Dutuuc 13

1Ku tɔɔ ne kanitha de Antiokia nɔŋ nebii ku dupiooc, yi Baranaba, ku Thimeon cɔl Niger, ku Lukio de Kurene, ku Manaen ci ke muk kene Kerod tetararke, ku Thaulo. 2Ɣɔn yi loiki ka ke Bɛnydit ku yi thielki, ke Jɔŋdiit Lajik jam, Ye wɛkka Baranaba ku Thaulo, weke ke luɔi can ke caal thin. 3Na ɣɔn cik thiel ku cik lɔŋ ku cik ke kan kecin, e ke tocike.

4Goki jaal ɣetki Theleukia ne tuɔc de Jɔŋdiit Lajik; ku jiɛlki thin lek riɛi leki Kupurio. 5Ana yi tɔki ne Thalami, e ke weet kɔc ne wɛt de Nhialic ne luek yic, luek ke Judai: ku nɔŋki awunden Jɔn. 6Ɣɔn yi tekki ne tur cɔl Papo, e ke yok tiɛt, dhom kɔc ne wel, tiɛt ye muɔny Juda, cɔl Baryecu; 7ye tɔ kene madir cɔl Thergio Paulo, ran nyic kaŋ. Go Baranaba ku Thaulo go ke cɔɔl, nɔŋ piɔu bi wɛt de Nhialic piŋ. 8Go Eluma tiɛt enhia (luel de rinke eka) go teer ke ke, kɔɔr bi madiir wɛl wei duɔke gɛm. 9Go Thaulo, ku cɔl Paulo eya, ran ci thiaŋ ne Jɔŋdiit Lajik, go lial, 10ku jiɛm, Ye yin ci thiaŋ ne adhuɔm ebɛn ku luɔi rac ebɛn, wen de durieth, tɛɛre wene kelajik ebɛn, cii riak de dhɔl piɛth ke Bɛnydit bi puɔl? 11Ŋem, ciin de Bɛnydit ataau enɔŋ yin, ku yin bi cɔr, ku yin ce akɔl bi ŋem loko. Go rur dai lony ku kecol; go lɔ kɔr ran ɣom e. 12Go madiir go ŋem, go gam, ku gɛi ne pioc de Bɛnydit.

13Ɣɔn ye Paulo ye lony dhol ne Papo kene remde, e ke lɔ Perga tɔ ne Pampulia: ku dhuk Jɔn ne keyic jiɛl leer Jeruthalem. 14Goki jaal ne Perga, leki Antiokia tɔ ne Pithidia; ku leki luaŋ de gueer ne akol e thabath, leki ku nyuucki piiny. 15Ana ya ci looŋ luel ku wel ke nebii, e ke cɔlke ne roordit ke luak, ku jamki, Yi wathii, na nɔŋ wɛt bii we kɔc piɔc, ke we jam. 16Go Paulo kɔɔc, ku nieu eciin, jiɛm,

