Jɔn 7

1Ɣɔn ne keekake cok ke Yecu ye cath ne Galili: ku cii ye cath ne Judaya ne ke nɔŋe Judai piɔth bik nɔk. 2Ku miɛth de akemai de Judai ee ci thiɔk. 3Go mithakacke yɔɔk, Yi jale etene, lɔr Judaya, bi kɔcpiɔceke bik luɔi ye loi lɔ ŋem eya. 4Acin ran ye ke dɛ loi te kuc, ku yen ne guɔpde aye kɔɔr bii kɔc ya nyic kedhia. Na ye keekake loi, ke yin nyuɔthe rɔt kɔc ke piny nom. 5Ku mithakacke eya aake ken gam. 6Go Yecu ke kɔɔk, Ye koldie aŋot ke ken bɛn; ku kolduɔn ee tɔ ne nyindhia. 7Kɔc ke piny nom aaci we ye leu ne man; ku kaye ɣa maan, ne lek lɛk ɣan ne keek, ya luɔiden karac. 8Laka te de emiɛthe; an ce go lɔ te de emiɛthe, ke koldie ŋot ke ken guɔ ɣeet. 9Na ci ke lɛk keekake, ke dhiac ke ceŋ ne Galili.

10Ku na ci mithakacke lɔ te de miɛth, go lɔ eya, ke mony rɔt, ku kuc kɔc. 11Go Judai kɔɔr te de miɛth, ku thiecki; Ya tɔ teno? 12Ku luɔm dit ee tɔ ne kɔc yic ne yen: ye kɔk jam, Ya kee ran piath: ku luel kɔk, Yi kacie ye, kee kɔc dhoom. 13Ku cin ran ɣeet wel bei ne riɔc riɔce kɔc ne Judai.

14Te cen ya kaam ciɛlic de akol ke miɛth, ke Yecu lɔ yakalu, le weet. 15Go Judai goki gai, ku jamki, Yi ne yerane nyic pioc yede ke ken kan pioc? 16Go Yecu dhuɔk ke jiɛm, Ye wɛtdie acie kedie, ee ke de yen man ci a tuɔc. 17Na nɔŋ raan piɔu bi ke de yepiɔu ya loi, e kabi yewɛte nyic, lan yen ke de Nhialic, ka lan yan jam ne ke de guɔpdie. 18Ran ye jam ne ke de guɔpde ee nuɔmde kɔɔr: ran ye nuɔmde kɔɔr yen man ci ye tuɔc, yenekee ran yic, ku cin kerɛɛc tɔ ne eyic. 19Ken Mothe we yiɛn loŋ, ku kacin ran toŋ de week ye loŋ loi? Yeŋo kɔrka naŋ de ɣɛn? 20Go duut jam, Yi yin nɔŋ jɔŋ rac: yeŋa kɔr naŋ de yin? 21Go Yecu dhuk yook keek, Ye an ci luɔi tok loi, ku gaika. 22We ci Mothe ke yiɛn luɔi de ŋuɔt (ku kacie Mothe ee gɔc e, aaye kuarkuɔ); ku we ye raan ŋoot ne kol de thabath. 23Na ye raan ŋoot ne kol de thabath, kɛlke loŋ de Mothe bi dhoŋ; ɣɔkka wene ɣɛn ne ke can raan cɔk piɔl ne kol de thabath? 24Duɔka ke yaka ŋem ye luk, yaka luk ne luŋ lajik.

25Go kɔc kɔk ke Jeruthalem jam, Yi ci ye yen ekene yen man kɔrki bik nɔk? 26Ku ŋɛmka, ee jam ne nompaal, ku cin ke leki ye. Nɔŋ te nyice roordit en lan yen Kritho necok? 27Ye ye yede? wɔ nyic te bii yerane thin: ku na ye Kritho e bɔ, e kacin ran nyic te bii yen thin. 28Go Yecu coot ne yekalu, weet kɔc, ku ye jam, Ye we ye ɣa nyic, ku nyiɛcka te bɛi an thin eya; ku an ee ce bɔ ne guɔpdie, ku yen man ci a tuɔc ee yic, yen man kuɔcka. 29Anyiɛc; ne bɛn ne bɛi an bei enɔŋ en ku ci a tuɔc. 30Goki ya kɔɔr bik dɔm: ku cin ran tɛɛu yeciin ne yeguɔp, ne ŋoot e ŋot akolde wei. 31Ku kɔc juec ke dutic aaci e gam; ku yiki jam, Yi na bɔ Kritho, ke bi kagɛiyeke ya loi ka war ka ke yerane ye ke loi? 32Go Parithai goki duut piŋ ne lum ne keekake ne yen; go bany ke ka ke Nhialic ku Parithai goki atoc tooc bik lɔ dɔm. 33Go Yecu ke yɔk, Ye an bi yul wɔ week, ku an bi lɔ enɔŋ en yen man e tuuc ɣa. 34We bi a kɔɔr, ku we ci a bi yok: ku te ta ɣan aci we bɛn bi leu. 35Go Judai jam ne roth, Yi ye teno bi yerane lɔ thin, ci wɔ e bi yok? bi rɔt mat ne thiai de Girikiic, ku bi Giriki lɔ wɛɛt? 36Ye wɛt e ŋo eke ci luele, Ye we bi a kɔɔr, ku we ci a bi yok: ku te ta ɣan aci we bɛn bi leu?

37Kol jɔle miɛth thok, ee ye kol dit, go Yecu kɔɔc ku coot, jiɛm, Ye na ye raan yal, ke ne bɔ enɔŋ an bi dek. 38Ran ye ɣa gam, ci luɛl de kacigɔɔr, abii ciir ke piu ke piir ya kuer bei ne yeyic. 39Kee luel keewelke ne Jɔŋdit, bii kɔc ye gam ya loom: Jɔŋdit ee ŋoot ke kene guɔ yiɛn ke; Yecu ee ŋoot ke ken nom. 40Go kɔc juec jam, te cik kek keewelke piŋ, Yi yerane ee nebi eyic. 41Kɔk aaye jam, Yi kee Kritho yekene, Ku ber kɔk jam, Yi bi Kritho bɛn bei ne Galili? 42Ne kene kacigɔɔr luel, Ya Kritho abi bɛn ne kuan de Dabid ku ne pan de Bethlekem te tɔ Dabid thin? 43Go kɔc teer ne yen. 44Ku nɔŋ kɔc kɔk piɔth yi bik dɔm; ku cin ran ɣeet yeciin eguɔp.

45Go atoc bɛn enɔŋ bany ke ka ke Nhialic ku Parithai; goki ke thiec, Ya yeŋo e ci we ye bii? 46Go atoc ke gam, Ya kacin ran ci kan jam ci yerane. 47Go Parithai dhuɔk keek, Yi ci we dhoom eya? 48Nɔŋ bany ka Parithai ci gam? 49Keekɔc kuc loŋke kaa cien. 50Go Nikodemo ke yɔɔk (yen man e ci kan bɛn enɔŋ en ke ye ran de keyic), 51Ye ye loŋda raan luɔkwei ke ŋot ke kene kan piŋ, ku ye luɔide nyic eya? 52Goki gam ku yookki, Ya ye ran de Galili eya? Kɔɔr ku ŋem: acin nebi ye bɛn bei ne Galili. 53Go kɔc dhuk ne bɛiken kedhia.

Currently Selected:

Jɔn 7: LEKJOT

Highlight

Copy