II KƆRINTI DIMA 8

1Tɔ, m mabiisi, m boori la ya baŋŋi Naawunni ŋɔn daa zaŋŋi piiniseaa n‑suŋŋi Masidoonya dima maa. 2Ni, u daa kyɛ ka ba ti zoaai zaŋŋi n‑kyaŋŋi ba tisibu ziiya halli nti yakki: ni ba yɛlimugsa zamsigu maa zaa, ni ban bɛ fara puuni zaa yɔri, ba pun wulisi ba sufumaasim ni ba nirilim ŋɔn nyɛ seem. 3Dama mani nŋɔ n‑diri sɛhara, ni, ba daa tisi ban daa nyaŋŋi seem - halli n‑yakki ba kpeeŋŋu tɔriga. Ba mammaŋŋa yuubu ni 4ka ba daa bɛlim ti pam, ni, ti kyɛ ka ba la'am n‑tumni tunsuŋŋu wa. 5Ba mun daa bu niŋi tin daa teesi seem la, amaa ba daa daŋŋi n‑zaŋŋi ba mansi n‑ti la Naawunni, ka naayi ti ti gba, Naawunni yuubu zugu. 6Tɔ: Taituusi daa pun daŋŋi m‑piili lala tuma maa, ka dizugu ti daa susi u, ni, u tumma tunveelli wa n‑naai yarima gba saani. 7Ka dinŋɔna yarima ŋɔn kur niŋni seelikam suŋŋa la zugu - di yi nyɛ yɛdda ni, bee yɛttɔ'a ni, bee yɛm, bee nimmoosi tumpu ni, bee wurilim ni, yan wuri ti suŋŋasuŋŋa seem la - kur kpaŋŋma ya mansi m‑moori n‑niŋi suŋŋa n‑gba tisiri lala piini maa.

8Di pa la n tiri ya la wadda, amaa m boori la n zamsi ya wurilim ŋɔn paai seem n‑nya, din nin kyɛ ka n zaŋŋi seeba ban wuri nimmoosi maa wurilim m‑ma'asiri ya dinni. 9Dama ya mi ti Dugma Yisa Kirisita tunsuŋŋu veelim ŋɔn nyɛ seem maa: ni, u daa su arizikki zaa, amaa yarim zugu ka u daa leebi fara daana, ni lala ti kyɛ ka ya mun leebi bundaandima. 10Ka dinŋɔna n saawara maa nŋɔa: ni, yarima n nyɛ seeba ban daa piili lala yɛttɔ'a maa yuumni la sa; ka di daa pa la yan daa daŋŋi n‑tum la kɔkɔa, amaa ya daa daŋŋi m‑piili n‑teesi lala tuma maa yɛla. 11Tɔ, ka pampaŋŋɔ see ka ya tum tuma maa halli nti naai; ka lala nin kyɛ ka ya sufu ni teesa zaŋŋi n‑kyaŋŋi tuma maa, ni ya tuma maa gba, nin dɔli la taaba halli nti naai; ka ya nin tum ya marigu tɔriga. 12Ya bu nya? - ninvugsɔ yi ti boori ni u tisi, piini maa deaari dɔli la ŋɔn mari seem, pa ŋɔn ka seelli la. 13Di pa la ni ti kyɛ ka seeba vuusiri ka yarim mun nya mugsigu; ay! amaa ni di ti sa'asi n‑ti sɔkam. 14Pampaŋŋɔ ya mara, ka seeba mun ka; ka ya nin suŋŋi ba ban pɔsigi seela maa. Ban mun yi ti mara, ka ya ka, ba gba nin suŋŋi ya: lala ka ya nin sa'asi taaba. 15Hoo din pun sɔbi n‑dooli seem la, ni#:- “Ban daa va pam la dina daa bu zoaai n‑yakki, ka ban mun daa va beela maa dina n daa bu pɔsigi ba.”

16M puusiri Naawunni ŋɔn daa kyɛ ka Taituusi gba nini moaai zaŋŋi n‑kyaŋŋi ya yɛla zugu. 17Dama ŋɔn Taituusi daa wum ti susigu maa ni sufumaasim pam, ka laa n‑gbaai u kyɛnni ya saani na la ni u toori zigizigi boorimma nimmoosi. 18M‑paasi u zugu, ti ya kyɛ ka ti mabisɔ gba ti kyɛ ya saani na. Ŋɔna n nyɛ sɔ ŋɔn tumni lahabasuŋŋu maa tuma, ka Naawunni niriba ban la'amni lugri kam zaa ni kur pɛ'ari u di zugu. 19M‑paasi lala, ŋɔna ka ba daa yiisi ni u ti dɔli ti n‑suŋŋi ti, tin taasi piini maa sahanseaa la; piini mun tisibu wa wulisiri ti Dugma gyirima paalu ni, ka laa n‑wulisi tin boori ti suŋŋi niriba nimbirimoaa seem la. 20Dama ti bu boori ni sɔ galim ti zaŋŋi n‑kyaŋŋi ligri pam wa yɛla. 21Dizugu ti kpaŋŋi la ti mansi n‑niŋni din tu, pa la Naawunni tooni kɔkɔa, amaa saalidima tooni gba. 22Ti laa n‑ya tum la ti mabisɔ m‑paasi ba zugu; ti daa pun nya ka doo wa tumni nimmoosi sahakam, ka pampaŋŋɔ u niŋi ya yɛdda pam, ka dizugu u ya tum n‑gaari lala. 23Taituusi muna - u nyɛ la n tuntuntaraana ya saani. Ka ti mabiisi wa mun zɛ la ba taaba zaaziiya, ba taaba mun n nyɛ baseeba ban la'amni n‑gyeemni Naawunni tinsi zaa puuni; ka ban laa n‑nyɛ seeba ban kyɛ ka Naawunni nya pɛ'abu. 24Dinzugu ya kyɛ ka niriba wa ti baŋŋi ya wurilim ŋɔn nyɛ seem, ka laa m‑baŋŋi din kyɛ ka ti nyuuri bara ya zugu, ka Naawunni niriba zaa ti nya.

Currently Selected:

II KƆRINTI DIMA 8: maw

Highlight

Copy