Luk 18
18
Uvaʼs txumbʼalimal itxhusun quBʼaal Jesuus, tiʼ uvaʼ yeʼ laʼ itanbʼa inqʼa niman tetz Jesuus inatxhax Tiuxh
1Yaʼne txumbʼalimal talt Jesuus vaʼt u yol te inqʼa nikich itxhus tibʼ s-kʼatza, tiʼ uvaʼ yeʼ laʼich motx itanbʼa inatxhax Tiuxh, atz yeʼich laʼ pal ikʼuul. 2Tul ech tal Jesuus s-eche: —Atich val u aqʼol kuʼ yol tinuqul t-val u nimla tenam. Tul yeʼ nikich inimal quBʼaal Tiuxh taʼn. Atz yeʼxhal kuxh invaʼq xaol atich itxaʼk s-te.
3Tul atichat val u txakay ixoq tu nimla tenam uvaʼ bʼenamen nikich tex xeʼ u aqʼol kuʼ yol tinuqul. Tul ech nikich tal s-eche: «Bʼan bʼaʼnil s-ve, nik injaq bʼaʼnil see uvaʼ laʼ alotxh in. Tul jikxh laʼ aqʼt kuʼ val vinyol tinuqul tuchʼ val uvaʼ atoʼk inxoʼl s-tuchʼ,» chichich u ixoq.
4Tul yeʼ nikich itzaqʼbʼe u aqʼol kuʼ yol tinuqul viyol u ixoq. Opoonetz vet invaʼl qʼij, tul ech titzʼa vet u aqʼol kuʼ yol tinuqul s-eche: «Kʼuxh yeʼl Tiuxh nik innima, atz kʼuxh yeʼxhal kuxh invaʼq xaol at itxaʼk s-ve, 5pet toq inbʼan vet tutxh viyol u ixoq tiʼ ilotxhoxeʼ. Tan txhʼaʼpebʼal kuxh veteʼ. Atz pay vet inkʼuul s-te. Tan yeʼ vet insaʼ uvaʼ yaʼtel kuxh laʼ tul sinvatz,» xeʼt u aqʼol kuʼ yol tinuqul, —xeʼt Jesuus.
6Yaʼne ech tal quBʼaal Jesuus s-eche: —Bʼenoq sete vibʼant u aqʼol kuʼ yol tinuqul u bʼaʼnil te u txakay ixoq. Tan kʼuxh yeʼ nikich inimal quBʼaal Tiuxh taʼn, atz yeʼxhal kuxh invaʼq xaol atich itxaʼk s-te, poro tetxhal ilotxh u ixoq. 7Aʼetz kol quBʼaal Tiuxh yeʼ laʼ aqʼon kuʼ yol tinuqul setiʼ, tiʼ elotxhoxeʼ, ex, inqʼa chʼexel vet ex taʼn, oq qʼiil aqʼbʼal laʼ ejaq bʼaʼnil s-te. Tul nal kuxh toq itzaqʼbʼe ex, tan bʼane, saʼ koq ibʼal tibʼ tiʼ etzaqʼbʼeleʼ. 8Niketz val sete uvaʼ: Nal kuxh laʼ taqʼ kuʼ quBʼaal Tiuxh inqʼa yol tinuqul tiʼ elotxhoxeʼ. Pet laʼetz ul vet in inpaqte, in, u Kʼaola uvaʼ qat bʼen s-alam aanima, tul kamal yeʼxh jankʼat inqʼa xaol laʼ ikʼuqbʼa ikʼuul s-viʼ tiʼ inlotxht tiʼ taqʼax kuʼ yol tinuqul s-tiʼ, —xeʼte.
Uvaʼs txumbʼalimal ibʼant quBʼaal Jesuus eela val u jaqol puaq tetz Rooma tuchʼ val u fariseeo
9Atichetz kaʼl inqʼa xaol uvaʼ nikich kuxh motx toksa iqʼij, tiʼ uvaʼ aʼxh nikich motx ibʼan u jik vatz quBʼaal Tiuxh nikich motx taleʼ. Tul nikich motx teesa txha iqʼij jolt xaol. Echetz s-tiʼile txumbʼalimal talt Jesuus val u txhusbʼal xoʼl inqʼa xaol.
