Luk 19

Uvaʼs titzʼat tibʼ Sakeeo t-inqʼa ipaʼv, tiʼ uvaʼ tabʼi Sakeeo viyol quBʼaal Jesuus

1Okaʼpetz vet Jesuus tu tenam Jerikoo, tul sebʼtich ipal vet paʼl Jesuus tuulbʼal u tenam. 2Atichetz val u vinaq uvaʼ Sakeeoich ibʼij, atz iqʼesalich inqʼa jaqol puaq tetz Rooma. Tul txʼiolich iqʼij. 3Tzʼeʼyichetzxh Sakeeo tiʼ tilixeʼ jaʼlich Jesuus, pet yeʼ nikich tutxh tilt Sakeeo Jesuus taʼn inqʼa mamala tenam. Tan txhʼojich kuxh ichʼij Sakeeo.

4Yaʼne qʼex ibʼaxabʼ Sakeeo vatz inqʼa mam xaol tiʼ tilix Jesuus. Tul pal vet jaʼ Sakeeo viʼ val u tzeʼ sikoomoro, tan il Jesuus toqnaʼqich paloq vet tzitzi.

5Aqʼbʼetz vet Jesuus tal uvaʼ atich Sakeeo, tul saqin jaʼ Jesuus viʼ u tzeʼ. Tul til vet Jesuus Sakeeo. Yaʼne ech tal Jesuus te Sakeeo s-eche: —¡Sakeeo, nal kuxh akuʼl viʼ u tzeʼ! Tan nik tal quBʼaal Tiuxh uvaʼ txheel toq atinoq in tavotzotz, —xeʼt Jesuus te Sakeeo.

6Yaʼne nal kuxh ikuʼl Sakeeo viʼ u tzeʼ. Tul chiibʼiyichxh vet Sakeeo tiʼ ikʼulux Jesuus t-totzotz.

7Tiletz vet inqʼa xaol vibʼenoʼk Jesuus t-totzotz Sakeeo, tul xeʼtaq vet tiʼ teesal iqʼij Jesuus. Tul ech motx tal vet s-eche: —Yeʼbʼaʼn uvaʼ nik ibʼan Jesuus. Tan il Jesuus maʼtoʼk txʼaʼon kʼatz val u aj paʼvom, —xeʼtaqe.

8Bʼiiletzxh vet s-tuul, tul txakeʼv vet Sakeeo. Tul ech tal Sakeeo te Jesuus s-eche: —Il nikʼaʼmil inqʼa kamaq vetz ila, inBʼaal, toq voya te inqʼa meebʼaʼ. Atz oq at invaʼq xaol subʼel vaʼn tiʼ kam invaʼq, tul kajpaqul vet ichʼexel toq vaqʼ s-te, —xeʼt Sakeeo.

9Tul ech tal Jesuus te Sakeeo s-eche: —Chitpiy vet axh s-txheel tiʼ inqʼa apaʼv, atz chitpiy vet jankʼal inqʼa xaol inqʼa at tavotzotz. Tul qat inkuy sotzsal vet inqʼa ipaʼv. Tan ech qat akʼuqbʼat akʼuul tiʼ quBʼaal Tiuxh, eche ikʼuqbʼat Avraʼaam ikʼuul tiʼ quBʼaal Tiuxh. 10Tan aʼ qat ulk in, in, u Kʼaola uvaʼ qat bʼen s-alam aanima, tiʼ itxhokox, atz tiʼ ichitix inqʼa xaol, inqʼa tzʼeqxinaʼq tu paʼv, eche itxhokon invaʼq u xeen karneʼl tiʼ vikarneʼl uvaʼ tzʼeqxinaʼqle, —xeʼt Jesuus.

