Habakuke 3
3
Inulri ki Habakuke
1Kikai yai inulri ki yuginsia ka Habakuke:
2 Tamatama, sa kilalraku ku takaunganesu,
kai kidremedremeli swaete ku usakenane si ukuludrane.
Kiatubiaku muswane ikai kai ki zidai ku atupelanesu pia ku napiangasu ku maadrau ka awngane;
kiatubiaku muswane ikai ki elathanesu la mialriya paathingalane ku kalithane.
3Ku Twaumase lri peela twalai Idume kainganai;
ku sanianiangenga ka Twaumase lri twalai Parange lregelrege kainganai.
Ku lriguini lri kabungu subelebelenge;
kai lebe lai lri suete ku wadrengedrengere iniane ku lingau.
4Ku Twaumase mailuku ku ledra ki lrikace;
ku thelare lri twalai ki alrimaini,
twalai kudra ki kai adredrelane ka sapukwane ka alrimaini paledra.
5Ikai cucubungu iniane yakai ku swalrubu ka caemane;
ikai lrilrikudru iniane yakai ku apacadhane.
6Ku Twaumase sana idrengere, kai kadaengane lri ngiveleevele;
ku Twaumase sana lengethe, lri manugiligili sanaka kuni.
Ku makecenge palralrawthu ka lalregelrege lri aegacane;
ku yakai palralrawthu ku lalrelrelrege lri kabengathe;
kikai yai natadadavacanengaini patuelre kunadruma.
7Wadrelaku ki swa Kusange ka umawmase ka mwakulukuludru,
ku swa Midiange ka umawmase la manugiligiligili.
8 Tamatama, amani kai kadravane ka pakagirimucu muswane?
Amani kai laveke ku pakalisi muswane?
Ngwakaisu ki ememe kainganai;
ku ememe amani ku sakikaruburanesu ka palridingi.
Paakacisu ku takikaruburane ki kawkawlusu.
9Wabilakacesu ku bu, padulru ku alrailane;
ku kadravanesu paegacane ki kadaengane.
10Kai lalregelrege sa drele muswane manwagiligili;
ku acilai la twalai belenge gugu.
Kai yalebe ki kadaengane ku acilai la ngiburai,
ngibikabiki ku tangiberadhane.
11Ku ridarane ku lrailisu sa katwase,
ku walikalikathe ku idirisu sa lribate,
ku vai si dramare makitua idrengere.
12Yakaisu ki elathane talakadre ki kawmasane;
yakaisu ki lisiane dredre sanaka kuni.
13Matwasesu palribulu ki kawkawlusu,
palribulusu ki pilrisu ka talialalai.
Patwabakebakesu ki tarasangililuku ki manganga ka umawmase,
si pakamudu kudra ki papapalraini.
14Kudra kwapingini sa mia ki umuku si pasarau naiane,
mia ki amani kudra kiabububuli tusinalreme ki matiakukuru ka umawmase lelelepenge naiane,
ku lrailisu palreegese ki tamatama ki kwapingi lini.
15Ngwakaisu ki rigi si dredre ki laveke.
Ku acilai la ngibwaburai.
16Sa kilalraku kilakikai manwagiliigilaku;
kai ngudwili ngwalai ki kiwcane si manutaketake.
Kadrwanga ku puku kai alrima si drapaleli;
walridrawdrawnga naku ku tadadavacaneli.
Lri isaselebanaku ukalava kudra akelane kwini ki zikange,
lukamaninga kwidra ku Twaumase lri pathavungu kwini ki kiakaruburu naiane.
17Adravane kai pumadru ku icizike ka angatu,
la kakadrwa ku madru ki budu ka cebe;
adravane kai pumadru ku ulrive ka angatu,
la kai cebe ku taleke ki angangade;
adravane pacainga patuelre ku lakiu,
la ka kadrwanga ku lwange ki talwangane;
18Lri tusakamiyaku ngwalai ki Tamatama si kiraragai,
ngwalai ki Twaumase ka Takipalribulribulaneli si kiraragai.
19Ku abebeelengenga ka Tamatama wabaai nakwane ku puku.
Wamalra nakwane tungimiyaiya ki thadi pakapapedrenge ku tapudrapalane;
si pakapapedrenge nakwane ku tadadavacaneli ikai ki abelenge ka lregelrege.#3.19 Ku pacase ki Hiburu, ikai kai, wadrima ku “Wabaai ki tarasangililuku ki sikatai, la arakai ku patungutungu paungugake.”
Currently Selected:
Habakuke 3: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
