I KƆRINTI DIMA 11

1Ya dɔli n soori maa, hoo man gba dɔli Kirisita Masiiya soori seem la.

2Tɔ: ka m pɛ'ari ya, dama ya teaari n yɛla sahakam ka kpalim n‑dɔli wulisigu maa zaa, hoo man daa zaali ya seem la. 3Amaa m boori ni ya baŋŋi, ni, dɔppa saani sɔkam zaa zuguraana n nyɛ Kirisita Masiiya, pɔ'a mun zuguraana nyɛ la u sira, hoo Kirisita zuguraana ŋɔn nyɛ Naawunni. 4Dɔsɔ ŋɔn pili u zugu ka susiri Naawunni, bee, n‑tɔ'asiri anabitiri yɛttɔ'a, di daama diisiri u maŋŋa vi. 5Amaa pɔ'asɔ ŋɔn mun bu pili u zugu ka susiri Naawunni, bee, n‑tɔ'asiri anabitiri yɛttɔ'a, lala pɔ'a diisiri u maŋŋa vi. U yi ti niŋi lala, di ŋmanni la hoo ŋɔn laa m‑puni u zugu ka doaai ni zugkoaa n‑tɔ'asira. 6Dama pɔ'a yi ku sakki, ni, u bɔbi u zugu, dinŋɔna ŋɔn kyeema, bee, m‑puni ka doaai n‑zaani zugkoaa. Ka lala mun yi nyɛ la vi, dinŋɔna see ka u bɔbi u zugu. 7Doo bu sum ni u pili u zugu, dama Naawunni ŋmaari n nyɛ u, n‑tisiri Naawunni gyirima; pɔ'a mun tisiri doo maa gyirima. 8Dama ba daa bu zaŋŋi pɔ'a m‑maali doowa, amaa ba daa naam doowa pɔi ka naayi yiisi pɔ'a u saani na. 9Dizugu pa pɔ'a zugu ka doo daa bɛ ni, amaa doo maa zugu ka ba daa maali pɔ'a maa. 10Dinŋɔna see ka pɔ'a maa bɔbi u zugu suŋŋa, ban su u fukumsi zugu, ni malaakadima la zugu. 11Ni dinŋɔ zaa, ti Dugma saani pɔ'a pa u kɔkɔa ka kyɛ doowa, ka doo gba pa u kɔkɔa ka kyɛ pɔ'a. 12Ba daa naam doo ka yiisi pɔ'a u saani na, ka pɔ'a mun yi laa n‑dɔ'ari doowa. Ka seelikam yi la Naawunni saani. 13Ya mammansi teesim din sumsi ni: pɔ'a yi bu pili u zugu ka susiri Naawunni - di mari soori? 14Duniya wa beesigu kaari wulisiri ti lala - ni, doo yi mari zɔbwɔ'ala, di mari la vi. 15Pɔ'a mun yi mari u zɔbwɔ'ala, di mari la gyirima n‑ti u. Ba ti u lala zɔbri ni a ti leebi bɔbsuŋŋu n‑ti u. 16Sɔ yi ya laa n‑ŋmɛ nangbankpeemni dinŋɔ zugu, kyɛ ka n yɛli ya, ni, tirima bu dɔli lala soori, halli ya'aseelikam Naawunni niriba ŋɔn la'amni n‑gyeemna.

17Tɔ: ka man ŋɔn ya tɔ'asi yɛliseesi n‑ti ya wa, di pa la pɛ'abu zugu ka n nin tɔ'asi. Dama yan la'am taaba sahanseaa la, di bu kyɛ ka ya yɛla maa kyɛnni tooni: ay! - amaa a labri la nyaaŋŋa. 18Dama, daŋŋni, n wum ya lahabaari, ni, ya yi la'am taaba ni ya gyeem Naawunni, ya mari la nangbanwala - ka n sakki n sufu ni, ni, di bu ta'ari ni ya bɛ lala. 19Dama see ka nangbanwala bɛ ya ni, ka lala nin kyɛ ka Naawunni nini ŋɔn tigi seeba la yɛla ti yi paalu ni. 20Tɔ, ka dizugu ya yi la'am taaba, di pa la ti Dugma diibu ka ya dira. 21Dama ya yi diri ni, sɔkam diri la u mammaŋŋa diibu n‑daŋŋni u taraana; ka kɔm mari seeba, halli ka seeba mun nyuuri nti bugra. 22Wula? Ya ka yiya n‑nin toaai n‑di ka nyu a puuni, bee? Bee, Naawunni niriba gyeeŋŋu la'aŋŋu maa ka ya gɔsi yɔri, halli nti zeemni ban ka, ka diisiri ba vi? Ammi, n nin pɛ'ai ya di zugu? - Ay! n ku pɛ'ai ya, walla!

23Dama man daa deaai seelli ti Dugma saani la ka n daa zaŋŋi n‑wulisi ya: ni, yunseaa ban daa figsi ti Dugma Yisa maa, u daa daŋŋi n‑zaŋŋi diibu la 24m‑puusi Naawunni pɛ'abu n‑yɛli, ni, “N ningbina nŋɔa n‑ti yarima; ya niŋma lala ka teaari n yɛla.” 25Ka ban daa di n‑naai maa, u daa zaŋŋi kɔbeaa gba lala, ni, “Naawunni nangbanyinni zaalipaalli maa nŋɔa; n ziim nin maali lala zaaligu maa n‑ti ya. Ya yi kur ti nyu kanŋɔ sahanseaa zaa, yan teaama n yɛla.” 26Tɔ, ka sahanseaa kam ya yi ti di bundira wa ka nyu kɔbeaa wa bunnyuura, ya moonni la ti Dugma kum yɛla, halli ni u lappu na.

27Dizugu ŋɔn mi, ni, u bu dɔli soori, ka laa n‑di bundira wa, bee, n‑nyu bunnyuura wa, u galimni la ti Dugma ningbina ni u ziim maa. 28See ka nira viisi u maŋŋa suŋŋa pɔi ka naayi di bundira maa ka nyu kɔbeaa maa bunnyuura. 29Dama ŋɔnkam di ka nyu ka bu baŋŋi di gbinni, ni, ti Dugma ningbina ni u ziim maa nŋɔa, di daama bɔ la sariya karibu m‑basi u maŋŋa zugu. 30Lala zugu kyɛ ka ya niriba pam kɔŋŋi yaa ka beera; halli ya seeba mun pun ka ni. 31Amaa ti yi viisi ti mansi ka kari ti toori sariya, ba ku ti laa n‑kari ti sariya n‑lusi ti. 32Amaa ti Dugma yi viisiri ti yɛla ka kari ti sariya, u wubsiri ti n‑zaanni ti soori ni, ni lala ti kyɛ ka ba ku la'am ti ni duniya wa dima n‑kari ti sariya n‑lusi ti. 33Ka dinŋɔna, m mabiisi, ya yi la'am taaba ni ya ti di, see ka ya guri taaba. 34Kɔm yi mari sɔa, ŋɔn dima u yiri ni pɔi, ka lala nin kyɛ ka ya yi la'am taaba ya ku nya galinsi di zugu. Tɔ: n yi ti kyɛ ya saani na, n nin laa n‑wulisi ya din kpalim la zaa.

Currently Selected:

I KƆRINTI DIMA 11: maw

Highlight

Copy