangu Twaumasane ka puku ana piane ikai ki swa Tayre si swa Sidune, kwi swakai kwini ku laumawmase nai neneenga ikai daedae, si ngikakabungu ku kaimadhane la ngicacabungu ku abu, ka sapelaelane kwini ki lalasu ala ka wacilringa ki ngialisiane si papianga ki madringelrese! 14Ikai ki tasaibangane ka vai, ku akipathavungane ki swa Tayre si swa Sidune lrika maliapapaiyana ki akipangimiane numi! 15Ala kusu, ka swa Kaperenawme, lri ngitatwabelengesu keela subelebelenge? Lri kipatubakebakesu pulebe mwa swadriadringi!”

16Ku Yesu la iya kai ki lasituini, “Kudra kialalra numiane amani ku kialalranga nakwane, kudra kai tarwamara numiane amani ku kai tarwamara nakwane; ku kai tarwamara nakwane kai tarwamara kwidra ki siakawlu nakwane.”

Wakelanga kwini ta 72 ka umawmase

17Kwini ta 72 ka umawmase la kirararagai kela, si pelaela iya kai, “Tamatama, pangwakai nai ki naganesu drekase, adravane ka aidridringane la kilalra pasalaladha naiane!”

18Ku Yesu la iya kai liniane, “Wadrelaku ki Satange mia ki lrikace twalai subelebelenge tuverevere. 19Kunumi kilalra! Wabaainga naku numiane ku puku, lai lri dulru numi dredre ki sulrau si apapase, lai lri dulru numi sabelenge ki sanaka puku ki badha numi, kadrwanga ku lri dulru kabebetethe numiane. 20Ai, madha kirimurimu ngwalai ki tapasalaladhane ki aidridringane numiane si kiraragai, pasikaiya kamani ku takipacasane ku nagane numi ikai subelebelenge si kiraragai.”

Takiragadhane ki Yesu

(Matai 11.25-27; 13.16-17)

21Ikai kikai kwidra, ku Yesu kiakandu ki Siri#10.21 “Siri” yakai ku lasidrumane ka hungu ku “ri” amia; la ikai ku ladrumane ku “rini” amia. si kisuete ki sakiararagai, si iya kai, “Ama ka yabelenge, ka Tamatama ki belenge si kawmasane, kiaseasenaku muswane; asi lwiyane kudra balabalaisu papia ki malrigili, ki yakai ku thingalane ka umawmase, peaelaelangasu putaluvaivai papia kudra ki la kadrwa ku thingalane ka umawmase. Ama, unu, kudra takangimiyaiyane kai ku kelretesu patueelre twalai muswane ka mathariri!

22“Ku Ama wabaainga nakwane patueelre. Kathane ku Tama, kadrwa ku umawmase ku wathingale ki Lalake lukaaneane; kathane ku Lalake si kudra palraingi ki Lalake pelaela ka umawmase, kadrwa ku umawmase ku wathingale ki Tama lukaaneane.”

23Lakamani ku Yesu ngibangulu, si tetenge kawriva ki lasitu, “Kunumi lu dulru numi drele kilakikai patuelre yai mwaesai numi turamuru! 24Nau pelaela numiane, takaalra ku layuginsia si latalialalai ku kiasanu drele ku drelenga numi, ai kai maka wadrele; apia kilalra ku kilalranga numi, ai kai maka kialalra.”

Pathalrilriku patharukai ki mathariri ka swa Samaria ka umawmase

25Yakai ku tarabulrubulru ki hulrice wakela kituthiathingale ki Yesu, si iya kai, “Sinsi, lri tumanaku si dulru tarumara ku apalralrawthane ka niake?”

26Ku Yesu la iya kai, “Ku taiyane ki hulrice ka hungu tumanamia? Watumanesu swacenge?”

27Kwini lasu la tubalre iya kai, “Kusu pakaelrea ku kidremedreme, ku gathimi, ku puku, ku takidremedremanesu kilibake ki Tamatama ka Twaumasesu, si la kilibake ki pasiagiagisisu, mia lu ngikakilibakesu.”

28Ku Yesu la iya kai iniane, “Pacengecenge kwi tatubalreanesu, ala pangimia kikai, lri dulrusu tarumara ku apalralrawthane ka niake.”

29Kwini tarabulrubulru ki hulrice la pakai ku apathingalane ala ka saawlrwane, la kivaga ki Yesu iya kai, “Aneane ku pasiagiagisili?”

30Ku Yesu la iya kai, “Yakai kudra umawmase ku twalai Yerusalrime mulrawdru mwa Yeriku, sa ikadalranane la kipadradresenge ki sadre. Kwini lalasu la mulaimai iniane, si lrumai kisanu papacai iniane, la cilri iniane pikai kwini. 31La icengeecenge ikai kudra tangea ka barakalai ku ngwakakai kwini; kikai lasu sa drele kikai ki umawmase la lragau ngutalithili katwase. 32Laka thadalrane, yakai ku tangea ka swa Lrivi ku ngwakakai kwini lribate; kwini lasu la arwacucubungu drele kwini ki umawmase, maiyalri lragau nguthathili katwase. 33Ai yakai kudra tangea ku swa Samaria ku walribate ngukakai kwini ki umawmase, sadrele iniane, la tukurwane tukalithane iniane. 34Kwini lasu la mwa arakai ku lawlau si bava gugu pikai ki dulaini, si cabu ki dulaini, ala drakale iniane si pubelenge ki rubaini, si ililuku iniane mwa ki tasulasuladhane, ikai kwini siraparapale iniane. 35Sakakaiyane kwini lasu la malra ku drusa ku paisu, si baai kwini ki tawki ki tasulasuladhane, la iya kai, ‘Siraparapaala iniane, ala lu siwlriwlringa naku ngukakai kai, lri tara baadhaku patuelre ku sarakaiyane.’ ”

36Ku Yesu la kivaga iya kai, “Lu drelesu, kikai tatulru, aneane kudra apasiagiagisi kwini ki kiapadradresenge ki saadre ka umawmase?”

37Kwini tarabulrubulru ki hulrice la tubalre iya kai, “Amani kwini arakai ku thalradhane si marasikai kwini ki umawmase.”

Ku Yesu la iya kai, “Ala, lu katwasanga, si pangialrava kikai piya!”

Ku Yesu walrikape ki Maretha si Malria

38Ku Yesu si lasitu la pacuungulu ku kadalranane lini, si kela mwa kwidra ki vaeva ka cekele. Kikwini la ikai ku tangea ku sia Maretha ka ababai, la kidredresenge ki Yesu iluku mwa ki daaneini. 39Kai Maretha la ikai ku agini ka sia Malria. La kainganai nene icucubungu ki Tamatama, kilalalra ku sabulrwaneini. 40Ai ku Maretha ngwalai ki kalrane ku apiane ku awngane, la kawpungu ku kidremedremeini, la mucucubungu iya kai, “Tamatama, kai agili patangeangea nakwane pia kai makaalra kai awngane, kaisu kiasapalra? Ala kawriva iniane lani paralubu nakwane!”

41Ku Tamatama la tubalre, “Maretha! Maretha! Ngwalaisu kai ki laawngane la kawpupungu, 42ai yakai kudra taingeane ku kaika apakakadrwadrwane. Kai Malria laka wapilringa kwini ki mathaithaariringa; kadrwanga ku umawmase ku lri dulru patwalai ki alrimaini ribici.”

Currently Selected:

Luka 10: NDV

Highlight

Copy