Dutuuc 2

1Ɣɔn ye akol e Thiɛrdhiec ye bii, ke kɔc gueer tetok. 2Go awuɔu dai bɛn nhial ci awuɔu de kɔɔr dit, ku thiɛŋ ɣot ebɛn, ɣon cik kek nyuc thin. 3Go liep tuɔl e ke tek roth ci man de liep ke mac; goki nyuc ne kɔc nhiim kedhia. 4Go kɔc nyuɔc ne Jɔŋdiit Lajik, ku cɔk kɔc cɔk jam ne thook ke juur kɔk, ne jam ne yine Jɔŋdiit Lajik ke.

5Ku Judai aaceŋ ne Jeruthalem, kɔc piath ke juur kedhia tɔ ne piny nom. 6Ku na yi piŋki awuɔu, ke dun dit gueer ne ke liep kenhiim, ne piŋ piŋ kek ke e ke jam ne thoŋ de raan ebɛn. 7Goki ke liap nhiim kedhia, goki gai ku thiecki, Yi ŋɛmka, ci keekɔc jamka kedhia cik ye kɔc ke Galili? 8Ku yeŋo piŋ wɔ keekɔcke e jam ne thook ke bɛikuɔk eke dhietheke wɔ thin? 9Ye Parthoi, ku Medoi, ku Elumai, ku kɔc ke Methopotamia, ku Judaya, ku Kapadokia, ku Ponto, ku Athia, 10ku Purugia, ku Pampulia, ku Yijep, ku bɛi ke Libya ker Kurene, ku kamaan ci bɛn ne Roma, ye Judai ku perothilutoi, 11ku kɔc ke Kerete, ku kɔc ke Arabia, aapiŋukeek e ke jam ne thookuɔ ne luɔi diit cii Nhialic loi. 12Goki gai kedhia, goki nhiim liap ku thiecki roth, Yi yeŋo ekene? 13Ku bui keek ne kɔc kɔk, Yi kaamiɔl e piukeabiɛi.

14Go Petero rɔt jɔt kene kɔc thiɛr ku tok, ku jɔt eror ku yook ke areet, Ye we kɔc ke Judaya, ku we kɔc ceŋ Jeruthalem wedhia, nyiɛcka yekene, ku liɛpka weyith welcie. 15Keekɔcke aaken miɔl ne piukeabiɛi, ci man enhia thooŋ we ye. Ci thaa ŋoot ke ye diak emane? 16Ekene ee ke e ci lɛk wɔ ɣɔn ne nebi cɔl Joel;

17Ye kee luel Nhialic, Ye kabi tɔ ne kol ciɛn,

An bi Jɔŋdiitdie wal piny ne raan ebɛn:

Ku wɛɛtkuɔn kene nyiirkuɔn aabi ya lek ne kanhial,

Ku rorthinduɔn abi ya keu,

Ku roorditkuɔn aabi ya nyuɔth:

18Ee yic, an bi Jɔŋdittdie wal piny ne awuutcie ku nyiircie ke luɔi ne akolka, ku kaabi ya lek ne kanhial.

19Ku an bi kagɛiyeke nyuɔɔth nhial,

Ku an bi ciitcie nyuɔɔth ne piny nom,

Riɛm, ku mac, ku tuɔlrur:

20Akɔl abi wel ke col,

Ku wel pɛɛi ne riɛm,

Aŋoot akol e Bɛnydit ke ken bɛn,

Akol diit lɔwai:

21Ku kabi tɔ, raan ebɛn ran ye rin ke Bɛnydit cɔɔl abi luɔk.

