I KƆRINTI DIMA 15

1Tɔ, m mabiisi, n ya teaai ya la man ŋɔn daa mooli lahabasuŋŋu maa n‑ti ya seem. Lahabaari wa ka ya daa deaai, ka lahabaari maa zugu ka ya kpalim n‑zɛ yummu. 2Halli lala lahabasuŋŋu zugu ka ya nya tuliginsim, ya yi kpalim n‑dɔla wulisiseaa man daa mooli n‑ti ya la suŋŋa. Di yi pa lala, ya yɛdda bɛ la yɔri. 3Lahabaari wa ka n daa deaai seeba saani ka laa n‑zaŋŋi n‑ti ya, ka di yɛttɔ'akpanni nŋɔa: ni, Kirisita Masiiya daa kpi ti tumbeeri zugu, hoo Litaafi maa ŋɔn daa pun wulisi seem. 4Ka di laa n‑wulisi, ni, ba daa sɔ'ai u, ni, dabsa ata daari ka u daa neaai kum ni, hoo Litaafi maa ŋɔn daa pun wulisi seem. 5Ni, u daa kyɛ ka Siifasi Piita nya u pɔi, ka u nyaandɔliba pii ni ayi gba daa naayi nya u. 6Di nyaaŋŋa ka u daa kyɛ ka ti mabiisi bɔbgu daa nya u, ka ba daa zoaai n‑gaari ninvugkɔbsinu. Niriba wa pam na bɛ ba nyɔvuya ni, amaa baseeba laa n‑ka ni. 7Ka u daa laa n‑kyɛ ka Gyeemsi nya u, ka u tuumudima zaa gba daa nya u. 8Anŋɔ zaa nyaaŋŋa, u daa naayi kyɛ ka n gba nya u, hoo ban gbirigi n‑dɔ'ai sɔa. 9Dama mani n kpalim tuumudima maa zaa nyaaŋŋa, halli m bu sum ni ba booli ma Naawunni tuumu gba, dama n daa katti Naawunni niriba n‑namsiri ba. 10Amaa Naawunni piini zugu kyɛ ka m bɛ la man bɛ seem; ka lala piini maa bu basi yɔri, dama n daa tum tuma n‑gaari ba zaa - halli di pa la mani n‑tumna, amaa Naawunni piini ŋɔn mari ma n‑tumna. 11Tɔ, di yi nyɛ la mani bee bana, lala ka ti moonna, ka lala ka ya daa niŋi yɛdda.

12Tɔ: ti moonni n‑yɛtti, ni, Kirisita daa neaai kum ni; ka wula ka ya seeba yɛtti, ni, kum neaari ka ni? 13Kum neaari yi ka ni, dinŋɔna Kirisita daa bu neaai. 14Kirisita mun yi daa bu neaai kum ni, dinŋɔna ti moonni la lahabaari maa yɔri, ka ya yɛdda niŋbu gba nyɛ la yɔri. 15M‑paasi lala, ba nin nya ti la, ni, zirima'ariba zaŋŋi n‑kyaŋŋi Naawunni yɛla. Dama ti yɛtti, ni, Naawunni n daa neaai Kirisita kum ni: amaa ban kpi la yi ku toaai n‑neaai kum ni, dinŋɔna u daa bu neaai u. 16Ii! - ban kpi yi ku toaai n‑neaai kum ni, dinŋɔna Kirisita gba daa bu neaai. 17Kirisita mun yi bu neaai kum ni, dinŋɔna ya yɛdda ka gbinni ka ya na kpalim m‑bɛ ya tumbeeri ni. 18Ka lala naa n‑kyɛ ka Kirisita niriba ban ka ni la gba baasi yɔri. 19Di yi nyɛ la: ni, ti ka tama Kirisita ni, di yi pa la duniya wa ni kɔkɔa, dinŋɔna ti wahala gaari sɔkam zaa dinni.

