Luka 11

Patharukai ki inulri

(Matai 6.9-13; 7.7-11)

1Yakai saka kiningivalane, ku Yesu la ikai kwini inulrinulri. Sa maka inulringa, la ikai ku tangea ku situ ku amia kai iniane, “Tamatama, ala bulrwa naiane inulri, mia ki Yuhani lu bulru ki lasituini.”

2Ku Yesu la iya kai liniane: “Kunumi iya kai inulri:

Ama:

Sanaka umawmase ani musakene ki saniange ka naganesu;

asu kamani ka magagemegeme ikai kawmasane.

3Patarumara naiane pivai#11.3 “pivai” ku wahunyake madu iya kai “lukakaiyane”. ku akaneane nai.

4Pacepa kai pasalrivane nai,

asi lwiyane maiyalri lu pacepe nai ki pasalriu naiane ku umawmase.

Madha pakipadradresedresenge naiane ku kai ka amalralremeane nai siamece ku akikituthiathingalane.”

5La pacungulu, ku Yesu pelaela ki situini, “Alaiyasi la ikai numiane saka kabiceacelrakane ki maungu wamwa ki daane ki talragini, si iya kai iniane, ‘Le, ala pakisalruaili ku tulru ku pange; 6asi lwiyane yakai ku talragili ku mwababadhane la kela ki daaneli, la kakadrwa ku apakananeli pasudalru iniane.’ 7Alaiyasi kwini talragisu la tubalre twalai daane, ‘Madha upungu nakwane, nielebanenga ku lrawlrawdru; kunaku si lalalakeli mialri itapeapecanenga, kainaku lri maka ngidrakale si malra ku manemane si baai muswane.’ 8Lai tumane? Nau pelaela numiane, adravane kwini lasu kai ngwalai saka talragini si ngidrakale baai ku pange iniane, lri ngwalai kwini ki umawmase ku kitubi turamuru si ngidrakale, si malra kudra murikaikaini ku lamanemane la baai iniane. 9Lakamani nau pelaela numiane, lu kitubi numi, lri tarumara numi; ku kiapasilape, lri kidringai; ku wabangebange ki lrawlrawdru, lri muelebe numiane. 10Asi lwiyane, kudra kiatubi, lri tarumara; kudra wasilape, lri kidringai; kudra wabangebange ki lrawlrawdru, lri kimuelebe. 11Ikai numiane aneane kudra tatama, lu murikai ku kange ku lalakeini, wabaailringa ku sulrau iniane? 12Ta luiya ku batuku, la baai ku apapase iniane? 13Adravane kanganga numi, wathiingaleana numi malra ku mathariri ku lamanemane baai ki lalalake numi; laikamaniyanenga ku Tama numi ka yasubelebelenge kai lrika makadrwadrwa malra ku Siri si patarumara kudra ki kiatubi iniane ka umawmase?”

Yesu si Belezebulu

(Matai 12.22-30; Maruku 3.20-27)

14Ku Yesu pakatwasenga kudra ki tangea ka menemenene ka aidridringane, sa katwasenga kwini aidridringane, kwini umawmase la dulrunga kawriva. Ku lamapapangale la kasamali turamuru, 15ai yakai kwini ki lalasu ku amia kai, “Kai lasu satalu ki talialalai ki aidridringane ka Belezebulu pakatwase ki aidridringane.”

16Mialri ikai ku laumawmase ku kiasanu tulisilisi iniane, la kitubi iniane ku apadrelane ku pinangu Twaumasane ka puku si paathingalane kwini piaini ala ka twalai ki Twaumase. 17Ku Yesu wathingale ka manemane ku kidredredreme lini, la iya kai liniane: “Sanaka kuni lu makalilisi, lri tara turaamuru si sipai; kudra wacekecekele lu makarivurivu, mialri lri tara kasuuburu kamudu. 18Alaiyasi ku Satange la makakarivurivu, kudra kunini lai lri tumane dulru maka acegecege? Ku pakatwaseli ki aidridringane yai satalu ki Belezebulu amia numi, 19alaiyasi ka ngiamia kai, ku lasitu numi lu pakatwase ki aidridringane laka satalu ki aneane? Ku lasitu numi lrika amani ku patwathingale ala ka pasalriu numi! 20Ku tengatengane, alaiyasi ka satalwaku ku puku ki Twaumase pakatwase ki aidridringane, kikai amani ku sapatuthingalane ku Twaumase yakainga numiane magagemegeme.

