I KƆRINTI DIMA 12

1Tɔ; ka n ya tɔ'asi Sii Kasi piini yɛla n‑tiri ya: m mabiisi, m bu boori ni seelli ti kpalim ka ya bu baŋŋi di. 2Ya mi halli, ni, yan daa na bu niŋi tuuba la, ba daa yɔmsi ya ka ya dɔli ba'a an bu nyaŋŋi n‑tɔ'asira. 3Dizugu n yɛtti ya, ni, Naawunni Sii ŋɔn bɛ sɔ saani zaa, di daama ku toaai n‑yɛli “Yisa baasima yɔri!” Ka di yi pa Sii Kasi maa zugu, sɔ mun ku toaai n‑yɛli, ni, “Yisa nyɛ la ti Dugma!”

4Tɔ: ka piini balibubalibu m bɛ ni, amaa Sii yinni maa bɛ ni n‑tisira. 5Gyeeŋŋu sɔya balibubalibu m bɛ ni, amaa ti Dugma yinni ka ti gyeemna. 6Tuma balibubalibu gba bɛ ni, amaa Naawunni yinni maa n tumni a zaa sɔkam puuni. 7Sii maa wulisiri u maŋŋa n‑tiri sɔkam zaa, ni di zaa ti maali ka kyaŋŋi tooni. 8Sii maa zugu ka ninvugsɔ mari yɛm yɛttɔ'a; ka sɔ mun mari bamsim, lala Sii yinni maa zugu. 9Sɔ yaasa mari la yɛdda lala Sii maa zugu, ka sɔ mun bɛ ni ka u deaai baaridima tippu, Sii yinni maa zugu. 10Seeba yaasa deaari la alahazibu tuma yiiko, bee, anabitiri yɛttɔ'a, bee, m‑baŋŋi siisi yɛla viisigu, bee, n‑tɔ'asiri yɛttɔ'a balibubalibu, bee, m‑baŋŋi lala yɛttɔ'a maa gbinni n‑wulisira. 11Anŋɔ zaa nyɛ la Sii yinni maa tuma, ka u mari n‑tisiri u sufu ŋɔn boori seem.

12Di ŋmani la hoo ninsaala ningbiŋŋu ŋɔn nyɛ seem: ka nyɛ la bunyinni, amaa ka mari la luga pam; ka luga mun zaa, halli ni an zoaai seem maa zaa, a la'amni n‑niŋi ningbiŋŋu yinni. Tɔ: ka Kirisita Masiiya bɛ la lala. 13Sii yinni maa zugu ka ti zaa daa su Naawunni koom, ka di daa kyɛ ka ti la'am n‑niŋi ningbiŋŋu yinni; halli ni ti seeba daa nyɛ Yɛhudiyadima ka seeba mun daa nyɛ Griikadima gba; ka seeba daa nyɛ daaba, seeba mun daa su ba mansi; ti zaa daa la'am n‑nyu Sii yinni maa. 14Tɔ, ka ningbiŋŋu muna - pa lugri yinni kɔkɔ nla, amaa luga pam. 15Ya bu nya? - Sɔ nɔbri yi ti yɛli, ni, “Tɔ, m pa la nuu, dizugu m pa ningbiŋŋu maa lugri, halli fiiŋ gba!”, lala maa ku kyɛ ka ka siri pa ningbiŋŋu maa luginseaa. 16Bee, sɔ tubri yi ti yɛli, ni, “Tɔ, m pa la nimbiri, dizugu m pa ningbiŋŋu lugri kɔtaa!”, lala maa ku kyɛ ka ka siri pa ningbiŋŋu maa luginseaa. 17Ya bu nya? - ningbiŋŋu zaa yi da nyɛ la nimbiri, ba ya niŋi la wula n‑wumna? Bee, ka zaa yi da nyɛ la tubri, ba ya niŋi la wula n‑wumni nyuu? 18Amaa din nyɛ seem maa, Naawunni daa niŋi luga maa zaa la a lugri a lugri, hoo ŋɔn Naawunni ŋɔn boori seem. 19Yɛlimaŋni, a zaa yi da nya lugri yinni kɔkɔa, yani ka ningbiŋŋu da ya bɛ ni? 20Din nyɛ seem maa, luga maa zoaai ni, amaa a la'amni n‑niŋi ningbimmunni. 21Nimbiri ku toaai n‑yɛli nuu, ni, “I ka bukaata man saani!”, bee, zugu yɛli nɔba, ni, “Ya ka ma bukaata!” 22Ay! - halli luginseesi an ka yaa mari la bukaata gba. 23Ka luginseesi tin yɛtti, ni, an ka gyirima la n nyɛ a, ana ka ti gɔsiri suŋŋa; ka a seesi an bu veela la, ana ka ti mari suŋŋa vi zugu 24- halli ka a bunveela la bu boori lala suŋŋsim. Amaa Naawunni ŋɔn maali ningbiŋŋu seem maa, u zaŋŋi la gyirima n‑ti luginseesi an yɛla bu mugsi pam la. 25Naawunni tum lala ni u ti kyɛ ka nangbankpeemni ni wɔligri ka ningbiŋŋu maa ni, amaa ka luga maa zaa ti suŋŋni m‑mari taaba. 26Lugri yinni yi ti namsi, a zaa yi la'am n‑namsi ni; lugri yinni mun yi nya pɛ'abu, sufu maari n nyɛ di n‑tiri a zaa.

27Tɔ: yarima mun n la'am n‑nyɛ Kirisita ningbiŋŋu, ka ya zaa yinni yinni n nyɛ u ningbinluga. 28Ka Naawunni daa yiisi u niriba ka ba tumni tuma balibubalibu n‑tiri taaba: u daa daŋŋi n‑zaali seeba ni ba ti niŋi u tuumudima maa; ka laa n‑zaali seeba m‑pa anabidima; nta karimbadima, m‑paasi ban tumni alahazibu tuma, ban tibri baaridima, ban suŋŋni niriba, ni Naawunni niriba toondaandima, ni ban tɔ'asiri yɛttɔ'a balibubalibu. 29Sɔkam zaa nyɛ la tuumu? - Ay! Sɔkam nyɛ la anabi, bee, karimba? Sɔkam n toaai n‑tumni alahazibu tuma? - Ay! di pa lala. 30M‑paasi yaasa: sɔkam tibri la baaridima? Sɔkam n toaai n‑tɔ'asiri yɛttɔ'a balibu? Bee, m‑baŋŋi lala yɛttɔ'a gbinni? - Ay! 31Tɔ: ka dinŋɔna ya booma piiniseesi an tibsa la.

Halli ya kyɛ ka n wulisi ya sɔseaa kan veeli n‑gaari zaa#:-

Currently Selected:

I KƆRINTI DIMA 12: maw

Highlight

Copy