Jɔn 16

1Keekake aacake lɛk we, kɛlke we bi ya cɔk kɔth. 2Aabi we ya ciɛc biyic ne ɣoot ke gueer: ee yic, kol bɔ, ke ran ye we nɔk abi cɔɔl ye loi ke de Nhialic. 3Ku keekake aabike luɔi we, ne kuny kuc kek Awa, ka ɣɛn. 4Keekake aacake lɛk we, bak wenhiim ciɛt ne keek, te cik ke ɣeet, nee we cake lɛk ne keek. Ku keekake akɛnke lɛk week ɣɔn tueŋ ne tɔ ta ɣan wɔ week. 5Emane an lɔ tenɔŋ en yen man e tuuc ɣa; ku kacin ran toŋ de week thiec ɣɛn, Ye lɔɔr eno? 6We ci piɔth thiaŋ ne alajieth ne ke can keekake lɛk week. 7Apiath abac, we yake lɛk yith; Apiath enɔŋ week te jal ɣan: na caa jiɛl, ke Dugel ace bɔ enɔŋ week; ku na lar, e kaba tuɔc enɔŋ week. 8Na ci bɛn, e kabi piny luk nom ne rɛɛc, ku ne piath, ku ne luk: 9rɛɛc, ee ke cik ke ɣɛn ye gam; 10piath, ee ke lar ɣan enɔŋ Awa, ku we ce ɣa bi bɛɛr ŋem; 11luk, ee ke de luŋ de bɛny de yepinye nom. 12An ŋoot ke an nɔŋ kajuec lɛkke week, ku kaacakke leu ne guɔm emane. 13Na ci bɛn, yen Jɔŋdiit de yith, e kabi we ya dak ne yith yic kedhia: ne ke cen bi ya jam ne guɔpde; abi ya jam ne ke ye piŋ ebɛn: ku kabi we ya lɛk kaŋ ka bi bɛn. 14Abi ɣa ya noom: ne loom ben kedie ya loom ku bi ya nyuɔth week. 15Kaŋ kedhia ka tɔ kene Awa aaye kacie: yenekee jaam ɣan, ya kabi kedie ya loom, ku bi ya nyuɔth week. 16Nin lik aacii we ke ɣa bi bɛɛr ŋem, ku we bi ɣa bɛɛr ŋem ne nin likka, ne ke lar ɣan enɔŋ Awa. 17Go kɔc kɔk ke kɔcpiocke jam ne roth, Yi yeŋo eke lek wɔɔke, Ye nin lik, aacii we ke ɣa bi bɛɛr ŋem, ku we bi ɣa bɛɛr ŋem ne nin likka? ku, Ne ke lar ɣan enɔŋ Awa? 18Goki jam, Yi yeŋo eke lueele, Ye nin lik? Wɔ kuc ke lueel. 19Go Yecu nyic e ke nɔŋ piɔth bik ye thiec, ku yook ke, Ye thiɛcka roth wepɛc ne ke can jam, Ya nin lik aaci we ke ɣa bi bɛɛr ŋem, ku we bi ɣa bɛɛr ŋem ne nin likka? 20We ya yɔɔk neyic, ya we bi dhiau ku calka wuɔi, ku piny nom abi piɔu lɔyum: ku we bi piɔth jiɛth, ku jiɛthduɔn de piɔu abi rɔt wel ne yum de piɔu. 21Na rɔp tiik, e kanɔŋic alajieth ne kolden ci ɣeet: ku na ci meth dhiɛth bei, e kace ber diɛr ne tɔɔk, ne yum cen piɔu lɔyum ne ran ci dhiɛth ne piny nom. 22Yen we jieth piɔth emane: ku we ba bɛɛr ŋem, ku we bi piɔth lɔyum, ku yumduɔn de piɔu acin ran bi ye ya nyaai enɔŋ week. 23Ku we ce ɣa bi bɛɛr ya thiec ne yekole. We ya yɔɔk neyic, Ya na yaka ke dɛ thiɛc Awa, e kabi ya yiɛn week ne rincie. 24Aɣet emane acin ke cak guɔ thiec ne rincie: yaka thiec, ku kabak ya loom, bi yumduɔn de piɔu bi ya dit.

25Keekake aacake lɛk we ne kaaŋ: thaa abɔ ban we cuɔk beer jaam ne kaŋ, we ba ya nyuɔth Awa negek. 26Yekole abi we ya thiec ne rincie: ku we caa ye yɔɔk, ya an bi Awa lɔŋ ne week; 27Awa ee we nhiar ne guɔpde, ne nhiɛr ye we ɣa nhiar, ku yaka gam ke ne ɣan bɔ bei nenɔŋ Awa. 28An ee bɔ nenɔŋ Awa, bɛi ne piny nom: ku ɣan beer piny nyaaŋ nom wei, ku lar nenɔŋ Awa. 29Go kɔcpiocke goki yɔɔk, Yi yin jam negek emane, ku cii jam ne kaaŋ. 30Anyicku emane ke yin ye kaŋ kedhia nyic, ku ye piɔu ciɛn wuu te thiec raan yi: yekene ayeku gam ke ne yin bɔ bei nenɔŋ Nhialic. 31Go Yecu dhuɔk keek, Ye cak gam emane? 32Ŋɛmka, akol bɔ, ee yic, ku kee bɛn emane, we bi thiɛi wei, lɔ ŋɛk panden, ku nyaŋka ɣɛn piny atok: ku an ce tɔ atok, ne tɔ tɔ Awa kene ɣɛn. 33Keekake aacake lɛk week, ya bak naŋ dɔɔr ne ayic. Piny nom aye we naŋ ka ye we dhal: ku yaka piɔth miɛt; an ci piny tiam nom.

Currently Selected:

Jɔn 16: LEKJOT

Highlight

Copy