Uvaʼs txumbʼalimal itxhusun quBʼaal Jesuus, tul tiqʼo tzaan val viqʼesal uvaʼ aqʼon ka puaq te taqʼonvil tuulbʼal viyol

11Sebʼtichetz tabʼit inqʼa xaol u yol uvaʼ nikich tal Jesuus, tul xeʼt Jesuus tiʼ talax vaʼt u txhusbʼal uvaʼ txumbʼalimal taltaʼ. Tul aʼ nikich titzʼa vet inqʼa xaol uvaʼ nal kuxh laʼich ixeʼt vet Jesuus tiʼ ibʼanax iqʼesalil. Tan il Jesuus bʼiitich kuxh vet taqʼbʼ tu tenam Jerusaleen.

12Yaʼne ech tal Jesuus s-eche: —Atich val u vinaq uvaʼ niimich tatineʼ. Tul bʼen tiʼ ikʼulux tiqleʼm siqʼesalil te invaʼt u mam iqʼesal t-vaʼt u mam tenam uvaʼ sibʼichxh atila. Laʼichetz kuxh bʼen tiqʼo tzaan u tiqleʼm, tul laʼich qʼaʼv inpaqte. Tul antxh laʼich ul ibʼanvat iqʼesalil t-vitenam. 13Poro antxhtuʼ, tan exxh ikʼul u tiqleʼm. Pet bʼaxaetz isaʼ vet tzaan laval inqʼa taqʼonvil tiʼ tul s-vatz. Tul juunil puaq uvaʼ ooroxhtuʼ, uvaʼ oʼ kʼalalen (100) qʼij aqʼon ijaʼmil, taqʼ te txhaq junun inqʼa taqʼonvil. Tul ech tal u vinaq, u mam iqʼesal, s-eche: «Aqʼonvoq ex tuchʼ u puaq. Tul txʼakonoq ex s-tuchʼ, ayaʼl s-tuul laʼ ul in,» xeʼte.

14Poro txhiʼanyichxh jolol inqʼa imol s-aj tenamil s-tiʼ. Antetzxh vet inqʼa nikich itxhiʼan s-tiʼ txhaqon bʼen kaʼl xaol, tiʼ uvaʼ ech laʼich bʼen tal te u mam iqʼesal s-eche: «Yeʼ qusaʼ laʼ ibʼan u vinaq iqʼesalil s-quxoʼl uvaʼe,» xeʼtaqe.

15Poro tetxhalxh aqʼax tzaan tiqleʼm u vinaq uvaʼe, tiʼ ibʼant iqʼesalil t-vitenam. Tul qʼaʼv vet tzaan inpaqte t-vitenam. Yaʼne isaʼ vet tzaan laval inqʼa taqʼonvil tiʼ tul s-vatz, inqʼa motx taqʼ ka inqʼa ipuaq s-te. Tul junun tabʼit vet s-te kam tulbʼe taqʼonv tuchʼ u puaq.

16Yaʼne ul vet u bʼaxa aqʼonvil. Tul ech tal s-eche: «Inqʼesal, lavat puaq, uvaʼ ooroxhtuʼ, qat intxʼak tuchʼ u puaq uvaʼ aaqʼ ka s-ve,» xeʼte.

17Tul ech tal u vinaq, u mam iqʼesal, s-eche: «Ape. Bʼaʼn kuxhteʼe, kʼuqlebʼ kʼuulla aqʼonvil. Tan axh invaʼl jikla vinaq. Tan jikxh axh qat abʼan tiʼ ibʼanbʼel bʼiil u puaq uvaʼ vaqʼ ka see. Echetz toq vaqʼ aviqleʼm siqʼesal tiibʼa laval mam tenam,» xeʼt veteʼ.

18Yaʼne ul vaʼt u aqʼonvil. Tul ech tal s-eche: «Inqʼesal, oʼvaʼt vet puaq, uvaʼ ooroxhtuʼ, qat intxʼak tuchʼ u puaq uvaʼ aaqʼ ka s-ve,» xeʼte.

19Tul ech tal u vinaq, u mam iqʼesal, s-eche: «Echat kuxh toq abʼane. Tan toq voksa axh siqʼesal oʼvaʼt mam tenam,» xeʼte.

