I KƆRINTI DIMA 13

1N yi nyaŋŋi n‑tɔ'asiri ninsaalidima yɛttɔ'a kam zaa, halli ni malaakadima yɛttɔ'a gba, ka mun ka wurilim, dinŋɔna n ŋmanni la gbiliŋŋa bee feeŋŋa n‑kumni yɔri. 2N yi niŋi anabitiri, ka laa m‑mari bunsɔ'ara zaa bamsim, m‑mari yɛdda halli nti kyɛ ka zɔya vuui m‑paai seela, ka mun ka wurilim, dinŋɔna m pa seelli. 3Halli n yi zaŋŋi n ligri ni n neema zaa n‑tɔri fara dima, ka laa n‑zaŋŋi n ningbiŋŋu n‑kyɛ ka ba nyɔ ka bugum, ka mun ka wurilim, n ka anfaani anŋɔ zaa zugu.

4Wurilim mari la sugru ni nambɔzoaa; wurilim bu zabri nyuuri; ka mun bu nyuuri bara, bee, m‑mari karimbaani. 5Wurilim bu tumni gyɛrilim; di bu boori di mammaŋŋa yuubu, bee, n‑gyɛ suuri yooma: wurilim bu teaari taalli n‑guri ni di ti boosi. 6Wurilim sufu bu maara ninvugseeba tumbeeri zugu; amaa ka mari la sufumaasim yɛlimaŋni zaa zugu. 7Wurilim ta'ari ni, m‑mari yɛdda seelikam puuni, ka laa m‑mari tama ka diri sugru seelikam puuni.

8Wurilim bu naara: amaa anabitiri yɛla yi bɛ ni, a nin paai a tɔriga; ka ba yi ti tɔ'asiri yɛttɔ'a balibubalibu, ba nin naa n‑sini ba noori; bamsim gba nin paai di naari. 9Dama ti bamsim maa pa la bamsimunni, ka ti anabitiri gba pa la bummunni. 10Ka din nyɛ bummunni deede la yi ti paai na, lala saha ka an pa bummuna la nin gaari n‑naai. 11Ya bu nya? man daa nyɛ bibila sahanseaa la, n daa mari la biilim n yɛttɔ'a puuni, ni n teesa ni n yɛm yɛla zaa ni. Amaa man daa leebi bunkurigu maa, n daa zaŋŋi biilim yɛla maa zaa m‑basi. 12Dama pampaŋŋɔ ti nyari liisaliisa hoo mansɔ'asi ni, amaa ka ti nin nya kasi hoo nini ŋɔn kpa taaba, din daari maa. Pampaŋŋɔ n na bu mi yɛla zaa suŋŋa, a seesi kɔkɔ ka m mi; amaa din daari maa n nin ti baŋŋi di zaa kasi, hoo ban baŋŋi ma seem la. 13Dizugu an kpalim m‑bɛ ni n nyɛ yɛdda, ni tama, ni wurilim, abata wa; amaa din gaari a zaa nyɛ la wurilim.

Currently Selected:

I KƆRINTI DIMA 13: maw

Highlight

Copy