Dutuuc 10

1Ran tok ee tɔ ne Kaithareia, cɔl Korunelio, ye bɛny de rem thiɛrnyɛny, rem cɔl rem de Yitalia, 2ye ran piath ku rieu Nhialic ke kɔcke kedhia, ye kɔc ŋɔŋ gup kony ku ye dhiac ke lɔŋ Nhialic. 3Go nyuɔth ke yiɛn ke thaa yin ya dheŋuan, thaa kɔl, ŋem malaika ke bɔ enɔŋ en, bii ku jiɛm, Ye Korunelio. 4Go liec ke riɔc piɔu ku jiɛm, Ye yeŋo, Bɛnydit? Go yɔɔk, Ye lɔŋdu ku miɔcdun de kɔc ŋɔŋ gup aa lɔ nhial ne Nhialic nom. 5Dɔc kɔc tuɔc Jopa bik Thimon man ye cɔɔl Petero lɔ bɛi: 6arɛɛr kene Thimon, aten de biok, tɔ ɣonde ne bar lɔɔm. 7Ɣɔn ye malaika e jam ke ye ye ci jaal, ke cɔl awuutke keerou ku lathker toŋ piɛth de kɔc ye ye luɔi ne nyindhia; 8ku ciir keewelke kedhia, ku tooc ke Jopa.

9Ɣɔn miak yi ciɛthki dholic ayi derki ɣet bei, ke Petero lɔ nhial ne ɣot nom le lɔŋ ne thaa ber dhiec: 10go kuk, go piɔu naŋ bi cam: ana ye kɔc yi ŋootki e ke loi miɛthde, ke nyuɔth; 11ŋem nhial ne ci liepic ku tony bɔ piny nhial, cit alanh diit tiiŋe piny ne ŋep keeŋuan: 12ku tɔ thin nɔŋic lai ye cok ŋuan kedhia ku lai rol ku ka mol ne keyoth ne piny nom ku diɛt nhial. 13Ku jam ror yook e, Ye jɔt rɔt, Petero, nakne ku cuɛte. 14Go Petero jam, Ye kacie ye, Bɛnydit, acin kecool rɛɛc ca kan cuet. 15Go ror bɛr dhuk, Ye ke cii Nhialic ci cɔk diik duɔne cɔk rac. 16Ku yeluɔine kee dhuɔk naadiak, go tony dai bɛr loom nhial.

17Ana ye Petero ye ŋoot ke diaŋ nom ne ka cike ŋem luɛl ben ke luel, go kɔc ci Korunelio ke tuɔc, goki ɣeet ɣot thok, wen cik kek ɣon de Thimon thiec, 18goki coot ku thiecki lan e gɔɔŋe Thimon thin, ran ci bɛr cak ci cɔɔl Petero. 19Ana ye Petero ye ŋoot ke tak ke wen ci ŋem, go Jɔŋdit yɔɔk, Ye ŋem, kɔc keediak aakɔr yin, 20Jɔt rɔt, ku lɔr piny, ku lɔr we keek, ku duɔne diɛr: ee ɣan ekee toc ke. 21Go Petero lɔ piny enɔŋ keek; ku jiɛm, Ye ŋɛmka, ɣan eke, an ran karka: yeŋo cɔk we bɔ etene? 22Goki jam, Yi Korunelio, ye bɛny de rem, ye ran lajik ku rieu Nhialic, ku yene piathde luel ne jur de Judai ebɛn, ee nyiɛn ne Nhialic ne malaika lajik bi yi than ɣonde bi wel lɔ piŋ enɔŋ yin. 23Go ke caal ɣot, ku gɔɔŋ ke.