20Yaʼne ul invaʼt u aqʼonvil. Tul ech tal s-eche: «Inqʼesal, il vapuaq ila. Tan kolel kuxh vaʼn tuul val u suʼt. 21Tan xoʼv in see. Tan vootzaqle uvaʼ mij kuybʼal saxeʼ oq kam laʼ ibʼan vapuaq. Tan tetxhal kuxh maʼt aabʼi puaq xeʼ inqʼa xaol kʼuxh jit eetz u puaq, eche nik ibʼan invaʼq u xaol uvaʼ maʼt kuxh imol vet ivatz inqʼa txhiko, kʼuxh jit aʼ nik aqʼonvan. Atz ajt kuxh maʼt tiqʼo ivatz uvaʼ jit aʼ nik avan,» xeʼte.

22Yaʼne ech tal u vinaq, u mam iqʼesal, s-eche: «¡Yaabʼla aqʼonvil kuxh axh! ¡Ant kuxh vayol toq bʼanon see! Tan oq ootzaqle uvaʼ mij kuybʼal siinxeʼ, atz maʼt kuxh inmol vet ivatz inqʼa txhiko, kʼuxh jit in nik aqʼonvan, atz oq ajt kuxh maʼt viqʼo vet ivatz uvaʼ jit in nik avan nik aaleʼ, 23tul aaletz koq ex aaqʼ ka vinpuaq tu kʼambʼal puaq. Tul atetz vet tale vitxhiʼoʼl vinpuaq s-txheel s-qat vuleʼ,» xeʼte.

24Yaʼne ech tal u vinaq, u mam iqʼesal, te inqʼa atich s-vatz s-eche: «¡Majvaq vinpuaq te u aqʼonvil uvaʼe! Tul antxh etaqʼvat te u aqʼonvil uvaʼ lavalen puaq, uvaʼ ooroxhtuʼ, qat itxʼak tuchʼ u puaq uvaʼ vaqʼ ka s-te,» xeʼte.

25Tul ech motx tal inqʼa aqʼonvil s-eche: «¡Quqʼesal, poro il vet laval tetz naq ati!» xeʼtaqe.

