II KƆRINTI DIMA 11

1Ay! - Man ŋɔn tɔ'asiri seem wa nyɛ la gyɛrilim, amaa n susi ya, ni, ya di sugru n‑sakki n‑wum. Halli ya pun sakki lala gba. 2N gɔsiri ya yɛla suŋŋasuŋŋa, ka a dɔli la Naawunni soori. Di ŋmani la hoo m bii n nyɛ ya, pɔ'asariga, ka m pun basi noori, ni, ya nin kuli sira yinni - di nyɛ la Kirisita. Lala zugu ka m boori la ni ba taasi ya u yiri hoo pɔ'asarisuŋŋu ŋɔn ka galinsi. 3Amaa dabeem mari ma, dama n teaari Hawa yɛla, ni, waafu daa zaŋŋi u putɔyam n‑yɔmsi u n‑nyaŋŋi u; man mun n zɔri, ni, di yi pa seem ya nin burigi n‑yi yɛlimaŋni sɔseaa yan nin mari n‑dɔli Kirisita wa ni. 4Dama sɔ yi kyɛ na m‑moonni Yisa sɔ yɛla, ka di pa la tirim Yisa wa, ya nin sakki n‑deaai lala; bee, yan deaai la sisɔ ŋɔn pa yan pun deaai Sisɔ wa, bee, lahabasuŋŋu kan pa yan deaai seaa wa, anŋɔ zaa ka ya nin sakki n‑deaai lala ni nimbirimoaa. 5Ba yɛnni, ni, tuumudima tibsim daandima n nyɛ ba, amaa m bu teesi man yɛla, ni, m pɔsigi ka bu paai ban sa'ai seem maa na. 6Halli ni n yɛttɔ'a pa la yɛttɔ'azulima maa zaa, man lee m‑mari la bamsim. Ti daa pun wulisi anŋɔ zaa kasi n‑ti ya, ka di dɔli la sɔya zaa.

7Ya bu nya? - n daa sigsi m maŋŋa ni n ti duusi ya, dama n daa mooli Naawunni lahabasuŋŋu n‑ti ya la yɔri, samni ka ni: tɔ, taalli ka n daa tum maa? 8N daa fa la Naawunni niriba ban bɛ tinseesi la ni, dama n daa deaai la suŋŋsim ba saani ni n ti suŋŋi ya. 9Ka man ŋɔn daa bɛ ya saani nti pɔsigi seelli maa, n daa bu zaŋŋi n yɛla m‑mugsi ya sɔa; dama ti mabiseeba ban daa yi Masidoonya na la n daa tiri ma man daa pɔsigi seelli zaa. N daa bu sakki n‑kyɛ ka n yɛla mugsi ya sɔa, ka n ya kpalim m‑bɛ lala. 10Kirisita yɛlimaŋni ŋɔn saligi m‑bɛ n saani wa ŋɔna, ya Akaaya tingbaŋŋu ni sɔ ku toaai n‑ta'ai ma bara wa nyuubu ni. 11Ka bɔzugu? - ni, man bu wuri ya zugu, bee? Ay! - Naawunni m mi, ni, n wuri ya!

12Ka dinŋɔna n ya kpalim n‑tumni la man tumni seem wa. Dama ninvugseeba m bɛ ni ban boori ba nya soori n‑zaŋŋi ba mansi n‑wulisi, ni, tin ni ban sa'ai taaba: tɔ, n tuma gbinni nyɛ la: ni, n ti nyaŋŋi n‑ta'ai ba, ba barinyuubu ziiya. 13Lala niriba nyɛ la ziri tuumudima. Ba tuma zii la muna, yɛlimaŋni ka di ni. Ba gyinni m‑ma'ari ziri, ni, ba nyɛ la Kirisita tuumudima. 14Ka lala ka alahazibu, dama Sintaani mammaŋŋa gba ma'ari ziri, ni, u nyɛ la malaaka neesim daana. 15Dizugu di ka alahazibu, ni, u nyaandɔliba gba yi ma'ari ziri, ni, ba dɔli la yɛlimaŋni nyaaŋŋa. Amaa ba naari nin nyɛ din dɔli la ba tuma maa.