Tul ech tal Jesuus s-eche: 10—Atich kaʼvaʼl u vinaq uvaʼ bʼenaq jaʼ tu nimla atibʼal tuulbʼal u tostiuxh tiʼ inatxhax Tiuxh. Tul fariseeoich invaʼl. Pet vaʼte, tan jaqolich puaq tetz Rooma. 11Echetze u fariseeo, tan xeʼt tiʼ inatxhax Tiuxh s-vatz. Tul junt kuxh nikich toksa txha iqʼij vatz quBʼaal Tiuxh. Tul txaklich tiʼ inatxhax Tiuxh. Tul ech nikich tal s-eche: «InBʼaal Tiuxh, toq vaqʼ taʼntiuxh see, tan jit ech in, eche jolt inqʼa xaol, inqʼa elqʼom, atz inqʼa yeʼ nik ibʼan u jik te inqʼa xaol, atz inqʼa nik iyansa tibʼ tuchʼ tixqel imol. Tul jit ech in, eche naq uvaʼe, u jaqol puaq tetz Rooma.
12Pet echeen nik inbʼan s-eche: Kaʼpaqul nik inmaq intxʼaʼon tuulbʼal junun xhemaana tiʼ anatxhkʼuulaleʼ. Atz juunil te txhaq laalavil nik motx veesa ka te jankʼal uvaʼ nik intxʼakeʼ, tul nik vaqʼ see,» xeʼt u fariseeo.{*}#18.12 ¿Kam s-tiʼil tal u fariseeo uvaʼ kaʼpaqul nik imaq itxʼaʼon tiʼ inatxhax Tiuxh? Tiʼ uvaʼ, aʼ nikich inima u qʼij jueeves, uvaʼs ibʼen jaʼ Moisees viʼ u vitz; atz tuchʼ u qʼij luunes, uvaʼs ikuʼ vet ul Moisees viʼ u vitz.
13Pet koq u jaqol puaq tetz Rooma, tan niim kuxh atich eluʼl. Tul jitoq taqʼ jaʼ ivatz t-amlikaʼ tiʼ inatxhax Tiuxh. Pet aʼl nikich ibʼumt tziʼ taanima tiʼ ikʼaxat tibʼ t-vipaʼv. Tul ech nikich tal s-eche: «InBʼaal Tiuxh, bʼan bʼaʼnil s-ve. Tul kuyxh inpaʼv, tan in kuxh vaʼl aj paʼvom,» chichiche.
14Echetz nik valte sete uvaʼ: Jit vet aj paʼvom u jaqol puaq tetz Rooma vatz quBʼaal Tiuxh uvaʼs iqʼaʼv vet kuʼl t-totzotz, viʼ u fariseeo. Echetz jaʼl uvaʼ laʼ taqʼ bʼen tibʼ s-nim vatz quBʼaal Tiuxh, tul aʼetz uvaʼe, laʼ eesal iqʼij taʼn quBʼaal Tiuxh. Pet jaʼl uvaʼ laʼ tiqʼo kuʼl tibʼ, tul aʼetz uvaʼe, laʼ oksal iqʼij taʼn quBʼaal Tiuxh, —xeʼt Jesuus te inqʼa nikich itxhus tibʼ s-kʼatza.
Uvaʼs tiqʼol ok jolol inqʼa nitxaʼ vatz quBʼaal Jesuus
Tio 19.13-15; Kuxh 10.13-16
15Paquletz uvaʼ iqʼol tzaan jolol nitxaʼ vatz Jesuus, tiʼ uvaʼ laʼich taqʼ jaʼ Jesuus iqʼabʼ tiviʼ. Tiletz vet inqʼa nikich itxhus tibʼ kʼatz Jesuus, tul iyaj vet inqʼa xaol tuchʼ inqʼa nitxaʼ tiʼ yeʼ ipaloʼk vatz Jesuus.