26Yaʼne ech tal u vinaq, u mam iqʼesal, s-eche: «Yeʼle. Pet nik val sete: Jaʼl uvaʼ laʼ txhabʼan ibʼanbʼel uvaʼ laʼ aqʼax s-te, tul aʼl tel laʼ taqʼax s-te. Pet jaʼl uvaʼ yeʼ laʼ txhabʼan ibʼanbʼel uvaʼ laʼ aqʼax s-te, tul aʼl laʼ imaax jankʼal uvaʼ atxh vet s-xeʼ. 27Pet inqʼa xaol, inqʼa nikich itxhiʼan s-viʼ, atz inqʼa yeʼ nikich saʼon inbʼant iqʼesalil, tan iqʼovaq tzaan. Tul yatzʼvaq el ech invatz,» xeʼt u vinaq, u mam iqʼesal, te inqʼa taqʼonvil, —xeʼt Jesuus te inqʼa xaol.{*}#19.27 ¿Jaʼl nik ibʼan eela tuchʼ u vinaq uvaʼ niimich tatineʼ, uvaʼ, ex ikʼul tiqleʼm siqʼesalil t-invaʼt tenam? Aʼ nik ibʼan eela tuchʼ quBʼaal Jesuus tiʼ ibʼen quBʼaal Jesuus kʼul tetz tiqleʼm tiqʼabʼ quBʼaal Tiuxh tu amlikaʼ. Maʼtetz ikʼult vet quBʼaal Jesuus u tiqleʼm, tul laʼ ul quBʼaal Jesuus inpaqte tiʼ ibʼant iqʼesalil vatz u txʼavaʼ. Tan ech uvaʼe nikich ibʼan inqʼa vinaq s-naʼya, inqʼa niimich tatineʼ. Tan mam tenam atich ok jaqʼ ibʼekʼbʼal u mam tenam Rooma. Echetz nikich taqʼbʼ invaʼq u vinaqe tu mam tenam Rooma tiʼ ikʼulux tiqleʼm tiqʼabʼ Seesar, u mam iqʼesal tu Rooma. Yaʼne nikich iqʼaʼv t-vitenam inpaqte tiʼ ibʼant vet iqʼesalil. ¿Jaʼletz nik ibʼan eela tuchʼ inqʼa xaol, inqʼa yeʼ nikich isaʼ ibʼant u vinaq uvaʼ niimich tatineʼ, iqʼesalil s-tiibʼa? Aʼ nik ibʼan eela tuchʼ inqʼa iqʼesal tuqʼeʼybʼal inqʼa tij imam Israeel. Tan txhiʼanyichaqxh tiʼ quBʼaal Jesuus. Tan yeʼ nikich motx inima u tiqleʼm quBʼaal Jesuus, oq uvaʼ, aʼ quBʼaal Jesuus u Kriisto. Tul jitoq nikich motx isaʼeʼ uvaʼ laʼ ok quBʼaal Jesuus siqʼesalil s-xoʼl. ¿Kametz talax u yol tal quBʼaal Jesuus tiʼ viqʼaʼv u vinaq, tul laʼ tal vet iyatzʼax el inqʼa nik itxhiʼan s-tiʼ? Aʼetz nik taleʼ uvaʼ laʼ ul quBʼaal Jesuus inpaqte tuchʼ vet u nimla tiqleʼm uvaʼ aqʼel vet taʼn quBʼaal Tiuxh. Tul laʼ taqʼ kuʼ quBʼaal Jesuus yol tinuqul tiʼ inqʼa qʼesal uqʼeʼybʼal tiʼ bʼen tilt u kʼaxkʼo uvaʼ yeʼl iyaʼebʼal imotxebʼal laʼ ibʼana. ¿Jaʼletz nik ibʼan eela tuchʼ inqʼa aqʼonvil, inqʼa kʼulun u puaq? Aʼetz nik ibʼan eela tuchʼ inqʼa apoostol. Echetze u puaq uvaʼ taqʼ u vinaq uvaʼ niimich tatineʼ te inqʼa taqʼonvil, tan aʼ nik ibʼan eela tuchʼ u tiqleʼm s-apoostolil tiʼ ibʼanax u taqʼon quBʼaal Tiuxh xoʼl inqʼa xaol. ¿Jaʼl nik ibʼan eela tuchʼ kaʼvaʼl inqʼa aqʼonvil uvaʼ txhabʼan ibʼanbʼel u puaq? Aʼetz nik ibʼan eela tuchʼ inqʼa apoostol, atz inqʼa niman tetz Jesuus uvaʼ jikxh nik ibʼant invaʼq aqʼon tiʼ viyolbʼal quBʼaal Tiuxh. Pet u aqʼonvil, uvaʼ yeʼ aqʼonv tuchʼ u puaq uvaʼ aqʼax s-te, tan aʼ nik ibʼan eela tuchʼ inqʼa niman tetz Jesuus uvaʼ mij invaʼq aqʼon nik ibʼan tiʼ viyolbʼal quBʼaal Tiuxh. Atz jitoq kuxh laʼ lotxhoni.

Uvaʼs tokaʼp vet quBʼaal Jesuus tu tenam Jerusaleen, atz u tiqʼot quBʼaal Jesuus bʼey vatz inqʼa xaol