21“Lu ngirarukudru tupudriadringai ku tamagarange si kadrenge ki daaneini, lri kilakebe kudra lawbubuluini. 22Alaiyasi kela kudra sapupukwane ka tamagarange, si ruthuku iniane, lri malra iluku kudra satalutaluini ku adreme, si lai ribici kudra kupaini ku niseketane ku lawbubulu.

23“Kudra kai kiarederedelane nakwane amani ku wabaebalre nakwane; ku kai paralubu nakwane amani kudra wasubusuburu pasawvagavagai.”

Siawlri kela kwini aidridringane

(Matai 12.43-45)

24“Ku aidridringane sa kidailinga kwini ki ikaini ka umawmase, la salraelre dadavace ki takameamealane, si silasilape ku lrika taisadraneini, la kai maka kidringai, la iya kai, ‘Lri siwlriwlriaku mwa kudra ki nataikaiyaneli ka daane.’ 25Ala katwase siwlriwlri, la drele kwini ki daane laka madeemele si kabula ku talripethelane. 26Kwi aidridringane la katwasenga mulatadre, si kainganai mailuku ku tapitu ka ngiliilisiane iniane ka aidridringane, si ikai taelre iniane. Lukamiyaiya kai, sakabilrilanenga kwini umawmase laka pakilrialringau ngilisiane kudra ki natangimiamianeini ku paswalala.”

Patengatengane ka lri kaesai

27Ku Yesu saicengecenge kawrivariva kikai vaga, yakai ku ababai ku twalai ki laumawmase akwadrau iya kai iniane, “Kudra wathabange muswane si pathuthu muswane ka ababai tengatengane ka lri kaesai!”

28Ku Yesu la iya kai, “Kudra kialalra ku vaga ki Twaumase si pangimia ku umawmase amani ku patengatengane ka lri kaesai!”

Mwarikai ku pinangu Twaumasane ka puku

(Matai 12.38-42)

29Ki kwidra ku mapapangale la ngithalringulu ki Yesu, ku Yesu la pacungulu kawriva iya kai, “Kikai zidai kai umawmase ala ngialisianenga turamuru! Kwini lalasu ala kitubi ku apadrelane ku pinangu Twaumasane ka puku, ai kathaanenga ku pinangu Twaumasane ka puku ki Yuna, kadrwanga ku drumane ku pinangu Twaumasane ka puku ku apadrelane liniane. 30Ku Yuna pangiatumane si padredrele ku pinangu Twaumasane ka puku ki swa Ninivi, ku Lalake ki Umawmase lrika miyaiya ikai kikai ki zidai. 31Ikai ki tasaibangane ka vai, ku swa tali lrawdru ka ababai ka talialalai lri acegecege si kukusu numiane ki kai zidai kai ka umawmase, asi lwiyane kwini alisu singiadaili turamuru kainganai kilalalra ku thingalane ku vaga ki talialalai ka Sulumungu. Nau pelaela numiane, kikai yakai kai madradrau ki Sulumungu ku awngane! 32Ikai ki tasaibangane ka vai, ku swa Ninivi lri acegecege si kukusu numiane, asi lwiyane kwi lalasu sakilalranga ku tabulrwane ki Yuna makakaai cilri ku ngialisiane si ngitatupela. Nau pelaela numiane, yakai kai awngane kai madradrau ki ngwakai ki Yuna!”

Ledra ki kinawmasane

(Matai 5.15; 6.22-23)

33“Kadrwa ku umawmase ku padalai ku tinaki si sekete pumakadringane si ku pwadringi ki balrungubungu; ngiabalre kamani, kwini lasu lri tara maalra pubelenge kwini tinaki pikai ki tatinakiane, ku lrika akuledrane ki mwadaane ku umawmase. 34Kwi macasu maru tinakinga ki kinawmasane. Lu kathariri ku macasu, lri leedra patueelre ku kinawmasanesu; lu kalisi ku macasu, lri kadradrimiti patueelre ku kinawmasanesu. 35Lakamani, kipapawlringava, amani lu akabalrithi adradrimitane kwini yadringi muswane kwi ledra. 36Alaiyasi kwini kinawmasanesu la suete ku ledra, ka kadrwa ku dradrimitane, lri sarau ku ledra, mia ki tinaki ka paledra muswane.”

