GYƆNI 15

1Ka Yisa daa laa n‑yɛli ba yɛttɔ'anyɛsiri zaŋŋi n‑kyaŋŋi ban zaŋŋi tiseaa wala koom m‑maanni ba daam la: ni, “Mani n nyɛ tiwanni maa ni yɛlimaŋni, ka m Ba mun nyɛ la tii maa daana. 2Wuliseaa kan bɛ ma ni ka bu wanni wala, m Ba nin ŋmaai ka m‑basi; amaa wuliseaa kan wanni walisuma, u nin gɔsi ka suŋŋa n‑waasi, ka ka niŋi kasi, ni ka ti maali n‑wanni pam. 3Tɔ; yarima muna - ba pun gɔsi ya suŋŋa ka ya yi niŋi kasi, ka di nyɛ la yɛttɔ'aseesi man tɔ'asi n‑ti ya wa zugu. 4Ya kpalimma m‑bɛ man saani, ka n gba kpalim m‑bɛ ya ni. Tiwulli ku toaai n‑wali wala ka toori yiiko ni, faasee ka ka kpalim m‑bɛ tii maa yiiko ni: lala ka ya gba ku toaai n‑niŋi seelli, see ka ya kpalim man saani ka man ti ya yiiko. 5Mani n nyɛ tii maa, ka ya mun n nyɛ ka wula. Ya sɔ ŋɔn kpalim m‑bɛ ma ni ka n gba kpalim m‑bɛ u ni, di daama nin toaai n‑wanni wala pam, amaa man yi ka ya saani ya ku toaai n‑niŋi seelli. 6Ŋɔnkam zaa bu kpalim m‑bɛ ma ni, ba nin ŋmaai di daama m‑basi, hoo wuliseaa kan bu wanna, ka ba basi ka, ka ka kuui; ka ba la'asi anŋɔ taabu nti nyɔa, ka a di bugum. 7Ya yi kpalim m‑bɛ ma ni, ka n yɛligu maa kpalim m‑bɛ ya ni, ya yi ti susi bunseelli kam zaa, ya nin nya di. 8M Ba yuuri nin nya pɛ'abu dinŋɔ zugu, ni, ya wanni la wala pam, ka ya leebi n nyaandɔliba. 9M Ba ŋɔn wuri ma seem, lala ka n gba wuri ya; ya kpalimma m‑bɛ n wurilim maa ni. 10Ya yi deaai n zaaligu la ya nin kpalim m‑bɛ n wurilim maa ni; hoo man daa deaai m Ba zaaligu la ka kpalim m‑bɛ u wurilim maa ni la.”

11Ka u daa laa n‑yɛli ba, ni, “N tɔ'asi yɛttɔ'a wa n‑ti ya, ni n sufupeelli la ti kpalim ya saani ka ya sufupeelli zoaai. 12Man zaaligu nŋɔa#:- ni, ya wuri taaba hoo man wuri ya seem wa. 13Ninsaala ku toaai m‑mari wurilim n‑gaari nŋɔa, ni, sɔ n zaŋŋi u nyɔvuri m‑pa talima u zɔdima zugu. 14Yarima mun n nyɛ n zɔdima. Ya yi sakki n‑tumni man boori seem, n zɔdima n nyɛ ya. 15N ku laa m‑booli ya n daaba yaasa, dama daabri zaa bu mi u dugma ŋɔn tumni seela. Ay! M boonni ya la n zɔdima, dama n zaŋŋi man wum yɛliseesi m Ba saani zaa n‑wulisi ya. 16Pa yarima n daa yiisi ma, amaa mani n daa yiisi ya, ka tum ya ni ya yima n‑wanni wala pam ka ya wala nin ti yuui. Ka lala zugu nin kyɛ ka ya yi boori seelli m Ba saani, man yuuri zugu, ŋɔn nin zaŋŋi n‑ti ya. 17Dinŋɔ zugu ka n yɛtti ya, ni, see ka ya wuri taaba.”

18Ka u daa laa n‑yɛli ba, ni, “Duniya dima yi yaai ya, yan baŋŋma ka ba pun yaai mani pɔi, ka naayi yaai ya. 19Ya yi da nyɛ la duniya wa maŋtoori niriba, duniya wa da naa m‑boori ya yɛla; amaa yan pa duniya wa niriba zugu, man ŋɔn gamsi ya n‑yiisi duniya wa yɛla ni zugu, lala ka duniya wa yaai ya. 20Ya teaam man ŋɔn daa yɛli ya seem la, ni, daabri bu gaari u dugma. Ba yi da tum ma putoo, ya gba ka ba nin niŋi ya putoo. Ban mun yi deaai n noori, ba nin deaai ya gba noori. 21Anŋɔ zaa ka ba nin niŋi ya man zugu, dama ba bu mi m Ba ŋɔn daa tum ma na maa. 22N yi daa bu kyɛ na n‑tɔ'asi n‑ti ba, ba daa naa n‑ku deaai taalli; amaa pampaŋŋɔ ba ku laa n‑toaai n‑kyiisi n‑yi ba taalli maa ni. 23Ŋɔn yaai ma zaa, m Ba gba ka u yaai maa m‑paasi. 24N yi daa bu wulisi ba tunseesi an na zi n‑tum, ba daa naa n‑ku deaai taalli; amaa pampaŋŋɔ ba pun nya ma ka laa n‑yaai ma, n‑tabi m Ba gba. 25Di bɛ la lala ni di kyɛ ka ba zaaligu yɛligu la niŋi yɛlimaŋni, ni, ‘M bu niŋi ba seela ka ba yaai ma yɔri.’

26Saawara Daana maa mun ya n‑kyɛ na, man ŋɔn ya n‑tum sɔ maa ni u yi m Ba saani m‑paai ya na - Naawunni Sii nla, ka u nyɛ la yɛlimaŋni daana, ka yiiri m Ba saani na. U yi ti kyɛ na, u nin zaŋŋi n yɛla n‑wulisi ya, dama n sɛhara daana n nyɛ u. 27Ka di sumsi ni ya gba di n sɛhara n‑wulisiri niriba, dama ya daa bɛ n saani, halli piiligu ni sa.”

Currently Selected:

GYƆNI 15: maw

Highlight

Copy