I KƆRINTI DIMA 14

1Ka dinŋɔna ya dɔli wurilim sɔya, ka bɔ Sii maa piini; ka kan daŋŋi tooni la nyɛ la anabitiri yɛla piini. 2Dama ŋɔn tɔ'asiri yɛttɔ'a balibubalibu maa bu tɔ'asiri n‑tiri saalidima, amaa Naawunni ka u tɔ'asira. Halli sɔsɔ bu baŋŋni a gbinni, ka u kpalim n‑yɛtti yɛlisɔ'ara u siiya puuni. 3Ŋɔn mun tɔ'asiri anabitiri yɛttɔ'a maa yi tɔ'asiri n‑tiri niriba, di paasiri ba beesigu ka kpamsiri ba. 4Ii - ŋɔn tɔ'asiri yɛttɔ'a balibu maa paasiri u maŋtoori beesigu, ŋɔn mun yɛtti anabitiri yɛla la paasiri Naawunni niriba zaa beesigu. 5Tɔ, n da boori la ni ya zaa toaai n‑tɔ'asiri yɛttɔ'a balibubalibu, ka laa m‑boori ni ya yɛtti anabitiri yɛla, ka lala yi sɔa. Anabi gaari ŋɔn tɔ'asiri yɛttɔ'a balibu, di yi pa la sɔ bɛ ni n‑wulisiri yɛttɔ'a balibu maa gbinni ka lala nin paasi Naawunni niriba beesigu.

6Tɔ, m mabiisi: n yi kyɛ ya saani na n‑tɔ'asiri yɛttɔ'a balibubalibu, n suŋŋni ya la wula? Ay, zaalim! - ka di yi pa la n laa m‑mari yɛlisɔ'ara kasigri, bee, bamsim yɛla, bee, anabitiri yɛla, bee, wulisigu n‑ti ya na. 7Halli bunseesi an ka nyɔvuri saani di kur bɛ la lala: ya bu nya? - bunŋmeera hoo yiiya bee goongyi yi bu ŋmɛ n‑gɔligi suŋŋa, wula ka nira ya baŋŋi ŋmeebu maa gbinni? 8Ka bunseaa ban ŋmeeri m‑moonni tɔppu yɛla la muna - ka yi bu ŋmɛ n‑gɔligi, wula ka ba ya baŋŋi n‑niŋi tɔppu siri? 9Ya mammansi yɛttɔ'a ni gba, ya yi bu kyɛ ka ya yɛla yiiri suŋŋa, wula ka sɔ ya niŋi m‑baŋŋi yan yɛtti seelli maa gbinni? Ay! - lala kur ŋmanni la yan tɔ'asiri n‑tiri pɛsigu. 10Yɛttɔ'a balibu pam siri bɛ duniya wa puuni, ka a seelikam zaa mari ka gbinni. 11Amaa sɔ yi ti tɔ'asi n‑ti ma ka m bu wum u yɛttɔ'a maa, u nin gɔsi ma, ni, tinzunnira, ka man mun gɔsiri u gba lala. 12Tɔ: dizugu ya mansi ŋɔn boori Sii maa piini la, ya kpaŋŋma n‑nya an paasiri la Naawunni niriba beesigu, ka ya zaa ti kyaŋŋi tooni. 13Dinŋɔna, kyɛ ka ŋɔn tɔ'asiri yɛttɔ'a balibu zaa la ti susiri Naawunni ni u kyɛ ka u toaai n‑wulisiri di gbinni gba. 14Dama n yi tɔ'asi yɛttɔ'a balibubalibu m‑puusi Naawunni, n sii maa puusiri ni, amaa n yɛm ka anfaani di puuni. 15Dinŋɔna - n ya niŋi la wula? N nin zaŋŋi n sii maa m‑puusi Naawunni, ka laa n‑zaŋŋi n yɛm m‑puusi u; n nin zaŋŋi n sii maa n‑yuum yuuma n‑ti Naawunni, ka zaŋŋi n yɛm n‑yuumni m‑paasi. 16Bee, i yi puusiri Naawunni i sii puuni, wula ka ninvugsɔ ŋɔn bɛ bɛni nin niŋi m‑baŋŋi n‑niŋi “Ammi!” n‑ti i puusigu maa? - dama ŋɔn bu wumni nyin yɛtti seelli wa. 17Nyin ŋɔn puusiri suŋŋa maa zaa yɔri, di ku toaai m‑paasi i taraana beesigu. 18Halli man tɔ'asiri yɛttɔ'a balibubalibu n‑gaari ya zaa, ka m puusi Naawunni di zugu. 19Ni di zaa yɔri, n yi bɛ la Naawunni niriba sunsukkuni, m boori ni n zaŋŋi n yɛm n‑tɔ'asi beela ni n ti wulisi n taaba, ka di gaari n yi tɔ'asi pam yɛttɔ'azuna ni ka ba bu wumna.

