GYƆNI 12

1Di daa kpalim dabsa ayoobu pɔi, ka ba ya di Yakki-n‑Gaari Kyuu la. Di saha ka Yisa daa kyɛ Bɛtani tinkpaŋŋa na, tinseaa Lazarusi yiri ŋɔn daa bɛ ni, Lazarusi sɔ Yisa ŋɔn daa pun neaai kum ni la. 2Di zugu ba daa dugi bundira n‑ti Yisa, ka ŋɔn ni Lazarusi daa la'am n‑dira, ban ni daadam pam: ka Maata daa gyeemna. 3Di saha ka Lazarusi sunzɔpɔ'a Mariama la daa zaŋŋi ga'ari ni turaali kpaam, bun mari nyunya'asiri ka bu ligri zoaai pam, m‑mari na nti soosi Yisa nɔba, ka laa n‑zaŋŋi u zɔbwɔ'ala n‑nyeesiri a. Ka yiri maa ni sɔkam daa ti wumni turaali maa nyunya'asiri maa. 4Gyuudasi Isikariyɔti muna, Yisa nyaandɔlisɔ ŋɔn daa ya figsi u la, daa yɛli, 5ni, “Wula zugu ka turaali wa bu koosi? Ba yi da koosi bu, ligri pam da naa n‑yi na ka lala ligri naa n‑toaai m‑puri n‑tɔri n‑ti faradima maa.” 6Ŋɔn daa yɛli lala maa gbinni daa pa la u ba'a m bɛ faradima maa yɛla ni, amaa ligri yɛla ni, dama u daa guri la ba la'abooriga, ka mun daa zuuri ka puuni la'aseesi. 7Amaa Yisa daa labsi n‑yɛli, “Ay, kyɛl u! U zaŋŋi turaali kpaam wa n‑zaali, see ka n sɔ'abu daari ti paai. 8Ya kur nin mari faradima ya saani sahakam. Man mun ku kpalim m‑bɛ ya saani sahakam.”

9Yɛhudiya dima daadam pam daa ti wum, ni, Yisa daa bɛ bɛni. Dizugu ba daa la'asi na ni ba ti nya u, ka di pa lala zugu kɔkɔa, amaa ni ba ti nya Lazarusi gba, Yisa ŋɔn daa yisigi sɔ kum ni la. 10Lala zugu ka gyeeŋŋu toondaandima daa ŋmɛ taaba saawara ni ba ti baŋŋi ba nin niŋi seem n‑ku Lazarusi gba. 11Dama ŋɔn Lazarusi yɛla zugu daa kyɛ ka Yɛhudiyadima pam daa niŋni la Yisa yɛdda.

12N‑neaai beoo ka Yisa daa lu soori, ni u kyaŋŋi Gyɛrusalɛm. Ka tiŋŋa maa puuni zama pam daa ti wum lala, 13ka daa zaŋŋi tiisi wula n‑yi na ni ba ti tuusi u soori. Ka ba daa ŋmeeri kpaliŋŋa n‑tasiri n‑yɛtti, ni#:-

“Hoosana!

Zugsuŋŋu bɛ ni n‑ti u -

N‑ti sɔ ŋɔn zaŋŋi ti Dugma yuuri n‑kyɛnni na!

Zugsuŋŋu n‑ti Izraɛli Naaba!”

14Yisa mun daa nya buŋŋa m‑ba, hoo din sɔbi n‑dooli seem la, ni#:-

15“Di zɔri dabeem, nyin pɔ'asariga wa,

Nyin Zayɔn tiŋŋa wa!

Nyama, i Naaba n kyɛnni i saani na wa!

U sigsi u maŋŋa baalimm,

Ka baari bumbila n‑kyɛnni na.”

