Dutuuc 1

1An ci waragak kan gɔɔr, Yin Theopilo, ne ka eke ciɛk Yecu ke luɔi ku ka pioc yen ke kɔc, 2agut kol e jɔte ye nhial, cen welke yiɛn dutuuc ne Jɔŋdiit Lajik, kɔc ci lɔc ɣɔn. 3Ɣɔn ye guɔmde ye ci thok, go rɔt nyuɔth ke ne piir piir en ne guɔt juec dɛ ci kut, tul enɔŋ keek ne nin thiɛrŋuan, ku luel ka ke ceŋ de Nhialic. 4Te gueere kɔc enɔŋ en, go ke yɔɔk, Ye duɔka jiɛl ne Jeruthalem, tiɛtka wel ke Awa, wel cakke piŋ enɔŋ an: 5Jɔn ee kɔc baptith ne piu; ku we bi baptith ne Jɔŋdiit Lajik aŋoot nin juec e ke ken thok.

6Ɣɔn yi cik gueer, e ke thiec, Yi Bɛnydiit, ba Yithrael bɛr miɔc ne ceŋden emane? 7Go jam, Ye runkeek bene ke ye ya loi e Nhialic aacakke bi nyic, aatɔ kene yen ne riɛldeic, ye Awa. 8We bi riɛr loom te cii Jɔŋdiit Lajik bɛn enɔŋ week, ku we bi ya duleekcie ne Jeruthalem, ku Judaya, ku Thamaria ebɛn agut piny thok ebɛn. 9Wen ye keewelke yi cik thok, aŋoot kɔc e ke daai e ye, ke jɛl laar nhial, ku mɛr piol ne kɔc nyin. 10Ana yi ŋootki e ke ɣoi nhial te ler en, ŋem, ke kɔc keerou kaac e kelɔm kɔc ceŋ alath ɣer; 11ku thiecki, Yi kɔc ke Galili, yeŋo ye we kɔɔc ke we ɣoi nhial? Yecu, man ci laar nhial enɔŋ week, abi bɛr dhuk ci man ŋem we ye ne lɔ nhial.

12Goki dhuk Jeruthalem ne kuur cɔl Olip, kuur thiak ke Jeruthalem, cit cath de akol e thabath. 13Na ɣɔn cik lɔ ɣot, e ke lɔ ɣon nhial te ceŋ kek thin, ye Petero, ku Jɔn, ku Jakob, ku Andereya, ku Pilip, ku Thoma, ku Bartholomayo, ku Mathayo, ku Jakob wen de Alapayo, ku Thimon Dhelote, ku Judath wen de Jakob. 14Ku dhiacki e ke laŋ Nhialic areet etok kene diar ku kene Mari, man e Yecu, ku kene mithakɛcke.

15Ku keeakolke aacii Petero ke rɔt jɔt ku kɛɛc ne mɛɛth yic, ku jiɛm (ku dun diit de kɔc ee ci gueer, yin ya thiɛrnyɛny ku thiɛrou), 16Ye wɛɛt ke awa, kacigɔɔr aa roth dhiɛl aaya yith, ka ci Jɔŋdiit Lajik ke luel ne Dabid thok ne Judath, ran ci kɔc ŋɔɔr kɔc lɔ Yecu dɔm. 17Ye ran de wɔyic, ye kake kap ci wɔɔk ne luɔi ye wɔ lui netok. 18(Yerane ee dom lɔ ɣɔɔc ne weu eke riopeke ye ke kerɛɛcde; go lɔ yuik, go yic puɔk a bi ciin piɛi. 19Go kɔc kedhia ceŋ Jeruthalem goki luɔide nyic; goki dom cak cɔkki ye Akeldama, cɔkki dom, Ye Dom de riɛm.) 20Ci man de gar de kitap de Diɛt yela,

Ye cɔk pande riak,

Ku cɔk cin ran beer ɣap thin:

ku yela,

Ye ne ran dɛ lok luɔide.

21Cakka ran tok, ran de kɔc tɔ kene wɔɔk ne run kedhia ciɛthe Yecu Bɛnydit ke kene wɔɔk, cakka mɛt kene wɔɔk, bi kɔc ya lɛk jon cii Yecu rɔt bɛɛr jɔt, 22ran e ye tɔ kene wɔɔk ɣɔn baptith Jɔn Yecu aɣet akol e leere ye nhial enɔŋ wɔɔk. 23Goki kɔc keerou cɔk kaac e kenhiim, ye Jothep ye kɔc cɔɔl Barthaba, ku cɔl Juthuto, ku Mathiath. 24Goki lɔŋ ku jamki, Ya yin, Bɛnydit, yin man nyic kɔc piɔth kedhia, nyuɔthe wɔɔk ran ca lɔc ne keekɔcke keerou, 25bi te de Judath, ran ci yuik ci jaal tede, bi look ne yeluɔine. 26Goki cɔɔr ne kɔc keerou, goki Mathiath yok, go Mathiath go mat ke dutuuc keethiɛr ku tok.

Currently Selected:

Dutuuc 1: LEKJOT

Highlight

Copy