Maelaelathe ki swa Palrisai si tarabulrubulru ki hulrice

(Matai 23.1-36; Maruku 12.38-40)

37Ku Yesu sa makakawrivanga kikai lavaga, yakai ku tangea ku swa Palrisai wadawlu iniane pakane ku aga, kai lasu la mudaane kilringulu. 38Kikai swa Palrisai sadrele ki Yesu salri kane ku aga kai paswala tawlrima, la kasamali turamuru. 39Ku Tamatama la iya kai iniane, “Kunumi ka swa Palrisai waalra numi sinau pakabuula ku belenge ki lakupu si usara, ai ku adringi swaeete ku ravane si apangilralraingane ki kinawmasane. 40Kadrwa ku thingale ka umawmase, kudra wabekace kai ngwalalatadre ka Twaumase kaika maiyalri ka wabekace ki adringi? 41Sana malrane kwini yadringi ki kupu si usara kwi lamanemane si baai ki matiakukuru ka umawmase, papia numiane lu iyane mabulanga patueelre.

42“Kunumi ka swa Palrisai lri kipadradresenge numi ku amatikurwane! Wamalra numi kudra la sapaibibwane pasanguesai, maru athape, lalikange, si drumane ka sapasangulrelremane, patarumara tuziwbunuici baai ki Twaumase, ai twadrekase numi kudra ki dringelresane si sakialibake ki Twaumase. Kudra patengatengane, ala amani kikai ku lrika atara pangimiane numi; kudra drumanenga, la mialri madha tudrekase.

43“Kunumi ka swa Palrisai lri kipadradresenge numi ku amatikurwane! Madalame numi kudra mwakalrivili irarubwane ku taneneane, la murikai ku akisukubane ki umawmase ikai rarubwane ki swa Yuda. 44Kunumi lri kipadradresenge numi ku amatikurwane! Asi lwiyane mia numi kau amani kudra kadrwa ku sapatuthingalane ka balriu, ku la ngwababelebeelenge lribate ku laumawmase, ai kai wathingale ala ka balriu.”

45Yakai ku tangea ku tarabulrubulru ki hulrice ku amia kai ki Yesu, “Sinsi, lu iyasu kikai, maiyalri nai kitudrekase!”

46Ku Yesu la tubalre, “Kunumi ka tarabulrubulru ki hulrice mialri numi ka lri kipadradresenge ku amatikurwane! Wamalra numi ku matelrege ku atukudrane ka amece si paangeale ki palrapalra, ai kai numi mwabangalre velevele ku dadiputhane si paarukaliapai ku amece ki palrapalra. 47Kunumi lri kipadradresenge numi ku amatikurwane! Pasiakai numi ki layuginsia pudriadringai tutadralredralrekane, ai kwini layuginsia amani kwi cucungulane numi ka papacai. 48Laka ngimiyaiya kai, kunumi peaelaelanga numi ka palraingi numi ku tapiane ki cucungulane numi; ku cucungulane numi papacai ki yuginsia, la pasikaikai numi ki yuginsia tupudriadringai ku tadralredralrekane. 49Lakamani, ku lrigilane ki Twaumase naamianga kai ‘Lri sikawlaku ki layuginsia si lanisikawlane mwa liniane kwini; yakai ku lri kipapacai liniane, yakai ku lri kiahakegai liniane.’ 50-51Ngwalai kikai, twalai ki satawbekace kai kawmasane, ku pasalrivane ki sanaka papacai ki layuginsia, kamani ku twalai sa kipapacai ku Abele, pakeela ku taikaiyane kabicelrakane ki tapatarumaramarane si Alrivilrivi ka taikaikaiyane kipapacai ku Zakaria ka kiame ka erai, patuelre lri ikai kai ki zidai kai balrithi. Unu, nau pelaela numiane, kai ki zidai kai ki umawmase lri tara ngwalai kikai patuelre si kipathavungu!

52“Kunumi ka latarabulrubulru ki hulrice lri kipadradresenge numi ku amatikurwane! Kunumi wamalra numi ku samuelebane ki drawsulu ki athingalane ka sukusuku, kai numi apia mudaane, si kai numi pawdaane kudra ki apia mudaane ku umawmase!”

53Ku Yesu sa katwasenga kwini, kudra tarabulrubulru ki Sisiu si swa Palrisai la pathagili kawriariva tulilisi iniane pakilringau, kivavaga ku makaalra ka makucingalre ku mendai iniane, 54lri silape ku atakaiyane kabebetethe iniane.

Currently Selected:

Luka 11: NDV

Highlight

Copy