16Lala saha maa ka u nyaandɔliba daa bu baŋŋi anŋɔ gbinni; amaa Yisa ŋɔn daa kpɛ u gyirima zii la n‑naai maa ba daa naayi teaai yɛla wa zaa m‑baŋŋi, ni, ba daa daŋŋi n‑sɔbi Yisa yɛla lala. 17Di saha ka niriba pam daa dɔli Yisa n‑kyɛnni na. Ba daa dɔla m‑moonni Lazarusi yɛla, ni, ŋɔn Yisa n daa booli u, ni, u yim gballi maa ni na, ka daa neaai u kum ni. 18Yɛttɔ'a wa zugu gba ka niriba pam daa yi na ni ba ti tuusi u, ŋɔn daa tum makkri tumni wa zugu. 19Ka dinŋɔna Farisii dima maa daa fabinni n‑tiri taaba, ni “Ya bu nya? - Ti zabri u n‑gyɛa! Duniya wa dima maa zaa yi na ni ba ti dɔli u nyaaŋŋa!”

20Ninvugseeba daa bɛ la timpuuni, ka ba daa yi Griika dima tinsi na ni ba ti di Kyuu maa. 21Ka Griika dima wa seeba daa kyɛ Filipi saani na, nyaandɔlisɔ ŋɔn daa yi Bɛtsaida na - tinkpanseaa kan zɛ Galilii tingbaŋŋu ni. Ba daa yɛli u, ni, “Ti Bapira, ti boori ti nya Yisa.” 22Filipi mun daa paai Anduru saani na ka ba daa la'am m‑bɔ Yisa ziiya nti yɛli u. 23Di saha ka Yisa daa labsi n‑yɛli ba, ni, “Tɔ! Saha maa paai na: sahanseaa ba nin zaŋŋi gyirima n‑ti Ninsaala Bii maa. 24Yɛlimaŋni ka n yɛtti ya wa, ni, kaburli yi bu buri tiŋŋa n‑kpi, ka kpalim la ka kɔkɔa; amaa ka yi ti kpi muna, ka nin buli n‑niŋi suŋŋasuŋŋa. 25Di wulisiya, ni, sɔ yi ti boori u nyɔvuri pam, u nin kɔŋŋi ka; sɔ mun yi bu boori u nyɔvuri lala, duniya wa puuni, di daama nin guri di m‑mari halli saha kan ka naari. 26Ninvugsɔ ŋɔn boori u tumni n‑tiri ma, kyɛ ka u dɔli n nyaaŋŋa: ka man ŋɔn ya bɛ seela maa, bɛni ka n tuntumna wa nin ti bɛ ni. Ka ŋɔn tumni n‑tiri ma la, m Ba Naawunni nin ti di daama gyirima.”

27Ka Yisa daa laa n‑yɛli, ni, “Pampaŋŋɔ ka n sufu sa'am: n ya n‑yɛli la wula? - N nin yɛli, ni, ‘M Ba, fa ma m‑basi saha wa yɛlimugsa wa puuni.’, bee? Ay! dama yɛlimugsa wa zugu ka n daa kyɛ na nti paai saha wa na. 28N nin yɛli, ni, ‘M Ba, kyɛ ka i yuuri nya pɛ'abu!’, bee?” Ka di saha ka kukɔri n daa tɔ'asi saazugu na, ni, “N siri pun kyɛ ka n yuuri nya pɛ'abu, ka ka nin laa n‑nya pɛ'abu yaasa.” 29Zama maa ni ninvugseeba daa ti wum lala ka yɛtti taaba ni, “Saa tasiya!” Ka seeba mun daa yɛtti, ni, “Ay! Amaa malaakasɔ tɔ'asi n‑ti u!” 30Yisa daa yɛli ba, ni, “Pa man zugu ka kukɔri wa tɔ'asi n‑yi na, amaa yarima zugu. 31Pampaŋŋɔ ka ba katti duniya wa sariya. Ka ŋɔn su duniya wa fukumsi la muna - ba nin lusi u n‑kari m‑basi kpaŋŋa sa. 32Man muna, ba yi ti zaŋŋi ma n‑sa n‑ya'ali saazugu maa n nin kyɛ ka sɔkam kyɛnni n saani na.” 33Ŋɔn daa yɛli lala maa, u daa wulisiri ŋɔn ya n‑kpi seem maa. 34Ka daadam daa yɛli, ni, “Ba daa pun yɛli ti ti zaaligu ni, ni, Naawunni yi ti kyɛ ka Masiiya maa kyɛ na n‑di naam n‑tuligi ti, u nin kpalim m‑bɛ ni sahakam; tɔ, ka nyin mun yɛtti, ni, Ninsaala Bii maa nin ti ‘sa n‑ya'ali saazugu’. Dinŋɔna, ŋɔni n lee n‑nyɛ ‘Ninsaala Bii’ wa?” 35Ka Yisa daa yɛli ba, ni, “Saha beela yaasa ka neesim maa nin kpalim m‑bɛ ya saani. Tɔ; yan mari neesim sahanseaa la, see ka ya kyɛnni suŋŋa ka zibsim di gbaai ya. Sɔ yi ti kyɛnni zibsim ni, di daama bu mi ŋɔn kyɛnni seela. 36Yan mari neesim maa sahanseaa la, see ka ya niŋi neesim maa yɛdda, ka ya nin leebi neesim maa niriba.”