16Yaʼne isaʼ tzaan Jesuus inqʼa nikich itxhus tibʼ s-kʼatza. Tul ech tal Jesuus s-te s-eche: —Yeʼ kuxh eyaj inqʼa nitxaʼ tiʼ tukuʼl sinvatz. Pet ukoqn ul. Tan jaʼl uvaʼ laʼ tiqʼo kuʼl tibʼ, eche vitxumbʼal inqʼa nitxaʼ inqʼaa, tul aʼetz uvaʼe, laʼ ibʼan quBʼaal Tiuxh iqʼesalil s-kʼatza. 17Echetz toq valte sete, jaʼl uvaʼ yeʼ laʼ tiqʼo kuʼl tibʼ tiʼ ibʼant quBʼaal Tiuxh iqʼesalil t-taanima, eche tiqʼot kuʼl tibʼ inqʼa nitxaʼ, tul yeʼletz laʼ bʼen tu atibʼal tal uvaʼ nik ibʼanvat quBʼaal Tiuxh iqʼesalil, —xeʼt Jesuus.
Uvaʼs iyolon quBʼaal Jesuus tuchʼ val u vinaq uvaʼ txʼiolich iqʼij
Tio 19.16-30; Kuxh 10.17-31
18Yaʼne tabʼi val viqʼesal xoʼl inqʼa tij imam Israeel val u yol te Jesuus. Tul ech tal s-eche: —¿Bʼaʼnla Txhusul qetz, kam laʼ inbʼana tul laʼ bʼen vil u qʼij saq uvaʼ yeʼl iyaʼebʼal imotxebʼal? —xeʼt te Jesuus.
19Tul ech tal Jesuus s-eche: —¿Kam s-tiʼil?: «Bʼaʼnla,» chich axh s-ve. Oqxhetz nuqxhte uvaʼ nik aal tuchʼ vayoloneʼ, tan taʼn kuxh quBʼaal Tiuxhe bʼaʼn. 20Aloq ootzaql inqʼa bʼekʼbʼal uvaʼ alel ka taʼn quBʼaal Tiuxh uvaʼ ech nik tal s-eche: «Yeʼ laʼ ayansa eebʼ tuchʼ invaʼtoʼq xaol uvaʼ jit akʼulel eebʼ s-tuchʼ. Yeʼ laʼ yatzʼon axh. Yeʼ laʼ elqʼ axh. Yeʼ laʼ atzʼeq tzij tiʼ amol. Tul laʼ ooksa iqʼij atxutx abʼaal,» chich inqʼa bʼekʼbʼal abʼa, —xeʼt Jesuus.#Eeksodo 20.13-16; Deuteronoomio 5.16-20
21Yaʼne ech tal u vinaq te Jesuus s-eche: —Jankʼalxh inqʼa yol uvaʼ nik aaleʼ, tan ayaʼx tzaan inxeʼt tiʼ inimaleʼ uvaʼs txulich kuxh in, —xeʼt te Jesuus.
22Tabʼietz vet Jesuus u yol uvaʼ tal u vinaq, tul ech tal Jesuus s-te s-eche: —Vaʼt kuxh yol yeʼx abʼanetaʼ. Quuxh; tul quxh kʼayi ka jankʼal inqʼa kamaq eetz, tul jatxeʼl vijaʼmil xoʼl inqʼa meebʼaʼ. Echetz bʼen eelte u txʼijbʼal qʼij tu amlikaʼ. Yaʼnetze txhʼuyeʼven s-viʼ, —xeʼt Jesuus.
23Tabʼietz vet u vinaq viyol Jesuus, tul yekich txumun vet s-tiʼ. Tan mam txʼiolich iqʼij u vinaq.
24Tiletz vet Jesuus uvaʼ mam txumuʼm ibʼan u txʼiol iqʼij, tul ech tal Jesuus s-eche: —Poro oqxh itzaʼlal laʼ isaʼt inqʼa txʼiol iqʼij ibʼant quBʼaal Tiuxh iqʼesalil s-kʼatza.