Ɣɔn miak ke Petero lɔ ke ke, ku ruɛce ne mithakɛckeek ke Jopa. 24Goki ɣet Kaithareia ne miakne. Ku yokki Korunelio ne tit ke, ke ci mithakɛcke cɔɔl ku kɔc ruai kene yen cik gueer. 25Ku ye Petero ye ler ɣot, ke ram ke Korunelio, go piny ciim ecok, ku door. 26Go Petero dam nhial ku yook, Ye kaace; an e raan eya. 27Ku lek ɣot e ke gɔk ke ye, ku yok kɔc juec ne ci gueer. 28Go ke yɔɔk, Ye week, anyiɛcka ke ce piath te mɛt e muɔny Juda ke ran e jur dɛ ku ler enɔŋ en; ku Nhialic aci a nyuɔth ye caa ran dɛ beer cɔk rac ku col: 29yenekee dac an bɛn enɔŋ week elantoŋ e thɔn we ɣa, ku caa jai. We ya thiec, Ya yeŋo thɔnka ɣɛn? 30Go Korunelio jam, Ye waar ne akol keeŋuan, ɣan ee ɣan laŋ ɣondie ne lɔŋ de thaa dheŋuan; ŋem, go raan kɔɔc ne ɣanom ran ceŋ alɛth ɣer, 31ku jiɛm, Ye Korunelio, lɔŋdu ee piŋ, ku miɔc yin kɔc ŋɔŋ gup miɔc aken maar ne Nhialic nyin. 32Tuɔce Jopa, thon Thimon eene, ran ci cɔɔl Petero, agɔŋ ɣon de ran cɔl Thimon, aten de biok, aceŋ ne bar lɔɔm. 33Yenekee dac an tooc enɔŋ yin; ku yin ci lui apiath enhia bii yin. Emane wɔ ci bɛn eene wɔdhia ne Nhialic nom, buk kaŋ piŋ kedhia ka ci lɛk yi ne Bɛnydit. 34Go Petero jam,

Ye kaŋɛm eyic Nhialic ace kɔc kueeny yic: 35ne juɔr ebɛn ran ye rieu ku ye kelajik loi, yeneka mit e epiɔu. 36Nhialic ee wɛt tuɔc mith ke Yithrael, lek ke dɔɔr ne Yecu Kritho (yenekee Bɛnydiit de kɔc kedhia) — 37aanyiɛckake keewelke, wel cike luɛl bei ne Judaya ebɛn, ku ke gɔc ne Galili, ke baptith de Jɔn ke ci kan bɛn; 38ya Nhialic ee Yecu de Nadhareth aci tɔc ne Jɔŋdiit Lajik ku ne riɛr: yen man e ye bɛi kuany yic ne luɔi piath, ku cɔk kɔc dem kedhia kɔc ci muk ne durieth; Nhialic ee tɔ ke ye. 39Ku wɔɔk wɔ ye duleek ke ka ci loi kedhia pan e Judaya, ku Jeruthalem; yen yen man cik nɔk ku nokki ne tim kɔu. 40Ee bɛr jɔt ne Nhialic ne kol de diak, ku nyooth ne kɔc nyin, 41ku kacie kɔc kedhia, aaye duleek ci lɔc ne Nhialic ɣɔn ne acirnom, aa wɔɔk wɔ kɔc ci cam ku dekku wɔne yen ɣɔn jɔt en rɔt ne thouic. 42Go wɔ yɔɔk ye buk kɔc ya piɔc, ku lekku ke wuu Yecu acii Nhialic taau ne lukic ne kɔc piir ku kɔc ci thou. 43Ku nebii kedhia aa lek ne ye yi raan ebɛn ran ye keerinke gam abi nyiɛi de karɛc ya loom.

44Na ŋoot Petero ke luel keewelke, ke Jɔŋdiit Lajik nyuc kɔc piɔth kedhia kɔc ci wɛt piŋ. 45Go aŋuɛlɛɛi ci gam goki gai, ne wɛl cii Nhialic miɔc de Jɔŋdiit Lajik wal ne Juurkɔk piɔth. 46Ne ke piŋ kek ke e ke jam ne thook kɔk, ku nomki Nhialic. Go Petero jam, 47Ye nɔŋ ran bi piu peen te baptithke, keekɔc ci Jɔŋdiit Lajik loomke ci wɔɔk? 48Go ke yɔɔk bi ke baptith ne rin ke Yecu Kritho. Goki lɔŋ bi reer kene keek ne akol kɔk.

Currently Selected:

Dutuuc 10: LEKJOT

Highlight

Copy