Yisa daa yɛli lala n‑naai, ka daa kyaŋŋi nti sɔ'ai ka kyɛ ba. 37Halli ŋɔn daa pun tum alahazibu tuma ni makkri tuma ka ba nini nya maa zaa yɔri, ba daa bu sakki n‑niŋi u yɛdda. 38Di daa niŋi lala ka anabi Aizaaya ŋɔn daa yɛli seem siri daa ti niŋi lala, ni#:-

“Ti Dugma, ŋɔni n daa niŋi tin moonni seem la yɛdda?

Naawunni ŋɔn wulisiri u yiiko maa, ŋɔni mun n nyara?

Ay! - sɔ ka ni.”

39Di wulisiya, ni, ba ku toaai n‑niŋi yɛdda. Aizaaya mun daa maali n‑yɛli, ni#:-

40“U kyɛ ka ba nini n zoomna,

Ka ba sufu ku sakki n‑wumna.

Di yi pa lala ba nini nin neaai n‑nyara,

Ka ba sufu nin wumni n‑takkra,

Nti nya tippu n saani.”

41Aizaaya ŋɔn daa tɔ'asi lala, u na pun nya Naawunni gyirima di saha maa, ka daa tɔ'asi u yɛla maa. 42Halli kpamma maa pam daa niŋi Yisa yɛdda, amaa ba daa bu kyɛ ka sɔ baŋŋi, dama ba daa zɔri Farisii dima maa dabeem, ni, di pa seem ba nin kari ba n‑yiisi ba la'aŋŋu duri ni. 43Di wulisiya, ni, ba daa boori ni ninsaadima ti pɛ'ai ba, pa ni Naawunni pɛ'ai ba.

44Yisa mun daa tasi pampam n‑yɛli, ni, “Sɔkam n niŋni ma yɛdda, pa mani ka u niŋi yɛdda maa, amaa Sɔ ŋɔn daa tum ma na la ka u niŋna. 45Ninvugsɔ ŋɔn nyari ma la gba nyari la Sɔ ŋɔn daa tum ma na maa. 46Man kyɛnni na hoo neesim, ni ŋɔnkam niŋi ma yɛdda la ku ti kpalim zibsim ni. 47Ninvugsɔ mun ŋɔn wumni n yɛla wa n‑tumni lala maa, n ku kari u sariya n‑lusi u: dama n daa bu kyɛ duniya wa na ni n ti kari ka sariya, amaa n kyɛ na ni n ti tiligi duniya maa. 48Ninvugsɔ mun yi zeemni ma ka bu sakkri n‑tiri n yɛligu maa, di daama sarikatta m bɛ ni: man ŋɔn yɛli yɛliseelli - kana n ya kari u sariya n‑lusi u, Zaadaari maa. 49Pa m mammantoori yɛla ka n yɛtta. Ay! - m Ba daa tum ma na ka daa zaali ma man ya yɛli yɛliseesi, ni man ya tɔ'asi seem. 50M mi halli, ni, ŋɔn zaaligu maa nyɛ la nyɔvuri kan ka tariga. Man ŋɔn yɛtti yɛliseesi muna, hoo m Ba ŋɔn daa tɔ'asi n‑ti ma seem la, lala ka man gba tɔ'asira.”

Currently Selected:

GYƆNI 12: maw

Highlight

Copy