II KƆRINTI DIMA 10

1Man, Pɔla, n‑sɔbri wa: ka n susiri ya, Kirisita sugru zugu, ni u nirilim zugu. Halli ban yɛtti n yɛla seem maa yɔri ka n susiri ya - dama ba yɛtti, ni, n yi bɛ ya saani n nyɛ la sɔ ŋɔn zɔri vi ni dabeem, amaa n yi ka ya saani muna m mari la sufukpeemni ni dablim. 2N susigu wa gbinni nyɛ la: ni, n di kyɛ ya saani na nti niŋi sufukpeemni, dama n teesiri, ni, di nin kpa la talasi ni n zaŋŋi n sufukpeemni m‑boosi ninvugseeba boosa; dama ba yɛtti, ni, man nyɛ la sɔ ŋɔn tuusi la tɔppu hoo duniya wa dima ŋɔn tuusiri seem maa. 3Ni ti bɛ la duniya wa ni maa zaa yɔri, ti bu zabri hoo duniya wa tɔppu ŋɔn tuusiri seem. 4Neenseesi tin mari n‑zabra maa pa la duniya wa tɔppu neema: ay! - a mari la Naawunni yiiko, n‑nyaŋŋi n‑sa'amni kpeeŋŋu ziziisi. Ti sa'amni la nangbankpeemni yɛla gba, 5m‑paasi bunseelikam zaa kan duusiri kamaŋŋa ka za'asiri Naawunni yɛla bamsim. Ti mun zabri ni ti ti gbaasi sufu ni teesa zaa, n‑kyɛ ka a zaa ti wum n‑ti Kirisita. 6Ka ya yi ti sakki wumpu n‑naai, ti nin maali siri ni ti darigi ban ku wum la zaa tuba.

7Ya nini n gɔsiri yɛla ka ya teesiri, ni, a gɔsibu siri wulisiri la a gbinni zaa ŋɔn bɛ seem. Ay! - ŋɔnkam niŋi yɛdda, ni, u nyɛ la Kirisita nira, see ka u maali n‑teesi, ni, tirim gba nyɛ la Kirisita niriba lala. 8Di yi pa seem n nin nyu bara zaŋŋi n‑kyaŋŋi ti Dugma ŋɔn zaŋŋi yiikoseaa n‑ti ti la, halli nti yakki sɔsuŋŋu gba; ŋɔn Naawunni siri daa zaŋŋi n‑ti ti, ni ti ti duusi ya beesigu, pa ti sigsi ka. Amaa vi ku mari ma bara nyuubu wa zugu. 9M bu boori di ŋmanni hoo man sɔbri n gbana wa ni n ti vɔlisiri ya. 10Dama ninvugseeba ban yɛtti n yɛla, ni, n gbana n nyɛ buntibsa ka mugsira, amaa m mammaŋŋa yi ti bɛ ya saani sahanseaa la n nyɛ la ninvugyɔri, ningbimbaaliga daana; ni, “Ka u yɛttɔ'a wa muna - a ka yaa halli beela!” 11See ka lala niriba baŋŋma, ni, tin nyɛ seem ti gbana sɔppu maa ni, sahanseaa tin ka ya saani la, lala ka ti nin nyɛ ti tuma maa ni, sahanseaa tin bɛ ni maa.

12Niriba wa n nyari ba mansi kɔkɔa, amaa tirima ku toaai n‑zaŋŋi ba yɛla m‑ma'asi ti mansi, bee n‑la'am m‑bɛ ba saani. Ba zaŋŋi ba mansi yɛla n‑zamsiri taaba; ba zaŋŋi ba mansi m‑ma'asiri la taaba. Ba siri ka yɛm halli fiiŋ gba! 13Tirim mun ku ma'asi ti mansi n‑nyu bara n‑yakki din mari soori. Ti nin sɛ'ali ti ma'asigu ni zamsigu yɛla ni ya'aseaa Naawunni ŋɔn zaali ti - halli nti paai ya saani na gba. 14Ti yi daa bu paai ya na, ti barinyuubu naa n‑ku dɔli soori; amaa di pa lala, dama ti siri daa pun daŋŋi ya saani na n‑taasi Kirisita lahabasuŋŋu n‑ti ya. 15Ti mun bu yakkri n‑gatti ti tɔriga n‑nyuuri bara zaŋŋi n‑kyaŋŋi ninvugseeba tuma m‑paasi ti maŋtoori dina zugu. Amaa ti mari tama, ni, ya yɛdda nin zoaara, ka lala ka ti tuma zii gba nin yɛligi ya saani. 16Halli ni ti nin toaai m‑mooli lahabasuŋŋu maa n‑ti ya tooni sa tingbanseesi niriba. Ti bu boori ti kpɛ sɔ tuma ya'ari ni n‑nyuuri bara tunseesi ŋɔn pun tum n‑naai la zugu. 17Ni, “Kyɛ ka ŋɔn ya nyu bara zaa nyuuri a ti Dugma yɛla zugu.” 18Di siri pa la ŋɔn pɛ'ari u maŋŋa la yuuri ka ba duusira, amaa ti Dugma ŋɔn pɛ'ai sɔ la.

Currently Selected:

II KƆRINTI DIMA 10: maw

Highlight

Copy