I KƆRINTI DIMA 10

1M mabiisi, m bu boori ya kpalim ziilinsi ni, see ka ya baŋŋi, ni, ti badima zaa daa la'am m‑bɛ sangbaŋŋu la lɔŋni, ka ba zaa daa la'am n‑kpɛ teeku maa puuni n‑lɔŋŋi. 2Tɔ, lala n daa nyɛ di: ka di ŋmanni la hoo ban daa su ba zaa koom n‑ti Musa, sangbaŋŋu ni teeku la puuni. 3Ba zaa daa la'am n‑di diseebu din daa pa duniya wa diibu, 4ka daa nyu bunnyuuriseebu bun daa pa duniya wa dinni. Ni, tampii maa daa dɔli ba - pa duniya wa tampii n‑daa la - ka koom daa yi ka ni na; ka lala tampii maa daa nyɛ Kirisita Masiiya. 5Di zaa yɔri, ba pam n daa nyɛ seeba Naawunni sufu ŋɔn daa bu maai ba zugu; ka ba daa kpi n‑kpalim n‑dɔya yoo maa ni. 6Tɔ, ka anŋɔ n nyɛ an kpaamni tirima n‑wulisiri ti, ni, ti di dɔli kɔribeeri hoo ban daa dɔli seem. 7Halli yan di leebi ban maanni ba'a, hoo ban seeba daa maanni la - hoo din pun sɔbi n‑dooli seem, ni, “Niriba maa daa zinni ni ba ti di ka nyu, ka naayi doaai na nti deemna.” 8Ti di laa n‑niŋi zina tuma, hoo ban seeba ŋɔn daa niŋi seem, ka ba niriba tusa pisi ni ata daa kpi dahinyinni la. 9Ka ti di zamsiri ti Dugma, hoo ban seeba ŋɔn daa zamsira ka wigi daa ku ba. 10Yaasa, ti di nyurimna, hoo ban seeba ŋɔn daa nyurimni maa ka malaaka kum daana daa kyɛ ka ba baasi yɔri. 11Tɔ: anŋɔ zaa daa paai ba na, ka a wulisiri ti yɛla, ka ba daa sɔbi a n‑dooli ni ba ti kpaamni ti a zugu - tirima ban kpalim nti nya duniya naari saha paari na. 12Dizugu, i yi teesi, ni, i zɛ la deede, nyin baŋŋma ka di lu! 13Yan nya zamsigu seem, di bu yakki n‑gaari ninsaalidima ŋɔn nyari seaa. Yɛdda daana n nyɛ Naawunni, u ku kyɛ ka zamsigu seaa kan gaari ya paai ya. Halli zamsigu yi ti paai ya na, u nin bɔ sɔseaa kan nin kyɛ ka ya nyaŋŋi.

14Dinŋɔna, m mabiwutta, ya zɔm ka yi ba'a ni buga gyeeŋŋu ni. 15Ya nini n neaai, ka di zugu ka n tɔ'asiri lala n‑tiri ya. Ya mammansi kur baŋŋma n yɛttɔ'a maa gbinni ŋɔn nyɛ seem. 16Ti yi mari bunnyuura kɔbeaa la m‑puusi Naawunni barika, pa la tin la'amni n‑tɔtti Kirisita ziim la zugu? Ti mun yi zaŋŋi diibu la n‑ŋmaari n‑tiri taaba, pa la tin la'amni n‑tɔtti Kirisita ningbina zugu? 17Tɔ, ka diibu yinni m bɛ ni, ka tirim ban zoaai la'amni n‑ŋɔbra, ka ti ti leebi ninvugyinni ningbina, dama ti zaa la'am n‑diri diibu yinni. 18Ya bu ya teesi Izraɛli dima maa yɛla? Ban nyɛ Izraɛli dima duniya wa soori zugu la, niriba zaa ban la'amni m‑maanni sara la, ba laa n‑la'amni n‑tɔtti numni maa n‑ŋɔbra. 19Bɔ ka n wulisiri wa? - Ni, ba'ari numni nyɛ seelli? bee, ni, ba'ari nyɛ seelli? 20Ay! - amaa ba'amaanniba bu maanni Naawunni, arizimbeeri ka ba maanna. Ka m bu boori ni ya la'amni n‑deaari arizimbeeri yɛla tɔra. 21Yɛlimaŋni, ya ku toaai n‑nyu ti Dugma bunnyuura kɔbeaa ni, ka laa n‑nyu arizimbeeri dinni m‑paasi - lala ka soori. Ya ku toaai n‑di ti Dugma laa ni, ka laa n‑di arizimbeeri dinni ni - lala gba ka soori. 22Bee, ti ya kyɛ ka ti Dugma nyuuri yisigi? Ammi, ti mari yaa n‑gaari u? Ay - ti ka, walla!

23Ni, ‘M mari la seelikam yiiko.’ - tɔ, amaa pa seelikam zaa m paasiri suŋŋsim. Ni, ‘M mari la seelikam yiiko.’ - tɔ, amaa pa seelikam zaa m paasiri niriba beesisuŋŋu. 24Yan di kyɛ ka sɔkam bɔ u mammaŋŋa yɛla, amaa u taraana yɛla ka u boora. 25Ya ŋɔbma nakoosidima numkoosa zaa, amaa di boosiri numseesi yɛla ni ya ti nya galinsi a zugu. 26Dama di sɔbiya, ni, “Duniya wa, ni din bɛ ka ni maa - a zaa nyɛ la ti Dugma dinni.” 27Tɔ. Sɔ ŋɔn bu niŋi yɛdda yi ti zuusi ya u bundirigu ka ya boori kyɛnni, yan dima ban zaali seelli na zaa; yan di boosiri a yɛla ni ya ti nya galinsi a zugu. 28Amaa sɔ yi ti yɛli ya, ni, “Ba'ari numni nŋɔa.”, dinŋɔna yan di di, ninvugsɔ ŋɔn yɛli ya lala maa zugu, ni yan ku ti galim sɔ sufu ni teesa zugu. 29- Tɔ, lala nira maa sufu ni teesa yɛla ka n tɔ'asiri maa, pa ya mammaŋŋa dina. Mani n su m mammaŋŋa yɛla, ka dizugu n ku kyɛ ka sɔ zaŋŋi u sufu ni teesa n‑galim ma ka di mugsi ma. 30N yi puusi Naawunni ka di diibu maa, ba ya niŋi la wula n‑galim ma, diibu wa zugu? - dama m pun puusi Naawunni di zugu. 31Dizugu ya yi diri diibu, bee, n‑nyuuri bunnyuura, bee, ya yi niŋni seelli zaa, ya kyɛ ka ya tumni lala n‑tiri Naawunni gyirima. 32Yan di kyɛ ka sɔsɔ burigi n‑lu ya yɛla zugu - pa Izraɛli dima, bee ban pa Izraɛli niriba, halli Naawunni niriba gba. 33Lala ka man moora, ni n kyɛ ka sɔkam sufu maai n yɛla zugu. M bu boori m mammaŋŋa anfaani yɛla, see din mari anfaani n‑tiri sɔkam - di nyɛ la: ni, ba nya tuliginsim.

Currently Selected:

I KƆRINTI DIMA 10: maw

Highlight

Copy