Jɔn 8

1Go Yecu lɔ kuur de Olip. 2Ku le bɛr dhuk yekalu ɣɔn miakdur, go kɔc gueer enɔŋ en kedhia; go nyuc piiny ku pioc keek. 3Go dugɛɛr ku Parithai goki tiŋ ci dɔm kene ran dɛ bɛi enɔŋ en; ku na cik ye tau cilic, 4ke yookki, Ya Bɛny, yetiŋe ee ci dɔm ke lɔ ke ran dɛ, ee yok ke loi. 5Mothe ee ci wɔ yɔɔk ne loŋ ye bi kɔc yinela ya biɔɔk ne kur: yen ye jam wude? 6Aake luel ekene them ke yen; bi naŋ ke bi kek ye guɛɛl. Go Yecu guŋ, ku gɔɔr piny ne yeciin. 7Goki dhiac ke thiecki, go yekɔu jɔt, ku yook keek, Ye na ye ran cin kerac ne weyic, ke ne kɔn kuur biɔk enɔŋ yen. 8Go bɛr guŋ, ku gɔɔr piny ne yeciin. 9Go kɔc ci ye piŋ, goki luɔkwei ne kepiɔth, ku leki biyic tok ku tok, gɔl ne kɔc dit agut kɔc ciɛn: go Yecu doŋ yetok, ku tiik ee kac cilic. 10Go Yecu yekɔu jɔt, ke cin ran ŋem a ye tiik yetok, go yɔɔk, Ye tiŋe, tɔki teno? cin ran ci yi luɔkwei. 11Go jam, Ye yin caa bi luɔkwei eya: lɔɔr tedu; ku duɔne kerac kɔn bɛr loi.

12Go Yecu ke bɛr yɔɔk jiɛm, Ye ɣan ye ɣɛɛr de piny nom: ran ye ɣa kuany cok aci bi ya cath tecol, ku kabi ya naŋ ɣɛɛr de piir. 13Go Parithai yɔɔk, Ya yin ye duleŋ de rɔt; ku lekdu acie yic. 14Go Yecu ke gam ku yook ke, Ye na ya duleŋ de rɔt, ke kedie adhiac ke ye yic: an nyic te bɛi ɣɛn, ku te lar ɣɛn; ku we ce te bɛi an nyic, ku te lar ɣɛn. 15We ye luk ne ka ke baŋ biyic; ku an ci raan ye luɔk. 16Ku na ya luk, ke luŋdie ee ya yic: an ce tɔ atok, ee ɣɛn wɔne Awa e tuuc ɣɛn. 17Ee gɔɔr ne looŋkuɔn yic eya, Ya lek de kɔc keerou ee ya yic. 18Ɣan eke duleŋ de rɔt, ku Awa e tuuc ɣɛn ee duleŋ de ɣɛn. 19Goki yɔɔk, Ya tɔ Wur teŋo? Go Yecu dhuk, Ye we kuc ɣɛn, ku kuɔcka Awa: na ne we nyic ɣɛn, e kee te nyiɛcka Awa eya. 20Keewelke aake luelke ɣon de weu ke piɔc ne yekalu: ku cin ran go ye dɔm; kolde ee ŋoot wei.

21Go ke bɛr yɔɔk, Ye an jiɛl, ku we bi a ya kɔɔr, ku we bi thou ne kerɛɛcduɔnic: te lar an, acii we bɛn bi leu. 22Go Judai goki jam, Yi bi rɔt nɔk, e ke yen jam, Ye te lar an, aci we bɛn bi leu? 23Go ke yɔɔk, Ye we we bɔ piiny; ku an ee bɔ nhial; we ye ka ke epinye nom; ku an cie ke de epinye nom. 24Yekene ayɔɔk an wek, ya we bi thou ne karɛckuɔn yic: te cii we ɣa ye gam wuɔ ke ye, ke we bi thou ne karɛckuɔn yic. 25Goki yɔɔk, Yi ye ŋa? Go Yecu ke yɔɔk, Ye yeŋo yan jam wɔ week? 26Anɔŋ kajuec ban ke jam ku ban ke luk ne week: ku yen man ci a tuɔc ee yic; ku ka ca piŋ enɔŋ yen, keeka ya luel ne piny nom. 27Ku cik nyic lan jiɛm en ke keek ne Wun. 28Go Yecu ke yɔɔk, Ye na cak Wen de raan tau nhial: e kabak nyic lan yan ye, ku kacin ke ya loi ne guɔpdie: acit man ci Awa ɣa piɔc, yeneka yan keekake luel. 29Ku yen man ci a tuɔc ee tɔ ke ɣa; aken ɣa nyaaŋ wei atok; ne ke yan kaŋ loi ne nyindhia ka lɔyum ne yepiɔu. 30Na ci keekake luel, go gam ne kɔc juec.