22We kɔc ke Yithrael, piɛŋka keewelke: Yecu de Nadhareth ran cii Nhialic nyuɔth we ne luɔi dit ku kagɛiyeke ku ciit ci Nhialic ke loi ne yen ne weciɛl yic ci man nyic we ke, 23yenekee yine Nhialic ye kɔc ke nyic ne yepiɔu, ku week acak piat ne tiɛm ageer kɔu, ku nakka ne cin ke kɔc rac. 24Go Nhialic muɔn muɔn en wei puɔl, ku cɔk jɔt rɔt, akene thou leu ne muk. 25Dabid ee jam ne yen,

Ye an ci Bɛnydit ya ŋem ne anyin ne nyindhia,

Ne tɔ ne bian cuecdie, duɔke an bi yuik:

26An ci piɔu lɔyum ne yeluɔine, ku liemdie ee pial;

Ku guɔpdie abi ya dhiac ke ŋaath:

27Yin ci tiɛpdie bi nyaaŋ pan de atip ke kɔc,

Ku yin ci Toŋdun Lajik bi cɔk mɛr a bi liu.

28Yin ci a nyuɔth dhɔl ke piir;

Ku yin bi ɣa ya cɔk mit piɔu ne yinyin.

29Wɛɛt ke awa, we ya yɔɔk ne yic, kukuarda Dabid ee thou ku thiɔk, ku raŋde atɔ kene wɔɔk emane. 30Dabid ee ye nebi, ku nyic kueeŋ cii Nhialic rɔt kueeŋ ne mɛnhden bi nyuc ne thonyde nom. 31Yenekee luel en keewelke ne jon bii Yecu rɔt bɛɛr jɔt, ye Yecu akene nyaaŋ pan de tip ke koc, ku ye guɔp de Yecu aken maar a bi liu. 32YeYecune acii Nhialic cɔk jɔt rɔt, ci man e ŋem wɔ ye wɔdhia, 33ku jɔt ne ciin cuecde ye Nhialic. Ku loom miɔc ci Wun luel de Jɔŋdiit Lajik. Yemiɔce yenekee wal piny ci man ŋem we ye ku piɛŋka. 34Dabid aken lɔ pan nhial; ku kee jam,

Ye Bɛnydit ee Bɛnydiitdie yɔɔk, Ye nyuɔce ne bian cuecdie,

35Aɣet kol ban yin cɔk kɛc kɔc nɔŋ ater kene yin kɔth.

36Cakka muk kɔc ke Yithrael kedhia ne keyith, yeYecumane, cak piat e tiɛm ageer kɔu, acii Nhialic cak cɔk ye Bɛnydit ku ye Kritho.

37Na cik keewelke piŋ, go wel ke gut piɔth, goki Petero yɔɔk ku dutuuc kɔk, Yi wɛɛt ke awa, buk ŋo loi? 38Go Petero ke yɔɔk, Ye wɛlka wepiɔth, ku cakka roth baptith wedhia ne rin ke Yecu Kritho bi karɛckuɔn bi ke nyaai; ku we bi miɔc de Jɔŋdiit Lajik kap. 39Wɛt ɣɔn ee keduɔn, ku kee ke de mithkuɔn, ku kee ke de alɛi, de kɔc ci Nhialic ke cɔɔl bik bɛn enɔŋ en. 40Go Petero ke nyuɔɔth, ku cɔɔl ke ne wel juec kɔk, ku yook ke, Ye kuɔnyka roth ne riny de emane ci ŋɔl. 41Ku kɔc ci keewelke muk aa baptith ne Petero, ku kɔc ye thiɛrnyɛny thiɛrdiak aa juak thin ne ekole. 42Goki dhiac e ke pioceke ne dutuuc, ku mɛtki ne wɛɛk de monoi kene lɔŋ.

43Go kɔc kedhia goki riɔc, ku kagɛieke ku ciit kaa loi ne dutuuc. 44Ku kɔc ci gam kedhia kaa mat tetok, ku mɛɛtki kaken nhiim. 45Goki kaken ɣaac, ku tekki ke kene kɔc kedhia kɔc cin kaŋ. 46Ku ye kɔc cool e te ye lɔ mat yekalu ne akol yic, ku lek monoi waak ne bɛiken, 47ku camki miith ne piɔu mit ku ne piɔn luɔi, ku lecki Nhialic, ku lɔ kɔc kedhia piɔth yum. Go Nhialic ke ya juak yic ne akol yic ne kɔc cike luɔk.

Currently Selected:

Dutuuc 2: LEKJOT

Highlight

Copy