GYƆNI 13

1Ban daa ti piili m‑puusi Yakki-n‑Gaari Kyuu maa sahanseaa la, Yisa ni u nyaandɔliba n daa bɛ ni: u daa baŋŋiya, ni, saha maa paaya ni u bakki ka kyɛ duniya wa n‑kyaŋŋi u Ba saani. Ka ŋɔn daa pun wuri u niriba wa seem la - baseeba ban ya kpalim m‑bɛ duniya wa puuni maa - u daa na wuri ba halli ni u yaa tariga. 2Di saha ka Sintaani daa kpɛ Gyuudasi sufu ni, ŋɔn Saimoon Isikariyɔti bii la, ni u ti kyɛ ka u zaŋŋi u sufu ni teesibeeri n‑gbaai Yisa figsigu la. U daa pun niŋi lala pɔi, ka ba naayi la'am ni ba ti di. 3Yisa mun daa mi halli, ni, u Ba Naawunni pun zaŋŋi bunseelikam zaa n‑tisi u nuu ni; ka laa m‑mi, ni, u daa yi ŋɔn Naawunni saani na ka ya labi n‑kyaŋŋi u saani yaasa. 4Ka dinŋɔna u daa doaai bundira diibu zii la ni n‑zaani nti yeaai u kparigu ka zaŋŋi bɔduuwa n‑lɔ u seaa ni. 5Ka naayi zaŋŋi koom n‑niŋi tasilaa la ni n‑gbaai u nyaandɔliba nɔba peaari; ka u daa zaŋŋi bɔduuwa la n‑nyeesi n‑nyeesi a n‑ti ba. 6U daa niŋi lala nti paai Saimoon Piita saani na: ka ŋɔn Piita daa yɛli u, ni, “Kala, n dugma, i ya peaai la man nɔba bee?” 7Ka Yisa daa labsi n‑yɛli u, ni, “Man ŋɔn niŋni seem maa muna, i ku toaai m‑baŋŋi di gbinni pampaŋŋɔa; di nyaaŋŋa ka i nin ti baŋŋi.” 8Ka Piita yɛli, “Ay, n ku sakki ni i peaai n nɔba la, halli sahakam!” Ka Yisa yɛli u, ni, “N yi bu peaai i, i nuu laa n‑ka n yɛla ni.” 9Ka ŋɔn Saimoon Piita daa yɛli, ni, “Tɔ, n dugma! Ka dinŋɔna pa n nɔba kɔkɔ ka i ti ya peaai - see ka i peaai n nuusi ni n zugu m‑paasi!” 10Ka Yisa yɛli, ni, “Ninvugsɔ ŋɔn pun su koom, di daama bu laa m‑boori suubu yaasa, amaa u peaai u nɔba kɔkɔa. Lala nin kyɛ ka u leebi bunveelli kasi zaa.” Ni, “Ii, ya siri nyɛ la ninvugseeba ban peaai kasikasi. Amaa pa ya zaa.” 11(U daa pun baŋŋi dɔsɔ ŋɔn ya figsi u la yɛla, ka lala zugu ka u daa yɛli, ni, pa ba zaa n nyɛ ninvugveela kasikasi.)

12Tɔ: ka ŋɔn daa peaai ba zaa n‑naai maa, u daa maali n‑yɛ u kparigu n‑labi bundira diibu ziiya. Di saha ka u daa yɛli ba, ni, “Ammi, ya baŋŋi man ŋɔn niŋi ya seem maa? 13Tɔ, di gbinni nŋɔa#:- Ya boonni ma la, ni, ya karimba ni ya dugma, bee m ma'ai ni? Ka yan yɛtti seem wa, di mari soori, dama man nyɛ la lala n‑ti ya. 14Tɔ, ka mani, ya karimba ni ya dugma la, n peaai ya nɔba n‑ti ya - ka di gbinni nyɛ la: see ka yarim zaa gba ti peaari ya taaba nɔba n‑tiri ba. 15N tum tuma wa n‑ti ya ni n ti wulisi ya ya tunsuŋŋu soori ŋɔn nyɛ seem la, ka ya gba ti tumni lala. 16Yɛlimaŋni ka n yɛtti ya wa, ni, daabri bu kpeem u dugma, bee, tuumu n‑kpeem ŋɔn tum u. 17Anŋɔ zaa ka ya pun baŋŋi: tɔ, zugsuŋŋu nin bɛ ni n‑ti ya, ka di nyɛ la yan wumni a n‑dɔli a maa. 18Pa ya zaa yɛla ka n yɛtti maa: man mi man gamsi ninvugseeba la. See ka din daa sɔbi n‑dooli maa siri nin ti niŋi lala, ni: ‘Man ni ninvugsɔ ŋɔn la'amni n‑diri diibu ni taaba, di daama yi la n nyaaŋŋa nti sa'am n yɛla.’ ” 19Ni, “Pampaŋŋɔ n daŋŋi n‑wulisiri anŋɔ zaa n‑tiri ya pɔi, ka a ti naayi niŋi. Ka dizugu a yi ti siri niŋi lala, ya nin baŋŋi n‑niŋi yɛdda, ni, ‘mani n nyɛ Man Ŋɔn Bɛ ni maa’. 20Yɛlimaŋni ka n yɛtti ya wa, ni, ninvugsɔ ŋɔn ya n‑deaai n tuumusɔ suŋŋa, mani ka u deaara; halli ni ninvugsɔ ŋɔn deaari ma muna - Sɔ ŋɔn tum ma gba ka u deaara.”