31Go Yecu Judai ci ye gam yɔɔk, Ye na yaka dhiac ne wɛtdieic, ke we ye kɔcciek piɔcke necok; 32ku we bi yic ya nyic, ku yic abi we ya luɔny bei. 33Goki dhuɔk e, Yi wɔ ye kuan de Abraɣam, ku wɔ keneke kan mac ne raan: yen yeŋo jiɛm yin, Wu we bi luɔny bei. 34Go Yecu dhuɔk keek, Ye we ya yɔɔk neyic, Ya raan ebɛn ye kerac loi, ee ya aluaŋ de kerac. 35Ku aluak acie ceŋ baai athɛɛr: wa ekee ceŋ baai athɛɛr. 36Yen na bi Wa we luɔny bei, ke we ci lony eŋui. 37We yake nyic ke we ye kuan de Abraɣam; ku we ye ɣa kɔr, bak ɣa nɔk, ne ke kene wɛtdie rɔt cap ne wepiɔth. 38An ye keekake luel ka cake ŋem enɔŋ Awa: ku week eya, we ye kaŋ loi ka cakke piŋ enɔŋ wuɔrduɔn. 39Goki dhuk jamki, Yi Abraɣam ee kuɛreda. Go Yecu ke yɔɔk, Ye na yaka mith ke Abraɣam, ee te cak luɔi de Abraɣam ya loi. 40Ku emane we kɔr bak ɣa nɔk, ye ɣan man ci we lɛk yith, cake piŋ enɔŋ Nhialic: ku Abraɣam aken lui yeya. 41We ye luoi de kuarkuɔn loi. Goki yɔɔk, Yi wɔ cie adhiethleer; wɔ ye Awada ke tok, Nhialic. 42Go Yecu ke yɔɔk, Ye nee Nhialic ye Wuɔrduɔn, e kee te yaka ɣa nhiar: an ci bɛn, ku an ee bɔ enɔŋ Nhialic; ku an e ce bɔ ne guɔpdie, ee yenekee tuuc ɣa. 43Yen yeŋo ci we jamdie ye nyic? Ee ke ken we wɛtdie leu ne piŋ. 44We ye wɛɛt ke durieth, ku we ye ka ye wuɔrduɔn ke kɔr loi. Ee ye anak tir ɣɔn gɔce kaŋ, ku kace tɔ ne yith yic, ne ke cin en yic ne yeyic. Ela ye lueth tor, e kajam ne kede; aye alueth, ku ke wun e lueth. 45Lek yan yith lɛk we, yeneka cii we ɣa ye gam. 46Nɔŋ ran de week yic ye ɣa guut ne kerac? Na ya jam ne yith, ke yeŋo ci we ɣa ye gam? 47Yen man ye ke de Nhialic ee wel ke Nhialic piŋ: ku kaacakke ye piŋ, ne ke ci we ye ka ke Nhialic. 48Go Judai goki dhuk jamki, Yi cuk ya wuɔc e ke ye wɔ jam wuu yin e muɔny Thamaria, ku yin nɔŋ jɔŋ rac? 49Go Yecu dhuk, Ye an cin jɔŋ rac; An ye Awa riɛu, ku we ci ɣa ye riɛu. 50Acie ɣan e ye nuɔmdie kɔɔr, tok atɔ toŋ ye ɣa kɔr nuɔm, ku ye luk. 51We ya yɔɔk neyic, Ya na ye raan wɛtdie gam, e kace thou kɔn ŋem. 52Go Judai goki yɔɔk, Yi kacuk nyic emane yin nɔŋ jɔŋ rac. Abraɣam ee thou, ku nebii; ku ye jam, Wu na ye raan wɛtdie gam, e kace thou kɔn yok. 53Ye yin e dit ne kukuarda Abraɣam man ci thou? ku nebii ci thou: cɔk rɔt ye ŋa? 54Go Yecu dhuk, Ye na ya rɔt noom, ke nuɔmdie acin ke dɛ: ee Awa, yenekee ɣa noom; man yaka luel wuɔ ye Nhialinyduɔn; 55ku yaka kuc; ku kaya nyic; ku na ya jam ya kakuɔc, ke an bi ya alueth ci week; yen kanyiɛc, ku an ye wɛtde gam. 56Kuarduɔn Abraɣam ee ci piɔu lɔyum ne ŋem ben koldie ŋem: go ŋem, ku mit piɔu. 57Go Judai goki yɔɔk, Yi runkuk ke dit aŋoot e ke ken guɔ ya thiɛrdhiec, ku ca Abraɣam ca ŋem? 58Go Yecu ke yɔɔk, Ye we ya yɔɔk neyic, Ya an ee tɔ aŋoot Abraɣam ke kene dhieth. 59Goki kur kuany bik kek ke ye biok: go Yecu rɔt riic, leu wei ne yekalu.

Currently Selected:

Jɔn 8: LEKJOT

Highlight

Copy