20Amaa yɛlimaŋni ka Kirisita daa siri neaai n‑yisigi kum ni; u pun daŋŋi ban kpi la zaa lala - hoo ban daŋŋi n‑kyɛ naara pɔi ka naayi nya puri antaam maa zaa seem la. 21Ya bu nya? - ninsaalisɔ zugu ka kum daa paai ti zaa na, ka dizugu kum ni neaari gba daa paai ti na ninsaalisɔ zugu. 22Ii! - Adam zugu ka sɔkam kpiira; Kirisita mun zugu ka sɔkam nin neaai kum ni. 23Amaa sɔkam ni u saha: Kirisita daŋŋi hoo naara ŋɔn daŋŋi seem la, ka ban pa nyɛ la Kirisita niriba - ba saha nyɛ la u lappu na dabsiri daari. 24Di nyaaŋŋa ka di nin naai: Kirisita nin sa'am yiiko dima ni fukumsi dima zaa yɛla ka kyɛ ka ba baasi yɔri pɔi, ka naayi zaŋŋi naam maa yɛla n‑niŋi u Ba Naawunni nuusi ni. 25Dama see ka u di naam halli nti nyaŋŋi u dindaandima zaa. 26Ka u dindaansɔ ŋɔn ti ya kpalim nyaaŋŋa ka u sa'am u yɛla nyɛ la kum. 27Ni, “U zaŋŋi bunseelikam n‑kyɛ ka u nyaŋŋi ka su a fukumsi.” Tɔ, ka ŋɔn Naawunni yi ti zaŋŋi ‘bunseelikam’ n‑ti u, di wulisi, ni, di pa la ŋɔn Naawunni fukumsi ka u su. 28Ka Naawunni Bii maa muna - u yi ti nyaŋŋi n‑naai, u mammaŋŋa gba nin kpɛ u Ba maasim ni, sɔ ŋɔn zaŋŋi seelikam n‑ti u ni u ti nyaŋŋi; ka lala nin kyɛ ka Naawunni naayi leebi seelikam sɔkam saani.

29Tɔ: ka ba yi yɛtti, ni, kum ni neaari ka ni, ka ban suuri Naawunni koom n‑tiri ban pun kpi la ya niŋi la wula? Ban kpi maa yi bu neaari fass, wula zugu ka ba suuri koom n‑tiri ba? 30Tirima muna - wula zugu ka ti diri wahala sahakam? 31N kpiiri ni beoo kam - lala n siri nyɛ di, m mabiisi - hoo man mari sufumaasim n‑duusiri m maŋŋa ya zaa yɛla zugu seem la, ti Dugma Yisa Kirisita saani la. 32Halli n daa bɛ la Ɛfɛsusi timpuuni n‑zabri ni mooni bunkɔbbeeri. Tɔ, di yi nyɛ la kulla ninsaala beesigu wa yɛla zugu kɔkɔa, n ku nya anfaani di zugu. Ban kpi yi bu neaara, ni,

“Ya kyɛ ka ti diri ka nyuura,

Dama beoo ti sa nin kpi.”

33Yan di kyɛ ka ba yɔmsi ya: ni,

“Zɔbeoo sa'amni la halli beesisuŋŋu gba soori.”

34Ya maalima n‑teesi yɛlimaŋni yɛla, ka di laa n‑tumni tumbeeri. Yaseeba bɛ ni m‑bu mi Naawunni yɛla. Ya vi yɛttɔ'a ka n yɛtti wa.

35Tɔ: di yi pa seem sɔ nin boosi n‑yɛli, ni, “Kpiimma neaari la wula n‑doaari na? Wula, ningbimbɔ ka ba ya zaŋŋi n‑yisigi?” 36Nyin gyɛrigu wa! I yi buri bumburiseelli, ka ku toaai m‑buli na n‑niŋi di yi pa la ka daŋŋi n‑kpi. 37I yi buri, pa kan ya buli n‑yi na la ka i butta, kulla bumburli hoo kawanni, bee, kyi bumburiseaa. 38Amaa Naawunni n yi tiri ka ningbinseaa ŋɔn boori maa; bumbutiri zaa ni ka u tisiri ka ningbiŋŋu. 39Ningbina zaa pa yummu: ninsaala ningbiŋŋu m bɛ ni, ni bunkɔbri dina ŋɔn bɛ ni, niinsi gba dina bɛ a kɔkɔa, ni zimi gba dina. 40Saazugu ningbina bɛ ni, ka kyɛ duniya wa ni ningbina, ka a zaa mari a veelim, ka a nyɛ la a kookooba. 41Wuntaŋŋa mari ka veelim, ka namboaa mun mari ka dinni, ni saŋmariwuusi gba mara; ka saŋmariwuseaa veelim bu ŋmanni la ka taraana dinni.

