II KƆRINTI DIMA 9

1Tɔ: ka ligri toosigu n‑tiri Naawunni niriba la yɛla muna - di pa la yɛlimugsa man saani ni n sɔbi di yɛla n‑ti ya. 2Dama m pun mi halli yan boori ni ya suŋŋi lala seem. Halli n pun tibgi ya yuuri Masidoonya dima saani, ni, ya Akaaya tingbaŋŋu dima wa n pun maali ya siri ni ya tisi ka di yuui, halli yuumni la sa. Ka ya zigizigi la yɛla daa kyɛ ka ba niriba pam gbaai tuma wa m‑paasi. 3Tɔ, ka dinŋɔna n tumni la ti mabiisi wa ni ba daŋŋi n tooni n‑kyɛ ya saani na, ni tin nyu bariseesi ya yɛla wa zugu ku basi yɔri. Ti daa yɛli ba, ni, ya daa pun maali ya siri, 4ka m bu boori Masidoonya niriba ti dɔli ma na n‑nya ka ya bu niŋi siri zaa. Lala nin diisi tirima vi, ka laa n‑diisi ya gba vi, tin daa niŋi ya yɛdda seem wa zugu. 5Lala zugu ka n daa teesi, ni, di kpa la talasi ni n kpamsi ti mabiisi wa ka ba daŋŋi ma na n‑suŋŋi ya ni ya ti sɛ'asi ya piiniseesi yan daa pun yɛli, ni, ya nin tisi la. Lala nin kyɛ ka a siri nyɛ la wurilim piini, pa ban mugsi ya seesi zugu.

6Ya teaama dinŋɔa: ŋɔn butti n‑ya'ara ti ya n‑ŋmaari ni n‑ya'ara; ka ŋɔn mun n butti n‑zoaara ti ya n‑ŋmaari ni n‑zoaara. 7Amaa see ka sɔkam ti tisi u sufu ŋɔn teesi, ni, u tisima seem, pa la mugsigu zugu, dama Naawunni wuri la ŋɔn tisiri sufupeelim zugu. 8Ka ŋɔn Naawunni nin kyɛ ka u piini zaa paari ya saani na, ni ya ti mari yan boori seelli zaa sahakam, ka laa m‑mari m‑paasi ni ya ti zaŋŋni n‑suŋŋni niriba. 9Hoo din pun sɔbi n‑dooli seem zaŋŋi n‑kyaŋŋi ninvugsɔ ŋɔn tisiri la, ni#:-

“U zaŋŋi piini n‑wurim n‑tisi fara dima,

Ka kpalim la yɛlimaŋni daana sahakam.”

10Ka Naawunni n nyɛ sɔ ŋɔn zaŋŋi bumbura n‑tiri ban butti la, ka laa n‑tiri bundira ni ba ti di. Ka u siri nin zaŋŋi bumbura n‑tisi yarima, ka laa m‑paasi ya antaam zaa - di nyɛ la: yɛlimaŋni puuni beesigu. 11Ya nin bɛ ni hoo seeba bam mara, bunseelikam zaa puuni; ka di nin kyɛ ka ya tisiri ya yuubu sahakam: ka lala nin kyɛ ka ba puusi Naawunni ya tuma wa zugu, tirim mun saani. 12Tɔ, ka dizugu yan tumni suŋŋsim wa gbinni pa la, ni, ya nin suŋŋi Naawunni niriba ban pɔsigi bunseesi zii kɔkɔa, amaa ka di laa m‑mari la wulisigu pam ka naayi paasiri Naawunni puusigu. 13Ya yi tum suŋŋsim tuma wa n‑naai, di nin wulisi ya beesisuŋŋu beebu yɛla. Ka niriba nin ti nya; ka pɛ'ai Naawunni, ni, ya deaari ŋɔn Naawunni noori n‑tɔ'asiri n‑wulisiri Kirisita lahabasuŋŋu yɛla yɛlimaŋni ŋɔn bɛ seem. Ka din paasi lala zugu, ni, ya yiisiri ya sufu yuubu piini n‑tiri ba, ni sɔkam. 14Ka ba nin laa n‑susiri Naawunni n‑tiri ya, ka nin boori ya yɛla ni nimbirimoaa, dama Naawunni ti ya u piinisuma pam gba, halli nti yakki. 15Pɛ'abu siri bɛ ni n‑ti Naawunni u piini tisibu zugu, halli ni tin ku toaai n‑wulisi u piini wa zaa ŋɔn nyɛ seem la.

Currently Selected:

II KƆRINTI DIMA 9: maw

Highlight

Copy