21Yisa ŋɔn daa yɛli dinŋɔ n‑naai maa, sufusa'aŋŋu daa ti gbaai u, ka u daa yɛli u noori yɛlimaŋni zaa, ni, “Ya sɔ n yɛ koosi ma n‑figsi ma.” 22Ka u nyaandɔliba maa sufu daa gyɛtta, ka ba gɔsiri taaba m‑birisiri ni ba ti baŋŋi sɔ maa. 23Ka Yisa nyaandɔlisɔ daa pɔri n‑tabli u saani; ŋɔn daa wuri pam sɔ n‑daa la. 24Ka Saimoon Piita daa bugsi n‑yɛli doo wa, ni, u boosima Yisa m‑baŋŋi ŋɔn tɔ'asiri sɔ yɛla maa. 25Di saha ka nyaandɔla maa daa vuui m‑paai Yisa n‑sɔ'ai m‑boosi u, ni, “Ŋɔni nla, n dugma?” 26Ka Yisa daa labsi n‑yɛli u, “I yi ti nya ka n ŋmaai diibu n‑sugi laa ni n‑zaŋŋi n‑ti sɔa - tɔ, ŋɔna nla.” Ka u daa ŋmaai n‑sugi ka zaŋŋi n‑ti Gyuudasi, Saimoon Isikariyɔti bii la. 27Ka Gyuudasi ŋɔn daa deaai diibu la n‑naai, di saha ka Sintaani daa kpɛ u sufu ni. Ka Yisa yɛli u, “Nyin ŋɔn ya tum seelli maa, tumma yooma!” 28U nyaandɔliba maa mun daa bu mi u yɛligu wa gbinni. 29Halli Gyuudasi daa su ba la'abooriga yɛla, ka baseeba daa yɛtti, ni, Yisa tɔ'asiri ligri yɛttɔ'a n‑ti u, ni, u kyɛma nti da ba kyuu neema an kpalim na, bee, n‑yiisi zakka n‑ti faradima. 30Tɔ, ka Gyuudasi daa deaai diibu la ka doaai yooma n‑yi. Di saha ka yuŋŋu daa zibi zimm.

31Gyuudasi ŋɔn daa bakki n‑naai la, Yisa daa yɛli ba, ni, “Pampaŋŋɔ ka Ninsaala Bii maa gyirima yɛ yi paalu. Ka Naawunni gba gyirima yi paalu u saani na. 32Ka din bɛ la lala zugu, dinŋɔna Naawunni nin kasigi ka u gyirima ti yi paalu Ninsaala Bii la saani, halli yoomyooma ka u nin niŋi lala.” 33Ni, “M biisi, n ku laa n‑yuui ya saani: di kpalim la beela ka ya nin ti bɔ m‑bɔ n ziiya n‑gyɛa. Man daa pun yɛli lala n‑ti Yɛhudiya dima maa, ni, man wa seelli maa, ya ku toaai m‑paai bɛni: tɔ, ka pampaŋŋɔ n yɛtti lala n‑tiri ya gba. 34N zaanni la zaalipaalli n‑tiri ya, ni, ya wuri taaba; hoo man daa wuri ya seem la, yan mun wuri taaba lala. 35Ya yi siri yɛ wuri taaba lala, dinŋɔna sɔkam zaa nin baŋŋi, ni, ya nyɛ la n nyaandɔliba.”

36Ka Saimoon Piita daa boosi u n‑yɛli, “Yani ka i wa, n dugma?” Ka Yisa daa gyɛrigi u, ni, “Man n wa seelli maa, i ku toaai n‑dɔli ma m‑paai bɛni pampaŋŋɔa: amaa i nin ti naayi dɔli n nyaaŋŋa m‑paai sahanseaa.” 37Ka Piita daa laa n‑yɛli u, ni, “N dugma, bɔ n lee n‑kyɛ ka n ku toaai n‑dɔli i pampaŋŋɔa? N sɛ'asiya ni n kpi n‑ti i.” 38Ka Yisa labsi n‑yɛli u, ni, “Ni, i sɛ'asiya ni i kpi n‑ti ma, bee? Ay! - yɛlimaŋni ka n yɛtti i wa, ni, nɔroo sa ku ti kum ka di pa la ka nyin sa nin pun kyiisi napɔmbuta, ni, i bu mi ma.”

Currently Selected:

GYƆNI 13: maw

Highlight

Copy