20Tɔ, m mabiisi: yan di teesiri hoo bibisi: yɛlibeeri ziiya ka ya siri nin bɛ ni hoo bileesi, amaa yɛm ziiya see ka ya nin bɛ ni hoo ninvugkura. 21Di sɔbiya, Naawunni zaaligu maa ni, ni#:-

“N nin zaŋŋi yɛttɔ'azuna

Ni yan bu mi seeba maa yɛligu

N‑tɔ'asi n‑ti butiri wa niriba,

Ni di zaa ba ku wum n‑ti ma.

- Lala ka ti Dugma yɛli.”

22Dinŋɔna yɛttɔ'azuna bulisiri yɛla n‑tiri ban ka yɛdda la, pa ban mara; anabitiri yɛla mun bulisiri yɛla n‑tiri ban mari yɛdda, pa ban ka. 23Ya bu nya? - Naawunni niriba yi la'am n‑gyeemna, ka ba zaa tɔ'asiri yɛttɔ'a balibubalibu, ka saamma bee ban ka yɛdda dima kpɛ na, ba ku yɛli, ni, ya kpɛ la yinyaari? 24Amaa ya zaa yi tɔ'asiri anabitiri yɛla ka lala nira ti kpɛ na, ya zaa zugu ka u nin ti baŋŋi u taalli ŋɔn bɛ seem, ni, ba kari u sariya ka lusi u. 25Di saha ka u nin yɛli u sufu yɛlisɔ'ara an bɛ seem zaa, ka gbaani tiŋŋa n‑gyeem Naawunni ka yɛli, ni, “Naawunni siri bɛ ya saani.”

26Bɔ n yi kpalim, m mabiisi? - Ya yi la'am taaba, sɔkam mari u yuumni, bee, u yɛliwulisira, bee, u bunsɔ'ara kasigri yɛla, bee, u tɔ'asiri yɛttɔ'a balibu bee n‑wulisiri lala yɛttɔ'a gbinni. Tɔ - ya kpaŋŋma ya mansi n‑kyɛ ka anŋɔ zaa nin paasi Naawunni niriba beesigu. 27Seeba yi ya tɔ'asi yɛttɔ'a balibu yɛla, kyɛ ka di nyɛ la babayi-ata kɔkɔa, ka ba tɔ'asi yinniyinni n‑deaai taaba; ka laa n‑kyɛ ka sɔ bɛ ni n‑wulisiri a gbinni ŋɔn nyɛ seem. 28Amaa sɔ yi ka ni n‑wulisiri a gbinni, kyɛ ka yɛttɔ'a balibu daana sini Naawunni niriba la'aŋŋu ni, ka naayi tɔ'asi n‑tiri u maŋŋa ni Naawunni. 29Anabidima maa muna - ya kyɛ ka ba gba ti tɔ'asi ba niriba ayi-ata, ka ban kpalim la kpasi ba yɛttɔ'a maa. 30Ka yɛttɔ'a yi kyɛ sɔ ŋɔn ziya saani na, kyɛ ka ŋɔn pun tɔ'asiri la ti tɔ'asi n‑naai pɔi, ka ŋɔnla naayi deaai yɛttɔ'a. 31Dama ya zaa nin toaai n‑tɔ'asi ya anabitiri yɛla n‑deaari taaba yinniyinni, ka sɔkam bamsi ka di kpamsi ba. 32Anabidima maa n su ba mammaŋŋa anabitiri yɛla fukumsi, 33dama Naawunni pa la ŋɔn burimna, amaa ŋɔn maanna.

See ka ya dɔli ban la'amni n‑gyeemni Naawunni la zaa kaari, 34ka kyɛ ka pɔ'aba kpalim m‑bɛ surimm ya la'aŋŋu maa ni. Ba ka soori ni ba tɔ'asira, see ka ba dɔli soori hoo zaaligu maa ŋɔn yɛli seem la. 35Pɔ'a yi boori ni u baŋŋi yɛttɔ'aseaa gbinni, see ka ba naayi kuli yiri ni ka u ti boosi u sira. Pɔ'a yi ti tɔ'asiri Naawunni niriba la'aŋŋu ni, di mari la vi. 36Wula! Naawunni yɛligu daa piili yarima saani, bee? Bee, ya kɔkɔ saani ka di paai?

37Sɔ yi yɛli, ni, u nyɛ la anabi, bee, ŋɔn mi Sii maa yɛla, di daama nin sakki, ni, man ŋɔn sɔbri seelli n‑tiri ya wa nyɛ la ti Dugma zaaligu. 38Sɔ mun yi bu wumni n‑tiri yɛligu wa, yan di wumni n‑tiri di daama gba. 39Tɔ, ka dinŋɔna, m mabiisi, ya boom suŋŋa anabitiri yɛla, amaa ka di ta'ari yɛttɔ'a balibubalibu yɛla. 40See ka bunseelikam niŋi suŋŋa ka dɔli soori deede.

Currently Selected:

I KƆRINTI DIMA 14: maw

Highlight

Copy