GYƆNI 14

1Ka Yisa daa laa n‑yɛli ba, ni, “Ya di kyɛ ka ya sufu sa'am. Ya niŋma Naawunni yɛdda, tɔ - ka niŋi man gba yɛdda. 2Duri pam m bɛ m Ba yiri maa ni, ka n wa ni n ti maali beebu ziiya siri n‑zaali ya. Di yi da pa lala, n naa n‑ku yɛtti ya, ni, lala n nyɛ di. M bu ma'ari ya la ziri. 3Ka man kyaŋŋi m‑maali ya beebu zii n‑naai, n nin labi na nti zaŋŋi ya n‑kyaŋŋi, ka man ni yarima la'am m‑bɛ ni. 4Ya mi man wa luginseaa maa soori.” 5Ka Tɔmaasi daa yɛli u, “Ay, n dugma, ti bu mi nyin wa luginseaa maa; ti ya niŋi la wula m‑baŋŋi soori m‑paai bɛni sa?” 6Ka Yisa labsi n‑yɛli u, ni, “Mani n nyɛ soori maa; mani n nyɛ yɛlimaŋni gba, ka mani n nyɛ nyɔvuri m‑paasi. Sɔ ku toaai n‑kyaŋŋi m‑paai ti Ba Naawunni saani faasee ka u dɔli ma n‑kyaŋŋi. 7Yan yi baŋŋi ma wa, ya nin baŋŋi m Ba gba; ka pampaŋŋɔ zaŋŋi n‑kyɛnna ya yi baŋŋi u, ka laa n‑nya u.” 8Ka Filipi daa yɛli u, “N dugma, wulisim ti i Ba maa - lala yi sakki ti!” 9Ka Yisa daa labsi n‑yɛli u, ni, “N zɔ Filipi, man ni yan zaa kpɛya n‑yuui pam, ka i na bu mi ma, fa? Ŋɔnkam pun nya ma pun nya m Ba maa gba. Ka wula ka i yɛli lala? - ni, ‘Wulisim ti i Ba maa.’ 10I bu niŋi yɛdda, ni, m bɛ la m Ba saani, ka m Ba mun bɛ la man saani? Yɛttɔ'aseesi man tɔ'asi n‑ti ya maa pa la seesi an yi m mammaŋŋa saani na. Ay - m Ba ŋɔn bɛ n saani maa - ŋɔna n tumni tuma maa. 11Ya niŋma ma yɛdda, ni, m bɛ la m Ba maa saani ka m Ba gba bɛ man saani. Di yi pa lala, ya niŋma ma yɛdda n tuma maa zugu. 12Yɛlimaŋni ka n yɛtti ya wa, ni, ŋɔnkam niŋi ma yɛdda nin tum kaman man tumni seem maa. U nin tum halli tunkpeema n‑gaari lala gba, dama man wa la m Ba maa saani. 13Ka ya yi ti susi bunseelikam zaa n yuuri zugu, n nin tum lala, ka lala yi kyɛ ka m Ba gyirima ti yi paalu, man u Bii maa zugu. 14Ya yi susi ma bunseelikam n yuuri zugu, n nin niŋi di.”

15Ka Yisa daa laa n‑yɛli ba, ni, “Ya yi wuri ma, ya nin sakki n noori zaaligu maa. 16Ka n nin susi m Ba Naawunni, ka u nin ti ya suŋŋnisɔ yaasa, ka ŋɔn Suŋŋna maa nin bɛ ya saani halli saha din ka tariga. 17Naawunni Sii nla, yɛlimaŋni daana. Duniya wa dima ku toaai n‑deaai u, dama ba bu nya u, bee, m‑baŋŋi u. Yarima mun mi u, dama u kpalim la ya saani ka u nin ti bɛ ya ni. 18N yi ti kyaŋŋi, ya ku kpalim ya kɔkɔa, hoo kpibisi ŋɔn kpalim seem. Ay! - N nin labi ya saani na. 19Di kpalim la beela ka duniya dima ku laa n‑nya ma, amaa yarima nin nya ma; ka man ŋɔn vu maa zugu, ya gba nin vu. 20Dabsiri maa yi ti kyɛ na, ya nin baŋŋi, ni, m bɛ la m Ba maa saani, ka ya mun bɛ n saani, halli ka man gba bɛ ya saani. 21Ŋɔnkam deaai la n noori zaaligu ka sakkri n‑tumni lala, ŋɔna n nyɛ sɔ ŋɔn wuri ma. Ka ŋɔnkam wuri ma muna - m Ba nin wuri di daama, ka man gba nin wuri u, ka nin kasigi m maŋŋa n‑wulisi u.” 22Di saha ka Gyuudasi bila daa yɛli (pa Gyuudasi Isikariyɔti ŋɔn daa figsi Yisa nla, amaa u tɔ'ama), ni, “N dugma, i ya niŋi la wula n‑kasigi i maŋŋa n‑wulisi ti, ka duniya dima maa ku nya i?” 23Ka Yisa daa labsi n‑yɛli u, “Ŋɔnkam wuri ma nin deaai n yɛligu, ka m Ba nin wuri u, ka man ni m Ba nin kyɛ u saani na ka ti la'am m‑bɛ ni. 24Ŋɔnkam mun bu wuri ma ku deaai n yɛligu maa, halli ka yɛligu maa pa la n dinni, yɛliseaa yan pun wum la, amaa m Ba ŋɔn daa tum ma na yɛligu n nyɛ ka.”

25Ni, “Dinŋɔ ka m pun yɛli ya ka man kur bɛ la ya saani maa. 26Suŋŋna maa muna, u yi ti paai na, ŋɔn nin wulisi ya bunseelikam, ka teaari ya man ŋɔn pun yɛli ya seem maa zaa. Ŋɔna n nyɛ Sii Kasi maa, ka m Ba Naawunni nin tum u na man yuuri zugu. 27Sufudoaa ka n tiri ya; di nyɛ la m mammaŋŋa sufudoaa ka n zaŋŋi n‑tiri ya. Pa duniya dima maa ŋɔn mari sufudoaa seem maa tataabu ka n zaŋŋni n‑tiri ya. Yan di kyɛ ka ya sufu sa'am, ya mun di kyɛ ka dabeem mari ya. 28Ya pun wum man yɛli ya seem, ni, n wa ni maa, ka n nin laa n‑labi ya saani na. Tɔ, ya yi siri wuri ma, ya sufu nin maai dizugu, dama n wa la m Ba saani maa, dama ŋɔna n gaari ma. 29N ya n‑yɛli ya ni pɔi, ka di zaa naayi niŋi; ka di yi ti niŋi, ya nin mari yɛdda di zugu. 30N ku laa n‑toaai n‑tɔ'asiri n‑tiri ya, bee, n‑diri azama, ka di ti yuui, dama ŋɔn su duniya wa fukumsi la kyɛnni na. U bu su la mani, 31amaa di niŋni lala nti kyɛ ka duniya dima nin baŋŋi, ni, n wuri la m Ba maa, ka lala zugu n tumni la bunseelikam zaa ŋɔn zaali ma seem.”

“Tɔ: ya doaama ka ti kyaŋŋi!”

Currently Selected:

GYƆNI 14: maw

Highlight

Copy