Tio 21.1-11; Kuxh 11.1-11; Xhun 12.12-19

28Yaʼetz kuxh vet Jesuus tiʼ talt inqʼa yol inqʼae, tul ok bʼen Jesuus paqte tiʼ bʼey vatz inqʼa mamala xaol. Tul aalaq ibʼen jaʼ tu tenam Jerusaleen. 29Bʼiitichetz kuxh ikoʼp vet Jesuus tu tal tenam Vetfajee tuchʼ tu tal tenam Vetaania kʼatz u vitz Inqʼa Oliivo, yaʼne itxhaq bʼen Jesuus kaʼvaʼl inqʼa nikich itxhus tibʼ s-kʼatza. 30Tul ech tal Jesuus s-te s-eche: —Bʼenoq ex. Tul yekl ex tu tal tenam uvaʼ s-quvatz bʼen. Laʼetz aqʼbʼ ex, tul bʼen eleq val u bʼur, uvaʼ yaʼnxh txakunna, uvaʼ qitzel ka tzitzi, val uvaʼ yeʼxhabʼil invaʼxoʼq xaol jaʼ s-tiʼ. Echetz echiteʼ. Tul laʼ etiqʼo tzaan.#Sakariias 9.9 31Oqetz jaʼl invaʼq ech laʼ alon sete s-eche: «¿Kam s-tiʼil nik echit bʼen u tal bʼur?» oq chaq eʼl ex, tul ech laʼ etal s-eche: «Aʼ u quBʼaal toq txakunsan txoo,» chaq ex, —xeʼt Jesuus.

32Bʼenetz vet kaʼvaʼl inqʼa itxhaq bʼen Jesuus, tul ex elaʼpoq vet inqʼa yol kam uvaʼ tal bʼen Jesuus s-tiʼ. 33Tan sebʼtaqich ichitt u bʼur uvaʼ yaʼnxh txakunna, tul ech tal inqʼa aj etz s-eche: —¿Keʼch nik echitt u bʼur? —xeʼtaqe.

34Tul ech tal kaʼvaʼl inqʼa nikich itxhus tibʼ kʼatz Jesuus s-eche: —Aʼ u quBʼaal toq txakunsan, —xeʼtaqe.

35Yaʼne tiqʼoaq vet tzaan u bʼur. Tul ulaq taqʼ vet vatz Jesuus. Tul taqʼaq vet jaʼ inqʼa iqinkin txhas oksaʼm tiʼ u bʼur. Atz taqʼaq vet jaʼ Jesuus tiʼ u bʼur uvaʼ yaʼnaqichxh txakunna. 36Tul mamala xaol nikich aqʼon kuʼ inqʼa iqinkin txhas toksaʼm t-bʼey s-viqbʼal tal uvaʼ palk Jesuus.

37Bʼiitichetz kuxh ikoʼp vet Jesuus xeʼ toq u vitz Inqʼa Oliivo tziʼ vet u tenam Jerusaleen, tul xeʼtaq vet inqʼa mam tenam, inqʼa nikich itxhus tibʼ kʼatz Jesuus, sichʼin t-chiibʼichil tiʼ toksal iqʼij quBʼaal Tiuxh tiʼ inqʼa mam kaebʼal aanima, inqʼa maʼtich motx tilt ibʼant Jesuus. 38Tul ech motx tal s-eche:

—¡At vibʼaʼnil

quBʼaal Tiuxh sakʼatza,

axh u mam iQʼesal,

axh uvaʼ iqʼomal u tiqleʼm quBʼaal Tiuxh aaʼn

uvaʼ qat avul s-quxoʼl!

Tan ¡seʼe, tul at vibʼaʼnil

quBʼaal Tiuxh tu amlikaʼ,

atz xoʼl inqʼa xaol!

Tul ¡seʼe, toq okk iqʼij

u quBʼaal Tiuxh

uvaʼ sibʼ at jaʼp t-amlikaʼ!

—chichich inqʼa mam tenam.

39Atichetz jolol inqʼa fariseeo xoʼl inqʼa xaol, tul ech motx tal te Jesuus s-eche: —¡Txhusul, maq inqʼa xaol, inqʼa nik atxhuseʼ, tiʼ u yol uvaʼ nik motx taleʼ! —xeʼtaq te Jesuus.