16N laa n‑yɛtti ya, ni, yan di kyɛ ka ya sɔ nya ma la gyɛrigu. Di yi pa lala, see ka ya di sugru n‑deaai ma hoo gyɛrigu, ka dinŋɔna n nin nyu bara beela. 17Nyamaŋŋa bara wa ziiya, m bu tɔ'asiri an dɔli la soori ti Dugma saani; n tɔ'asiri gyɛrilim yɛttɔ'a. 18Ni, niriba pam n nyuuri bara ba duniya wa yɛla zugu: tɔ, lala ka man gba ya n‑nyu bara. 19Ya bu nya? - ya diri sugru n‑tiri ban kɔŋŋni yɛm, yan mari yɛm pam maa zugu. 20Ninvugsɔ yi ti zaŋŋi ya hoo u daaba n nyɛ ya, tɔ - ya nin di sugru n‑sakki lala: sɔ yi diri ya gba, ya nin sakki, bee, sɔ yi fa ya, bee, sɔ yi ti zaali u maŋŋa ya tooni, bee, sɔ yi lɔbi ya tampɛkka - anŋɔ zaa puuni ya nin di sugru n‑sakki lala. 21Man muna, n daa ka yaa ni n ti tum anŋɔ zaa n‑niŋi ya - di yi pa seem n yaa pɔsigri wa nin diisi ma vi. Amaa nira ŋɔn nyaŋŋi n‑nyu bara seelikam zaa zugu la muna - tɔ, man gba nin toaai n‑nyu di bara: ya nyama, n siri tɔ'asiri la gyɛrilim; bee m ma'ai ni? 22Ni, ba nyɛ la Hibruu niriba? - tɔ, man gba. Ni, ba nyɛ la Izraɛli dima? - man gba n nyɛa. Ni, ba nyɛ la Ibrahim ya'ansi? Lala ka man gba n nyɛa. 23Ni, ba tumni la Kirisita tuma? - ay! mani n gaari lala. Dama man daa tum n‑gaari ba, n‑kpɛ sarika n‑gaari; ba daa bu ma, halli ka n daa ti ya kpi, ka di daa maali m‑maali n‑niŋi ma n‑gaari ba zaa. Tɔ, pa sɔ ŋɔn zugu n labgi yɛttɔ'a nŋɔa? - Ay, gyɛrilim n siri nyɛ di! 24Napɔmbunu ka Yɛhudiyadima maa daa feebi ma kpaasa pisinaasi yinni ka ni. 25Napɔmbuta muna ka ba daa bu ma daari, ka zaŋŋi kuga n‑lɔbi ma yimmu: napɔmbuta ka n daa bɛ nyarintitaari ni ka ka sa'am n‑sim teeku koom ni, halli n daa kpalim m‑bɛ teekuzuliŋŋu ni, n‑yuui yuŋŋu n‑neaai beoo nti paai zaanoori yaasa ka n naayi nya fa-m‑basi. 26M bɛ la kyɛnni zugu sahakam. Bunseelikam zaa ziiya ka yɛttɔ'abeeri yɛla daa ya mugsi ma - n daa lɔŋŋni mɔ'a ka di daa bɛ la lala; ni fafaariba nuusi ni ka n daa nya lala, ni n toori butiri niriba nuusi ni, ni tinzundima gba nuusi ni; halli n daa bɛ la timpuuni, bee, mooni, bee, teeku zugu gba ka di daa mugsi ma; ninvugseeba daa ma'ai ziri, ni, ba n nyɛ ti Kirisita nyaandɔlitaaba, ka daa vɔlisi ma lala gba. 27N tumni tunkara n‑namsira, halli sahaseaa m bu gbisira; kɔm m mari ma, ni kɔnyuuri, ni nangbantoo; waari gba mari ma, ka n kyɛnni n‑gyinni yɔri. 28Kan paasi anŋɔ zaasa, din mugsiri ma pam dabsa zaa la nyɛ la: ni, n teesiri Naawunni niriba zaa yɛla yɛttɔ'a maa. 29Sɔ nin toaai m‑bugsi ka man mun bu la'am m‑bugsi? - ay, sɔ ka ni! Bunseelli mun nin toaai n‑lusi Naawunni nira n‑kpeesi u tumbeeri ni ka m bu gyɛ suuri di zugu? - ay! di ku toaai n‑niŋi!

30Tɔ, ka dinŋɔna n yi ya nyu bara, see ka n nyu a man ŋɔn bugsi seem la zugu. 31Naawunni m mi, ni, m bu ma'ari la ziri, ka u nyɛ la ti Dugma Yisa Ba la, ka su pɛ'abu sahakam zaa. 32M‑paasi n namsigu la zaa zugu, man ŋɔn daa bɛ Damasikusi tiŋŋa la ka Gɔmna sɔ n daa bɛ ni, ka NaaArɛtasi daa zaŋŋi tiŋŋa maa fukumsi n‑ti u; ka lala Gɔmna maa daa kyɛ ka ba guri tiŋŋa maa sɔya, ni ba gbaai ma. 33Amaa ba daa zaŋŋi ma n‑kpeesi kpangyɔkku ni, n‑lɔ ka la miisi, n‑dɔlisi takoro n‑sigsi ma hoo guuga, tiŋŋa maa goomni nyaaŋŋa. Lala ka ba daa fa ma m‑basi Gɔmna wa nuu ni, ka u daa bu nya ma, bee, n‑gbaai ma.

Currently Selected:

II KƆRINTI DIMA 11: maw

Highlight

Copy