Habakuke 1
1
1Kikai bilrilane ka vaga yai pelaela ki Tamatama papia ki yuginsia ka Habakuke.
Ku Habakuke pakamalisi ku kidremedremeini
2 Tamatama, lri tarathainwaku kitubi, ala lri kilalrasu? Lri tarathainwaku papia muswane tawtau, ala lri palribulusu naiane kidaili ki akitusinalrelremeane? 3Asu padrele nakwane kai miyaiya kikai kai pasalrivane? Asu lreeme palraingi kai miyaiya kikai kai ngialisiane? Kai ngiathalringulu nakwane yadrepele ka mabebebeetethe, tusinalremelreme, ikai kidruanga malrumalrumalrumai si makalililisi makanaelre. 4Kai hulrice kadrwanga ku puku, kadrwanga ku paluludane; ku dringelresane lrika palralrawthunga kai maka aru swadrau. Ku manganga ka umawmase wadredredrepete tusinalreme ki madringelrese ka umawmase, ku dringelresane kia kilrungunga.
Tatubalreane ki Tamatama
5Ku Tamatama amia kai ki kawkawluini, “Kirarakeeta drele kwini ki ngiathalringulu numiane kwi lakuni, lri kasamali numi kudra drele numi. Lri ikaiyaku ki vai numi pia ku taingeaane ku awngane, lu kilalra numi lri kai numi kipawtenga. 6Lri pangiradhekanaku pakagarange ki garagarange si malilisi ka swa Babilunia. Kwi lalasu lri salraelre kai kawmasane, si kikaruburu la pamalebe si malra ku kadaengane ki palrapalra. 7Kwi lalasu matiaukukuludru; kai lri tumanemane ki umawmase, lri singikaai ku takidremedremane lini tuhulrice.
8“Ku larigi lini mariaridare ki lrikulau, ku lisiane silrialribate ki masilrau ka tawpungu ubulane. Ku tarangurigi ka kwapingi singiadaili kainganai; kwi lalasu ku ridarane kainganai, mia ki takanga lu daysi.
9“Ku kwapingi lini matiangeange ku tapadrumudrumulrane arwacucubungu, sanaka tamwane, mwakuludru sanaka umawmase. Ku ravase lini ku umawmase mia ki enai ku kalrane. 10Kwi lalasu mwalralrakai ki talialalai, pwalrialrivale ki latabebelenge. Kwi lalasu warubu ku dae si tukepale salikai kikaruburu si malra ki nikepalane ka cekele. Sanaka sateleengane kadrwa ku maka watelenge liniane. 11Kwi lalasu mia ki umuku ka valrigi ka wasakurupu ala katwase; kilakikai mapasaisalriu ka umawmase twa twaumase ki puku lini.”
Kai Habakuke peaeelanga kalisi
12 Tamatama, Twaumasengaasu twalai satau pathagili. Amanisu ku Twaumaseli, ka sanianiangenga, ka palralrawlrawthu. Tamatama ka tarapalribulribulu nakwane, wapilrisu ki swa Babilunia, si pakagarange liniane, pakai ku apathavungane naiane. 13Ai, asu dulru maka kiadili kilakikai wabaebalre, manganga ka laumawmase? Mabula si alrivilrivi turamuru kwi macasu; lutumane kaisu lri lreme drele ki pasalrivane, lai kaisu lri maka kiadili pacepe ki laumawmase lu pia ku ngialisiane ku laawngane. Alaiyasi ka ngiamia kikai, kai lalasu sa pakamudu ki mulelecege liniane ka umawmase, asu kai kawriva?
14Asu dulru kange ka yakai ki laveke iya ki laumawmase, ka twaredededele ka kadrwa ku wasangililuku ka lalubalubai iya? 15Kai swa Babilunia arakai ku kaili alra kaili ki umawmase, mia ki walrakwili ki kange; kwi lalasu arakai ku arai si arai ki umawmase, lu pwaradhane ki umawmase la putariri! 16Kwi lalasu pakeela sukubu ki arai lini, si papia ki arai patarumara lama, asi lwiyane kwini la arai mailuku ku makaalra ku mathariri ka lawbubulu.
17Ai, beekacenga, kwi lalasu lri ededeede arakai ku lrabu, si matiangeange papacapacai ki laumawmase?
Currently Selected:
Habakuke 1: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