25Tan jankʼal eche invaʼq kameeyo, tan yeʼ laʼ utxh ipal paʼl tixotel invaʼq tzʼisbʼal bʼaq, echatetz kuxh invaʼq u txʼiol iqʼije, tan yeʼ laʼ utxh itxhojt taqʼbʼ kʼatz quBʼaal Tiuxh tu amlikaʼ, tal uvaʼ nik ibʼanvat quBʼaal Tiuxh iqʼesalil, —xeʼt Jesuus.
26Tabʼietz vet inqʼa nikich itxhus tibʼ kʼatz Jesuus, tul ech motx tal vet s-eche: —Oqetz ech, eche uvaʼ nik aaleʼ, tul yeʼxhabʼiletzebʼ laʼ chitp t-inqʼa paʼv, —xeʼtaqe.{*}#18.26 ¿Kam s-tiʼil sotz ikʼuul inqʼa apoostol tiʼ u yol uvaʼ tal quBʼaal Jesuus uvaʼ?: —...oqxh itzaʼlal laʼ isaʼt inqʼa txʼiol iqʼij ibʼant quBʼaal Tiuxh iqʼesalil s-kʼatza, —chiche. Tiʼ uvaʼ tan, aʼ nikich titzʼa inqʼa tij imam Israeel uvaʼ kʼutxhbʼal tetz vibʼaʼnil quBʼaal Tiuxh u txʼijbʼal iqʼij inqʼa xaol. Pet jit ech u yole uvaʼ nikich tal quBʼaal Jesuus. Tan aʼ tal quBʼaal Jesuus uvaʼ jankʼalxh inqʼa txʼijbʼal qʼij, tan at nik ibʼaneʼ uvaʼ nik imaqon tiʼ tok bʼen inqʼa xaol tiʼ ibʼant quBʼaal Tiuxh iqʼesalil s-kʼatza.
27Tul ech tal Jesuus s-eche: —Kʼuxh yeʼxhabʼil laʼ oleʼv tiʼ ichitt tibʼ nik inatxheʼ, poro vatz quBʼaal Tiuxh, tan tira yeʼl itzaʼlal, —xeʼt Jesuus.
28Yaʼne ech tal Luʼ te Jesuus s-eche: —¿Keʼchetz oʼ? Tan qat motx qaqʼl ka inqʼa kamaq qetz s-kaqaayil tiʼ qutxhust qibʼ sakʼatza. Tul il oʼ, txhʼuyel oʼ seʼe, —xeʼt Luʼ.
29Yaʼne ech tal Jesuus te inqʼa nikich itxhus tibʼ s-kʼatza s-eche: —Nuqxh toq val sete: Jaʼl uvaʼ laʼ taqʼ ka kam tetz s-viʼ, tul sibʼetz vet bʼaʼnil laʼ bʼen til sinkʼatza. Tan jaʼl uvaʼ laʼ taqʼ ka totzotz, atz laʼ taqʼ ka tixqel, atz laʼ taqʼ ka titzʼin tatzik, itxutx, ibʼaal, initxaʼa, tiʼ ibʼant quBʼaal Tiuxh iqʼesalil s-kʼatza, tul sibʼetz vet bʼaʼnil laʼ bʼen til sinkʼatza. 30Atz jaʼl uvaʼ laʼ taqʼ ka kam tetz s-viʼ, tul laʼ ikʼul bʼaʼnil tzitza vatz txʼavaʼ s-txheel, viʼ uvaʼ aqʼel vet ka taʼn. Pet tintant inqʼa yaʼbʼ uvaʼ tuleʼ, tan aʼ, bʼen til vet u qʼij saq uvaʼ yeʼl iyaʼebʼal imotxebʼal, —xeʼt Jesuus.