Ye we kɔc ke Yithrael, ku we kɔc ye Nhialic riɛu, piɛŋka. 17Nhialiny de yejure de Yithrael ee wurkuɔ lɔc, ku jɔt ejure ɣɔn ceŋ kek e ke ye alɛi piny de Yijep, ku bii ke bei thin ne koŋ rir. 18Ku guum luɔiden ne run yin ya thiɛrŋuan roor. 19Ɣɔn aci juɔr dherou riɔk piny de Kanaan, e ke yin ke pinyden, piɛny adonyden, de ruɔn thiɛrnyɛny ku thiɛrdhiec: 20ɣɔn ye keekake yi cik thok, e ke yin ke duluuk aɣet Thamuel nebi. 21Na re e ke thiec meleŋden: go Nhialic ke yiɛn Thaulo, wen de Kic, ran de dhien de Benjamin, ne run de thiɛrŋuan. 22Ɣɔn aci e nyaai, ke look Dabid ne ye meleŋden; ku jiɛm ne yen, Ye an ci Dabid yok, wen de Jethe, ran de apiɔu, ran bi ka ke apiɔu ya loi kedhia. 23Kuan de yerane, yenekee biie Nhialic Duluɛk bei thin, yin Yithrael, Yecu; 24ke Jɔn ci kɔc ke Yithrael kan piɔc kedhia ne baptith de wel e piɔu aŋoot ke ken bɛn. 25Ɣɔn ye Jɔn cath ne luɔideic, go thiec, Ye yaka ɣa tak wuɔ ya ŋa? An cie ye. Ŋemka, tok abiɔth a, an ce piath a ɣan ce cou de wɛrke dak. 26Wathii, mith ke kuan de Abraɣam, ku raan ebɛn ran ye Nhialic riɛu, wɔ eka ke tuuceke wɛt de yeluaŋe. 27Kɔc ceŋ ne Jeruthalem, ku banyken, ee kucki, ku wel ke nebii yieke luel ne thabaath kedhia, aacike cɔk ye yith ne luk cik kek ye luɔkwei. 28Go ciɛn ke ben thou cik yok, goki lɔ kɔr Pilato bi nɔk. 29Na ci kaŋ kedhia ka cike gɔɔr ne yen ci ke jal cɔk ye yith, ke jɔlki bɛi bei ne tim kou, ku tɛɛuki rɛɛŋ. 30Go Nhialic jɔt ne thouic: 31ku ci ŋem ne nin juec ne kɔc eke bɔ kene yen ne Galili biki Jeruthalem, kek kɔc ci jal ya duleekke emane ne kɔc yic. 32Ku wɔɔk wɔ lek we thoŋ piath ne wel ci Nhialic ke lɛk kuarkuɔ, 33aacike cɔk ye yith enɔŋ mithkuɔ, ne jon cen Yecu bɛr jɔt; ci gar cene e gɔɔr ne din de rou, Ye yin ye Wendie, yin ca dhieth ne yekole. 34Ku ne jon cen e jɔt ne thouic, ku cii beer luɛl, a cen jam, Ye yin ba yiɛn athiɛi yic lajik de Dabid. 35Yenekee jiɛm en ne din dɛ, Ye yin ce Toŋdun Lajik bi cɔk luel. 36Na ɣɔn aci Dabid ke de kuande loi ne piɔn de Nhialic, ke jɔl nin, go thiɔk te de kuarken, go luɛl: 37ku yen, yen man cii Nhialic jɔt, aken luɛl. 38Yen nyiɛcka wathii, yerane yeneka cir wɔ week pɛl de karac: 39ku kɔc kedhia, kɔc ye gam, aa cɔk lajik ne kaŋ kedhia, we ce leu ne cɔk lajik ne kaŋ kedhia ne looŋ ke Mothe. 40Ŋɛmka roth, duɔke ke ci luel ne nebii bi bɛn enɔŋ we;

41Yi ŋɛmka, we kɔc ye piɔth dit, ku yaka gai, ku yaka thou;

An loi luɔi ne kolduɔn.

Luɔi cak bi gam, te ciɛkne ye lɛk week.

42Ɣɔn yi leki biyic, e ke thiecki ke bi keewelke bɛr lɛk ke ne kol dɛ de thabath. 43Na ci kɔc ci gueer luɛk cik leu wei, ke kɔc juec ke Judai ku perɔthilutoi piath e ke kuany Paulo cok ke Baranaba: goki jam kene ke, ku yookki ke bik dhiac ne athiɛi de Nhialicic.

44Na ɣɔn ci akol dɛ de thabath bɛn, ke kɔc ke baai e ke duur gueer kedhia bik wɛt de Nhialic bi piŋ. 45Go Judai goki dun dit ŋem ne ci gueer, go tiɛl ke thiɔŋ yic, goki ka ci Paulo ke luel cɔk ye lueth, ku lɛɛtki Nhialic. 46Go Paulo ku Baranaba goki jam ne piɔth rir, jamki, Yi kapiath ye kɔnyku we lek wɛt de Nhialic. Ela ku jaika yen, ku luɔkka roth wei ne piir athɛɛr, ke ŋɛmka, wɔ wel roth Juurkɔk. 47Yenekee lekne Bɛnydit wɔɔk, jiɛm,

Ye yin ca taau ke yin ye ɣɛɛr de Juurkɔk,

Ba ya luɛk agut piny thok ebɛn.

48Go Juurkɔk goki keewelke piŋ, goki piɔth lɔyum, ku nomki wɛt de Nhialic: ku kɔc juec ci lɔc ne piir athɛɛr aa gam. 49Go wɛt de Bɛnydit go thiɛi yepane ebɛn. 50Go Judai diar piath ku roordit ke baai goki ke tuer, cothki kepiɔth bik Paulo ŋet ku Baranaba, ku ciecki ke panden. 51Goki kecok tɛŋ wei ne liɛt, ku leki Yikonion. 52Go kɔcpiocke piɔth miɛt ku thiaŋ ke ne Jɔŋdiit Lajik.

Currently Selected:

Dutuuc 13: LEKJOT

Highlight

Copy