42Tɔ: ka kum ni neaari nin nyɛ la lala. Ba zaŋŋi bunseesi an sa'amni ni la n‑sɔ'ai, ka bunseesi an nin bɛ ni sahakam la nin doaai na. 43Ban zeemni seelli la ka ba sɔ'ara, ka ka nin doaai na n‑nya gyirima. Bumbugsiri m butti tiŋŋa, bunkpeeŋŋu mun nin buli n‑doaai na. 44Ba zaŋŋi duniya wa ni ningbina n‑sɔ'ara; ka ka nin neaai na hoo ningbinseaa Sii maa ŋɔn zaŋŋi nyɔvuri n‑tiri ka maa. Duniya wa ni ninsaala ningbina siri bɛ ni, ka ningbina laa m‑bɛ ni seesi Sii maa ŋɔn zaŋŋi nyɔvuri n‑tisiri maa. 45Di sɔbi n‑dooli, ni, “Daŋŋni nira la, Adam, daa leebi la ninsaala.”, sɔ ŋɔn vu la: halli ka Adam sɔ naayi kyɛ na nti leebi siiya n‑tiri sɔkam nyɔvurimaŋni. 46Amaa sii maa daana daa bu daŋŋi na: ay! - duniya dinni la n daa daŋŋi n‑kyɛ na ka sii maa daana la naayi pa. 47Ba daa zaŋŋi tanni m‑maali daŋŋni ninsaala maa, amaa ŋɔn mun pa buyi la ŋɔna, u yi la arizana ni na. 48Hoo tanni daana ŋɔn daa bɛ seem la, lala ka u duniya wa taaba gba bɛ ni; ka arizana niriba mun bɛ la hoo ba mun toondaana, arizana ni doo la. 49Dizugu ti pun mi tanni doo wa beesigu beebu, n‑ŋmanni hoo ŋɔna ŋɔn bɛ seem; ka lala yaasa ti nin ŋmanni hoo arizana doowa nti bɛ u gba beesigu.

50M mabiisi, n yɛtti ya wa, ni, duniya wa ningbina kur nyɛ la numni ni ziim, a ku toaai n‑nya Naawunni naam beebu; halli ka kan sa'amni ni la ku toaai n‑di faari kan bu naara. 51Ya wumma! N yɛtti ya la yɛlisɔ'ara yɛla: pa ti zaasa n nin kpi, amaa ba nin takki ti zaa. 52Ba nin takki ti yoomyooma, hoo nimbiri kamsigu saha. Lala saha ka ba nin kyɛ ka kikaa ti kum n‑wulisi duniya naari saha paari na. Dama ba nin peebi, ka ban kpi la zaa nin doaai ka ku laa n‑kpi; ka tirima mun nin takki. 53See ka kan sa'amni la ti deaai beesigu din bu naara, hoo ban deaari sutura n‑yeeri seem la. Ka kan kpiiri la nin deaai beesigu din bu kpiira n‑yɛa. 54Lala saha maa ka kan sa'amna ka kpiiri la ti deaai kan bu laa n‑kpiira n‑yɛ, ka di siri nin niŋi hoo ban daa pun sɔbi n‑dooli seem la, ni#:-

“Ba vɔli kum n‑nyaŋŋi.”

55ni#:-

“Ha! Kum, i nyaŋŋsim bɛ la yani?

Ha! Kum, i dumpu yiiko lee?”

56Dama dumpu seaa kum ŋɔn mari n‑dumni ti la nyɛ la tumbeeri taalli; ka taalli maa yiiko bɛ la zaaligu la ni. 57Dinŋɔna ti puusiri Naawunni barika! Dama ŋɔna n kyɛ ka ti nyaŋŋi, ti Dugma Yisa Kirisita Masiiya zugu. 58Lala zugu, m mabiwutta, see ka ya bɛ yummu deede; yan di bɛ kpa, ka bɛ kpa. Ya zaŋŋma ya mansi zaa n‑ti ti Dugma tuma maa sahakam, dama ya mi halli, ni, ya yi tumni pam n‑tiri ti Dugma, ya bu tumni la yɔri.

Currently Selected:

I KƆRINTI DIMA 15: maw

Highlight

Copy