Uvaʼs talt quBʼaal Jesuus, tiʼ uvaʼ tetxhal laʼich kami, tul laʼich itzʼeʼv inpaqte
Tio 20.17-19; Kuxh 10.32-34
31Yaʼne taʼn kuxh tiqʼo el Jesuus kabʼlaval inqʼa nikich itxhus tibʼ s-kʼatza tziʼeʼl bʼey, jetxhel el inbʼiil kʼatz inqʼa xaol. Tul ech motx tal Jesuus s-te s-eche: —Toqetz kuxh jaʼpoq vet oʼ tu tenam Jerusaleen. Tul toq motx elaʼpoq vet inqʼa tzʼibʼamal ka s-viʼ taʼn inqʼa qʼexsanich tetz viyol quBʼaal Tiuxh, in, u Kʼaola uvaʼ qat bʼen s-alam aanima. 32Tan toq oksaloq in tiqʼabʼ inqʼa xaol, inqʼa jit tij imam Israeel. Tul toq tzeʼleloq in. Atz toq eesaloq inqʼij taʼn. Tul toq motx tzubʼaloq in. 33Maʼtetz itzʼuʼmat in, yaʼne laʼ motx iyatzʼ in. Poro titoxv qʼij, tul laʼ itzʼeʼvk in inpaqte, —xeʼt Jesuus.
34Tul tira yeʼl inbʼeeq inqʼa yol nikich ibʼen te inqʼa nikich itxhus tibʼ kʼatz Jesuus. Tan yeʼ kuyux ibʼenaq s-te, echetz yeʼ nikich motx ipal s-tuul kam talax inqʼa yol nikich tal Jesuus.
Uvaʼs ibʼant quBʼaal Jesuus bʼaʼn val u tzot tu tenam Jerikoo
Tio 20.29-34; Kuxh 10.46-52
35Aʼetz uvaʼs ilichxh vet Jesuus saʼich aqʼbʼ tu tenam Jerikoo, tul kʼuqlich val u tzot tziʼ bʼey tiʼ ijaqax ipuaq te inqʼa xaol. 36Tabʼietz vet u tzot ipal mam xaol, tul tabʼi vet inuqul kam nikich tutxheʼ. 37Tul alax vet te u tzot uvaʼ Jesuusich uvaʼ nikich ipal paʼl, u aj Nasareet.
38Yaʼne sichʼin u tzot. Tul ech tal s-eche: —¡Jesuus, axh u Tij Imam Daviid, txum invatz! Tul ¡bʼan bʼaʼnil s-ve! —chichich u tzot. 39Tul maqax isichʼin u tzot taʼn inqʼa xaol, inqʼa bʼaxaliche.
Poro aalxh nikich taqʼt u tzot yakʼil tiʼ isichʼineʼ. Tul ech nikich tal s-eche: —¡Axh u Tij Imam Daviid, txum invatz! Tul ¡bʼan bʼaʼnil s-ve! —chichiche.
40Yaʼne txakeʼv Jesuus. Tul ibʼekʼ Jesuus tiqʼol tzaan u tzot s-vatz. Uletz vet u tzot vatz Jesuus, 41tul ech tal Jesuus s-te s-eche: —¿Kam nik asaʼeʼ laʼ inbʼan see? —xeʼt Jesuus.
Tul ech tal u tzot s-eche: —InBʼaal, aʼ nik insaʼe uvaʼ laʼ ilon in inpaqte, —xeʼte.
42Yaʼne ech tal Jesuus s-eche: —Ape bʼa. ¡Ilon vet inpaqte! Tan tiʼ uvaʼ qat akʼuqbʼa akʼuul s-viʼ, tul bʼaʼn vet axh, —xeʼt Jesuus.
43Tul ¡yekich ilon vet u tzot! Tul ok vet bʼen tiʼ Jesuus. Atz toksa vet iqʼij quBʼaal Tiuxh. Jankʼaletzxh inqʼa xaol, inqʼa motx ilon visaqin vet u tzot, tul toksaaq vet iqʼij quBʼaal Tiuxh paqte.
Currently Selected:
Luk 18: ixlC
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