40Tul ech tal Jesuus s-eche: —Toq val sete: Oq toq inmaq inqʼa nik itxhus tibʼ sinkʼatza tiʼ isichʼineʼ, tul aʼ, inqʼa sivan, toq sichʼinoq, —xeʼt Jesuus.{*}#19.40 ¿Kam nik elkaʼp inqʼa yol tal Jesuus uvaʼ?: —…aʼ inqʼa sivan toq sichʼinoq, —chiche. Aʼ nik elkaʼpun, tiʼ uvaʼ tetxhal laʼ oksal iqʼij quBʼaal Jesuus, u Kriisto; aʼe u mam iqʼesal. Pet oq yeʼ laʼ oksal iqʼij taʼn inqʼa xaol, tul quBʼaal Tiuxh laʼ bʼanon, tul kʼuxh kamxh laʼ oksan iqʼij u Kriisto, atz kʼuxh sivan.

41Tiletz vet Jesuus u tenam Jerusaleen uvaʼs bʼiitich kuxh tokaʼp Jesuus, tul oqʼ vet Jesuus tiʼ u tenam. 42Tul ech tal Jesuus s-eche: —¡Ech koqxhte sete! Tul ¡kʼuxh yaʼn toq bʼenoq sete s-txheel u tok u bʼaʼnil sexoʼl tuchʼ quBʼaal Tiuxh!, pet ¡laʼ koq bʼen vet sete! 43Pet tetxhal laʼ opoon invaʼl qʼij uvaʼ laʼ ul mamala kʼaxbʼichil setiibʼa, ex inqʼa aj Jerusaleen. Tul tira laʼ sutil tiʼ vetenam taʼn inqʼa laʼ txhʼaʼoin ex. Atz kʼuxh laʼ etxhok etelaʼ, tan yeʼxh tal laʼ elk vet ex. 44Tan tira laʼ motx tilpul el inqʼa bʼitzʼ tuchʼ inqʼa etotzotz tu tenam Jerusaleen. Atz yeʼl invaʼtoʼq sivan laʼ kaj ka jaqʼ imol. Tul laʼ yatzʼax el ex inqʼa aj Jerusaleen. Tan yeʼ qat bʼen sete u Kriisto uvaʼ qat itxhaq tzaan quBʼaal Tiuxh sexoʼl tiʼ echitpeʼ, —xeʼt Jesuus.

Uvaʼs itilut eluʼl quBʼaal Jesuus inqʼa yakonal tu nimla atibʼal tuulbʼal u tostiuxh

Tio 21.12-17; Kuxh 11.15-19; Xhun 2.13-22

45Yaʼne pal vet ok Jesuus tu nimla atibʼal tuulbʼal u tostiuxh tu Jerusaleen. Tul xeʼt Jesuus tiʼ itilul eluʼl jankʼal inqʼa nikich ikʼayineʼ, atz inqʼa nikich iloqʼoneʼ.

46Tul ech tal Jesuus s-eche: —Ech u yol tzʼibʼamal ka t-viyolbʼal quBʼaal Tiuxh s-eche: «U votzotz, tan aʼ itxaʼk tetz natxhbʼal vetz laʼ ibʼana,» chich u yol. Pet aʼetz ex, qat aqʼon bʼen s-muqbʼal kam tetz elqʼom, —xeʼt Jesuus.#Isaiias 56.7; Jeremiias 7.11

47Juunetzxh vet qʼij nikich itxhusun Jesuus tu nimla atibʼal tuulbʼal u tostiuxh. Yaʼne xeʼt vet inqʼa iqʼesal oksan yol vatz Tiuxh tiʼ itxhokox txumbʼal tiʼ iyatzʼax el Jesuus. Tul ant inqʼa nikich txhusun ibʼekʼbʼal inqʼa tij imam Israeel tuchʼ jolt inqʼa iqʼesal inqʼa tij imam Israeel tu tenam, nikich txhokon txumbʼal tiʼ iyatzʼax el Jesuus. 48Pet yeʼ nikich motx itxhej tokebʼal tiʼ itxeyp Jesuus, tan mamala tenam ayaʼlichxh ikʼuul nikich tabʼi inqʼa yol uvaʼ nikich tal Jesuus.

Currently Selected:

Luk 19: ixlC

Highlight

Copy