Habakuke 2
2
Ku Tamatama twabalre ki Habakuke
1Lri kapaku mwa palralramathane, si drele ukalava lukamanemane ku aiyane nakwane ki Tamatama, la drele iniane lulri tumanaiya tubalre ku tasidrurwaneli.
2Ku Tamatama la tubalre nakwane iya kai, “Lri pacasesu pudriadriingai ku pelaelali muswane pikai ki labaali, sana drele ku umawmase lani makakaai dulru silrigu. 3Kusu malra pacase, asi lwiyane kudra lrika angimiane ka vai kaiyana wakeela. Ai lri padaalrunga si kela ku vai, ku pelaelali muswane lri padaalrunga si ngimia. Ani ngiabalainga alau lri iyasu, ai mukalavaa, lri tara ngimiya, si lai lri kai pwigananenga. 4Amani kikai ku pelaelali muswane ka vaga, ‘Ku manganganga ka umawmase lri kai maka panianiake, ai ku madringelrese ka umawmase lri ngwalai ku tapakaelreeane ku salrwane#2.4 “tapakaelreeane ku salrwane” ku wahunyake madu iya kai “salrwane”. si tarumara ku niake.’ ”
Ku kai madringelrese ku umawmase lri kimwa ku amatikurwane
5Kai tacekecekelane kaika asudralrwalrwane. Ku marau ka umawmase ngiakalrilrigu, kai maka yasaselebe, mia ki wapacai, palralrawthu kai ngulwalwadhane. Kwi lalasu pamalebenga ki vaeva ka kuni la pamaleebenga ki vaeva ka kuni, ala yakai kai ku tatwaladhane. 6Kudra kiapamalebe ku laumawmase lri pusu liniane, si kaelaelathe liniane iya kai, “Wamalra numi ku lamanemane ki palrapalra si ngitatu lamanemane, lri kimwa numi ku amatikurwane! Ku satalu numi malra ku kiame si satacekecekelane lri pakela numi lwigane?”
7Lu kaisu thingathingale, kusu ka pamalebe ki palrapalra ka umawmase lri kamaningasu ku akiame, si lai lri kivutha pamukiame ku makaakalra ku lalake. Ku badha lri kela upungu muswane; si bulathe muswane. 8Nawaravasengasu ki takaalra ka kuni, kaiasasane kudra laabalu ku umawmase lri ravase muswane; asi lwiyane papacaisu ki umawmase, la pakwalrisu ki umawmase kawmasane si lacekele lini#2.8 “umawmase kawmasane si lacekele lini” ku wahunyake madu iya kai “kadaengane, cekele, si yakaikai kwini ka laumawmase”. Mararamau ku yakai ki 2.17 ku taiyane..
9Kiamwangasu ki amatikurwane! Arakaisu ku tabulathanesu si pangiradhekane ki daanesu. La pikai ki taabelengane tulisisuku pakai ku auberane ki matikurwane. 10Ai kwi lrigilanesu papia ki ngialisiane lri kamani ku pakiarubwane papia ki daanesu. Pakamudusu ki taikalrane ka kuni ka laumawmase, la ngidadawdawlu ku akamudane. 11Adravane ka balingibingi ka lrenege lri karaleale kikaruburu muswane, lri mialri iya kwini karaleale ku bulri ki daane.
12Kiamwangasu ki amatikurwane! Arakaisu ku pasalrivane tucekele, la arakaisu ku apapacadhane si cegecege ku cekele. 13Ku nasakwalrialrisu pamalebe ki laumawmase si takisamulamulanesu kadrwanga ku paluludane; ku tudaane lini kwalama patueelre. Kikai yai tapiane ki Tamatama ka abebeelengenga ki sanaka kwapingi. 14Ai, kai kawmasane lri kitulrepenge ku tathingalane patharukai ku lrigu ki Tamatama, mia ki laveke ka swaete ku acilai.
15Kiamwangasu ku amatikurwane! Ikai ki elathanesu twasinalremesu ki pasiagiagisisu; la malrasu liniane palridrawdrawdrau mia ki mabusuku ka umawmase. 16Lai lri mialrisu ka akiarubwananenga, kawlrawnga ku lrigu. Lri ngwalaisu ki busukane lridrawdrawdrawnga dadavace. Ku Tamatama lri paungulu ku sakipathavunganesu ku kupu; ku lrigusu lri akabalrithi ka akiarubwaananenga. 17Wacalrigisu ku angatungatu ka Lebanungu, kikainga lri kicalrigisu. Papacaisu ku lawaudriwdripi ki yakai angatungatu, kikainga lri kukuludrunga muswane kai lawaudriwdripi. Kikai yai lai tara ngimiya; asi lwiyane papacaisu ki umawmase, la pakwalrisu ki umawmase kawmasane si lacekele lini.
18Manemane ku paluludane ki samiamiange? Kwini pia ki umawmase; kathane ku atavuvulrucane, kai maka kawariva ku maneemanenga. Ku amani ku paiya iniane ku umawmase masalru iniane, yakai ku manemane ku akaesadhane? Adravane ka akawrivaane kai maka avavaga! 19Kiamwangasu ku amatikurwane! Amiasu kai ki angatu, “Pacuna!” La iyasu kai ki lrenege, “Ngidrakaala!” Ku samiamiange lri dulru pelaela muswane ku manemane? Alau niarakaiyane ku kingi ku gingi cabu iniane, ai ku adringini kadrwa ku niake.
20Ku Tamatama yakai ki daaneini; kikai yakai kawmasane sanaka umawmase isaselebana icucubungu iniane.
Currently Selected:
Habakuke 2: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
