I KƆRINTI DIMA 16

1Tɔ: zaŋŋi n‑kyaŋŋi toosigu n‑ti Naawunni niriba la yɛla: man daa wulisi Galɛseaa dima maa seem la, ya gba niŋma lala. 2Di nyɛ la: ni, bakwai piiligu dabsiri daari zaa, see ka ya sɔkam yinniyinni yiisiri beela n‑zaali m‑mara, hoo Naawunni ŋɔn lɔrigi u yɛla seem maa; lala nin kyɛ ka man yi ti kyɛ na sahanseaa la, toosigu yɛla ku laa m‑bɛ ni yaasa. 3N yi ti paai na, n nin sɔbi gbana n‑zaŋŋi a n‑ti yan yiisi seeba la, ni ya piini la m‑paasi, ka tum ba ni ba ti zi a n‑kyaŋŋi Gyɛrusalɛm. 4Di mun yi sum ni man gba kyaŋŋi, ba nin beeli ma ka ti kyaŋŋi.

5N yi dɔli Masidoonya tingbaŋŋu n‑gaari, n nin kyɛ ya saani na. Ii, n siri ya n‑dɔli Masidoonya pɔi, 6ka di bu ya'ai ka n niŋi dabsa ayi ya saani, bee, n nin kpalim ya saani halli ni waari saha ti naai. Lala ka ya nin nyaŋŋi n‑zaali ma soori ni, ni n ti kyaŋŋi n kyɛnni maa, di yi nyɛ Gyɛrusalɛm bee seela zaa. 7Dama m bu boori ni n nyɛ ya ka n nɔba n zɛ saazugu ka gaari yooma; m boori ni Naawunni yi sakki, ni, n niŋi la dabsa ayi ya saani. 8Amaa n nin kpalim m‑bɛ Ɛfɛsusi halli ni DaPisinu Daari Pɛntikoosi Kyuu la saha. 9Dama ba lɔrigi soori n‑ti ma ni n tum tunsuma pam, amaa ka niriba pam ta'ari ma di ni.

10Timɔti yi ti paai ya na, yan kyɛ ka u bɛ ya saani ka dabeem ka u, dama u tumni la ti Dugma tuma maa hoo man gba ŋɔn tumni seem la. 11Ya sɔ di zeem u. Ya zaalima u soori zugu ni sufu maasim, ka u ti labi n saani na. Dama n guri la u kyɛnni na, ŋɔn ni ti mabiisi zaa.

12Ti mabii Apɔloosi ŋɔna - n daa susi u nimbirimoaa, ni, u kpaŋŋma u maŋŋa n‑dɔli ti mabiisi wa n‑kyɛ ya saani na; amaa u daa bu boori ni u kyɛ na pampaŋŋɔ, halli fiiŋ: ni, u yi ti nya sahasuŋŋu, u nin kyɛ na.

13Tɔ: ka dinŋɔna ya baŋŋma suŋŋa! Ka zɛ deede ya yɛdda ni, m‑mari sufukpeemni ka kpamsiri ya mansi. 14See ka ya niŋi bunseelli kam wurilim zugu.

15Ma mabiisi, ya pun mi Sitɛfanasi yɛla: ni, ŋɔn ni u yiri dima maa daa niŋi Yisa yɛdda n‑daŋŋi Akaaya dima zaa; ka ba zikki zaa bɛ la yɛdda dima la suŋŋsim ni. Dizugu ya kpaŋŋma ya mansi, m mabiisi, 16ni ya wumni n‑tiri lala niriba, ni ba nimmoosi tuntuntaaba zaa. 17Sitɛfanasi ŋɔn daa paai ma na, ŋɔn ni Fɔtunaatusi ni Akaayakusi, n sufu daa maai, dama ba nin zɛ ya zaazii maa ni, yan ka n saani maa zugu. 18Dama ba daa labsi n sii na, ni ya gba siisi m‑paasi. Yan di tam lala niriba yɛla.

19Ti kpa wa mabiisi m puusiri ya ni - Naawunni niriba ban la'amni m‑bɛ ni Ɛseaa tingbaŋŋu tinsi ni zaa. Akwila gba puusiri ya na, ni u pɔ'a Prisila, ni ban la'amni ba yiri maa ni n‑gyeemni Naawunni la. 20Halli ti mabiisi zaa puusira. Ya puusima taaba suŋŋasuŋŋa ti wurilim puusigu ni.

21Ya nyam sɔppu wa - man sɔbri m‑puusiri ya n toori nuu ni sɔppu: Pɔla. 22Sɔ yi bu wuri ti Dugma, mbusu bɛ di daama zugu. Marana ta!, ni, Kyɛm na, ti Dugma! 23Ti Dugma Yisa piinisuma bɛ ya saani. 24N wurilim bɛ ya saani, Kirisita Yisa Masiiya saani.

Currently Selected:

I KƆRINTI DIMA 16: maw

Highlight

Copy