Dutuuc 9

1Go Thaulo dhiac ke nyin bi kɔcpioc Bɛnydit ke lɔ nɔk, go lɔ enɔŋ bɛnydiit de ka ke Nhialic, 2leer ku thiec thon bi laar luaŋ de Damathko, ye na tɔ kɔc, yi roor kene diar, kɔc ke Dhol, e kaabike rek, ku leere ke Jeruthalem. 3Ana ye ciɛth aye duur ye ɣeet Damathko: ke ruer e ruɛr nhial yuil piny: 4go yuik, ku piŋ ror yook e yela, Ye Thaulo, Thaulo, yeŋo yin a ŋet? 5Go thiec, Ye yin ŋa, Bɛnydit? Go jam, Ye ɣan Yecu man ye ŋete eka: 6jɔt rɔt, ku lɔr bei, yin bi lɔ lek ke ba dhiil ne luɔi. 7Go kɔc cath kene ye goki kɔɔc, ku cik kethook kuek, piŋki ror ku cin ran ŋemki. 8Go Thaulo rɔt jɔt piiny; ku ye liep yenyin, ke ce piny ŋem; goki ɣɔm ku leerki Damathko. 9Go dhiac akol keediak ke ce yiɛn, ku cii ciɛm, ku cii dek.

10Ku ranpioce ee tɔ ne Damathko, cɔl Anania; go Bɛnydit yɔɔk ne nyuɔth, Ye Anania. Go jam, Ye ɣan eke, Bɛnydit. 11Go Bɛnydit yɔɔk, Ye jɔt rɔt ku lɔr dhol cɔl Lacith, ku thiec ɣon de Judath lan tɔ ran cɔl Thaulo, ee ran de Tartho, alaŋ; 12ku kee ran cɔl Anania ŋem ne bɔ, bi ecin ben kan enɔŋ en bi bɛr yin. 13Go Anania dhuk, Ye Bɛnydit, aca piŋ nenɔŋ kɔc juec yerane, ya ci karɛc dit loi nenɔŋ kɔc lajiik ke Jeruthalem: 14ku kanɔŋ riɛr eene riɛr de banydit ke ka ke Nhialic bi kɔc rek kedhia kɔc gam rinku. 15Go Bɛnydit yɔɔk, Ye lɔ ɣɔu dholdu: yerane ee tony ca lɔc bi rincie laar ne Juurkɔk nhiim ku meleek, ku mith ke Yithrael: 16aba nyuɔth kajuec benke gum ne rincie. 17Go Anania jaal, ku ler ɣot, ler ku kɛn ecin enɔŋ e, ku jiɛm, Ye Thaulo wanmaath, Bɛnydit Yecu, man ci tuɔl enɔŋ yin dhol e bii yin thin aci a tuɔc ba bɛr yin, ku bi yi nyuɔc ne Jɔŋdiit Lajik. 18Go ka cit nyim loony piny ne yenyin, go jal yin. Go rɔt jɔt ku baptith; 19ku ciɛm, go guɔp jal riɛr.

Ku ceŋ akol kɔk kene kɔcpiocke tɔ ne Damathko. 20Go kɔc dai lɛk ne luek ke gueer yic ye Yecu kee Wen de Nhialic. 21Go kɔc ci welke piŋ goki gai, ku jamki, Yi cie ran waar ye kɔc ŋet ne Jeruthalem yekene, kɔc gam keerinke? ku cie yekene yene bii yen eene bi ke laar e ke ci rek ne bany ke ka ke Nhialic nhiim? 22Go Thaulo jal lɔ ke rir, ku diɛŋ Judai nhiim, Judai ceŋ Damathko, ye kɔc guut ye yekene yenekee Kritho.

23Na ci akol juec thok, ke Judai e ke mɛt yi bik Thaulo nɔk: 24ku nyic Thaulo kepiɔth. Ku yiki thook lɔ tiit ne akol yic ku weer yic bik nɔk. 25Go kɔcpiocke goki nyaai ne wɛɛric, leki ku cookki biyic ne pany nom, ku tiiŋki piny ne akup.

26Ɣɔn ye ci lɔ Jeruthalem, ke them mat kene kɔcpiocke: goki riɔc kedhia ne yen, cik gam ne ye ranpioce. 27Go Baranaba laar enɔŋ dutuuc, leer ku lek keek ne ŋem cen Bɛnydit ŋem dholic, ku jam cen jam ke yen, ku weet cen kɔc wɛɛt ne Damathko ne piɔn rir ne rin ke Yecu. 28Go Thaulo dhiac kene keek, ye lɔ biyic ku lee dhuk Jeruthalem, 29weet kɔc ne piɔn rir ne rin ke Bɛnydit: ku jiɛm teer wel kene Judai ke Giriki; goki piɔth naŋ bik nɔk. 30Go wanmathke goki nyic, goki laar Kaithareia, ku toocki Tartho.

31Go kanitha dɔɔr ne Judaya ebɛn ku Galili ku Thamaria, go riɛr; ku ciɛth ne rieu de Nhialicic, ku ne duɔt de piɔu de Jɔŋdiit Lajikic, go jal dit.

32Ku tɔ, ye Petero cath ne bɛi kedhia ku leer enɔŋ kɔc lajiik ceŋ Luda eya. 33Go ran toŋ cɔl Ainea yok thin, ran ye tɛc ne athinic ne run keebɛt, ran bec areet. 34Go Petero yɔɔk, Ye Ainea, Yecu Kritho acɔk yin dem: jɔt rɔt, ku dol athindu. Go rɔt dai jɔt. 35Go kɔc kedhia kɔc ceŋ ne Luda ku Tharon goki ŋem, goki kepiɔth wɛl Bɛnydit.

36Ɣɔn ne Jopa tiŋpioce cɔl Tabitha ee tɔ, ku ci wel ne thoŋ de Giriki cɔl Doruka: tiŋ ci thiaŋ ne luɔi piɛth yen kɔc ŋɔŋ gup kony. 37Ku tɔ ne keeakolke, bec en keek, ku thou: goki waak, ku tɛɛuki ɣon nhial. 38Ku Luda athiaak ke Jopa, go kɔcpiocke Petero piŋ ne tɔ thin, goki tuɔc kɔc keerou ku yookki, Yi duɔne gaau ne bɛn enɔŋ wɔɔk. 39Go Petero rɔt jɔt, ku leer enɔŋ keek. Ɣɔn ye ci lɔ, ke leere ɣon nhial: ku kaac diarjɔɔk ne yelɔɔm, e ke dhiau, ku nyuthki alɛth ke kɔu ku alɛth kɔk ci Doruka ke cuec waar ŋoot en ke tɔ ke ke. 40Go Petero ke ciɛc biyic kedhia, ku tuk enhiɔl ku lɛŋ; ku puk enom guɔp, ku jiɛm, Ye Tabitha, jɔt rɔt. Go yenyin liep; go Petero ŋem, go yethar cok. 41Go Petero cuɔk yeciin, ku miit nhial; ku cɔɔl kɔc lajik ku diarjɔɔk, ku yin ke ne ci piir. 42Ku yekene acii Jopa nyic ebɛn: go kɔc juec Bɛnydit gam. 43Go Petero ceŋ ne Jopa ne nin juec ɣon de Thimon aten de biok.

Currently Selected:

Dutuuc 9: LEKJOT

Highlight

Copy